राष्ट्रिय सभा अध्यक्ष गणेशप्रसाद तिमिल्सिनां थःगु गृह जिल्ला पर्वतया मोदी गाउँपालिका वडा नं. ७ राम्जाय् पशुपति मावि ञकझ केन्द्रं मतदान याःगु दु।

वयकलं थौं सुथय् पशुपति केन्द्रं ७ः३० बजे मतदान याःगु खः।

 मसी।र ४ गते देयन्यक निर्वाचन जुगु दु। थौं सुथय् ७ बजे निसे बहनि ५ बजे तक मतदान याये दइ।

थ्व हे झ्वलय् बागमती प्रदेश येँ क्षेत्र न ८ (२) या उम्मेदवार राजेश शाक्यं १३ वडाय् पंचकन्या माध्यामिक बिद्यालय सुथय् ७ः१५ बजे मतदान याःगु दु।

मौन अवधि जारी जुयाच्वंगु इलय् आः दल व उम्मेदवारपिन्त भोट फ्वनेगु आचारसंहितां बन्देज याःगु दु ।

नेकपा एमालेया अध्यक्ष केपी शर्मा ओलीं ताः ई लिपा फुर्सद दुगु धासे भूतुलि ज्या याना च्वंगु किपा सार्वजनिक याःगु दु ।

ओली थः जहान राधिका नाप च्वना पाछै ल्ययाच्वंगु किपा सामाजिक सञ्जालय् पोष्ट याःगु खः। ओलीं च्वंगु दु, ‘यक्को दिं लिपा फुर्सद, फुर्सदय् राधिकानाप पाछै ल्यया च्वनागु !!’

झापा–५ या उम्मेदवार जुयाच्वंम्ह ओली छु दिंनिसे उखे हे दु।

निर्वाचन आयोगं निर्वाचनय् खटेजुपि कर्मचारीपिन्त छु न दल व उम्मेदवारपि नाप झुके मजुइत निर्देशन बिःगु दु। शनिबाः विशेष निर्देशन जारी यासे प्रमुख निर्वाचन आयुक्त दिनेश थपलियां धाःगु दु, ‘व्यक्तिगत, संस्थागत नाप पदीय रुपं स्वतन्त्र व निष्पक्ष जुया छु न राजनीतिक दल वा उम्मेदवारपि नाप झुके मजूसे मतदान व मतगणना सम्बन्धी कार्य सम्पादन याः।’

अथेहे थपलिया धाःगु दु, ‘निर्वाचनया कार्य सम्पादन यायेगु झ्वलय् प्रत्यक्ष व अप्रत्यक्ष रूपं प्रभाव, दबाब, भनसुन, धम्की, थेजाःगु वयेफु । तर छु न इनाप, पूर्वाग्रहपाखे प्रेरित व प्रभावित मजुसे निष्ठापूर्वक निर्वाचन सम्पन्न यायेत व याकेत प्रतिबद्ध जुया न्ह्यावनेमाः।’ राजनीतिक दल, उम्मेदवार व निर्वाचन प्रतिनिधि नाप मेमेपि मनूया स्वार्थ व प्रभावय् लाना छु ज्या मयायेगु नाप मतदान व मतगणना सम्बन्धी विवाद निरूपण यायेगु इलय् पक्षपिनिगु प्रभावपाखृ स्वतन्त्र जुया समाधान यायेत धयागु दु।

मतदान अधिकृत, मतगणना अधिकारी व कर्मचारीपिनिगु जिम्मेवारी काये दइगु गर्वया विषय जुगु उल्लेख यासे प्रमुख आयुक्त थपलियां जिम्मेवारी गरिमा व मर्यादायात कायम यासे मतदान व मतगणनाया ज्या मर्यादित व व्यवस्थित दयकेगु संकल्प यायेमाः धका धयागु दु।

निर्देशनय् नेपाःया संविधान, प्रचलित ऐन, कानून, आचारसंहिता, निर्वाचन सम्बन्धी निर्देशिका, कार्यविधि व निर्देशनया पूर्ण रूपं पालना यायेगु, मतपत्र, मतपेटिका व मेमेगु निर्वाचन सामग्रीया दुरूपयोग यायेके मबिइत धइगु दु। ‘सू ना न म्वाः मदुगु ज्या यायेत स्वल धाःसा कानुन कथं प्रतिकार यायेमाः अज्यागु ज्याया मतियार जुइ मजू’ निर्देशनय् उल्लेख याःगु दु।

नापं, आयोगं मतदान व मतगणना सम्बन्धी ज्या सम्पादनया झ्वलय् राजनीतिक दल, उम्मेदवार, कर्मचारी, अनुगमनकर्ता, पर्यवेक्षक, नागरिक समाज मिडियाकःमि मतदातालगायत सकसित आदरभाव व समान व्यवहार यायेत न धाःगु दु।

निर्वाचन आयोगं निम्ह बहालवाला मन्त्रीपिन्त जरिवाना याःगु दु।

सहरी विकासमन्त्री मेटमणि चौधरीयात २५ हजार व स्वास्थ्य नाप जनसंख्यामन्त्री भवानीप्रसाद खापुङयात ५ हजार रुपैयाँ जरिवाना यायेगु निर्णय जुगु दु धका आयोगया छम्ह अधिकारीं जानकारी बिःगु दु।

थ्व स्वया न्ह्यः, निर्वाचन आचारसंहिता उल्लंघनया विषय आयोगं उमित स्पष्टीकरण काःगु दु। अथेहे, आयोगं सहरी विकास मन्त्रालयं छु न्ह्यः जक स्वीकृत न्ह्यगू योजना बदर यायेत निर्देशन बिःगु दु।

शुक्रबाः सहरी विकास मन्त्रालयया सचिवयात पौं च्वया आयोगं उगु निर्णय बदर यायेत निर्देशन बिःगु खः। मन्त्रालयं थ्व हे मंसिर १ गते सचिवस्तरीय निर्णय न थी थी न्ह्यगु योजना स्वीकृत याःगु आयोगयात जानकारी बिःगु दु।