यलया सुनकोथिइ च्वंगु ऐतिहासिक चीभालय् तयातःगु बुद्धया मूर्ति खुया यंकूगु दु। सुनाकोथिइ चीभाःलाछिइ च्वंगु उगु चीभालय् मूर्ति खुया यंकूगु खः।

स्थानीय मनूतय्सं धाः कथं वंगु चान्हय् चीभाः हे तछ्यानाः अन तयातःगु बुद्धया मूर्ति खुया यंकूगु खः। स्थानीय मनूतय् धापू कथं थ्व चीमाः सम्राट अशोकं दयेकूगु खः।

उकिं थ्व तसकं पुलांगु चीभाः खः। थ्वहे चीभाःया कारणं थ्व लाछिया नां हे चीभाःलाछि जूवंगु खः। ऐतिहासिक चीभाःया प्यखेरं चिचीधंगु देगःचा दनाः उकिया द्यःने पञ्चबुद्ध पलिस्था यानातःगु खः।

उकी मध्ये छम्ह बुद्धया देगः हे थुनाः द्यः खुया यंकूगु खः। द्यः खुया यंकूगु बारे स्थानीय मनूतय्सं प्रहरीयात उजुरी यायेधुंकूगु दु ।

महाविहारमध्ये इतुंबहाः अर्थात “भाष्करदेव संस्कारित केशचन्द्रकृत पारावत् महाविहार प्राचीन इतिहास नाप स्वागु ऐतिहासिक विशेषता दुगु नांजागु व पुरातात्विक महत्वं जाःगु मू महाविहार खः ।

इतुंबहाःयात कान्तिपुरया विहारमध्ये दकलय् तधःगु व पुलागु महाविहार कथं काइ । स्वनिगःया महायानी बौद्ध विहारया परम्परामध्ये छगु प्रब्रज्याभिषेक (बन्दे छुइगु) न खः ।

थुगु परम्परा कथं श्री भाष्करदेव संस्कारित केशचन्द्रवृत पारावत् महाविहार संरक्षण समाजया ग्वसालय् थ्व हे फागुन १६ निसे २१ गते तक थुगु विहारय् प्रब्रज्याभिषेक (बन्दे छुइगु) जुयाच्वंगु दु । थुगु प्रब्रज्याभिषेक ज्याझ्वः चक्रेश्वर ओमरत्न बज्राचार्य, उपाध्याय सुरज बज्राचार्य, चचापा सुरेश बज्राचार्य नाप मूल स्थविर मणिरत्न शाक्य नाप ११ म्ह स्थविरपाखे संचालन जुयाच्वंगु दु।

मेमे बिहारय् थःगु कथं यानाच्वंगु दु सा थुगु विहार इतुंबहालय् झीनिदँय् छकः जक प्रब्रज्याभिषेक यायेगु परम्परा दु। लिपागु इलय् २०६८ सालय् इतुम्बहालय् प्रब्रज्याभिषेक जुगु खः।थुग पटक प्रब्रज्याभिषेकय् ४० म्ह इतुम्बहाःया कुलपुत्रपिन्स पुर्णा बन्देछुयेगु (प्रब्रज्याभिषेक) याःगु दु।

बीपीडब्लु लघुवित्त वित्तीय संस्था लिमिटेडं थौं फागुन १८गते बिहिबाःनिसे सर्वसाधारणया लागि धितोपत्रया प्रारम्भिक सार्वजनिक निष्कासन (आईपीओ) बिक्री खुल्ला याःगु दु।

लघुवित्तं वैदेशिक रोजगारीइ च्वपि नेपाःमिपिनिगु लागि आईपीओ निष्काशन याना बाँडफाँट याये धुका सर्वसाधारणया लागि आईपीओ निष्कासन खुल्ला याःगु खः।

लघुवित्तं नेपाल धितोपत्र बोर्डपाखे प्रतिकित्ता १०० रुपैयाँ अंकित भाः जारी पुँजी ३ करोड रुपैयाया ३२.३३ प्रतिशतं जुइगु ९७ लाख रुपैयाँ बराबरया ९७ हजार कित्ता सेयर निष्कासन यायेत अनुमति दुगु खः।

उकि मध्ये १० प्रतिशत जुइगु ९ हजार ७०० कित्ता सेयर वैदेशिक रोजगारीइ च्वपि नेपाःमिपिन्त निष्कासन याना बाँडफाँट याये धुकुगु दु। अथेहे १ हजार ५०० कित्ता सेयर कर्मचारीपिनिगु लागि व ४ हजार ८५० कित्ता सामूहिक लगानी कोषया लागि सुरक्षित याःगु खः ।

सर्वसाधारणपिन्त ल्यः दुगु ८० हजार ९५० कित्ता सेयरया लागि आवेदन बिइत्यःगु खः। उगु आईपीओ लगानीकर्तापिन्स न्यूनतम १० कित्ता सेयरया लागि आवेदन बिइ फइसा अप्पो १ हजार कित्ताया लागि आवेदन बिइ फइ।

लघुवित्तया आईपीओय् सर्वसाधारणं २३ फागुन तक आवेदन बिइ फइसा उगु इलय् पूर्ण आवेदन मवसा निष्काशन चैत २ गतेतक थपे याइ।

प्रदेश १ या नां कोशी तःगु लसाताय् थौं प्रदेशयक सार्वजनिक विदा बिइगु जुगु दु। मन्त्रिपरिषदया बैठकं फागुन १८ गते बिहीबाः प्रदेशयक सार्वजनिक बिदा बिइगु निर्णय जूगु दु धका आन्तरिक मामिला नाप कानुन मन्त्रालयं जारी यागु सूचलय् उल्लेख याःगु दु ।

प्रदेश दने दक्को सरकारी कार्यालय, सार्वजनिक संस्थान, प्रतिष्ठान व शैक्षिक संस्थाय् सार्वजनिक विदा बिइगु छगू सूचलय् उल्लेख याःगु दु।

मन्त्रिपरिषद बैठकं कोशी नामकरणया जूगु लसताय् प्रदेशय् सकससित भिंतुना न बिःगु दु। बुधबाः च्वंगु प्रदेश सभा बैठकय् प्रदेश १ या नां कोशी तयेगु निर्णय याःगु खः।

थ्व नाप आः न्ह्यगू प्रदेशया नां क्वछिइगु ज्या जुगु दु।

येँ महानगरपालिका १७ वडाया अध्यक्ष नाप प्रवक्ता नविन मानन्धरं प्रदूषण अप्वयेकेगुलिइ झी सकलें जिम्मेवार जूगु, तर सुनानं जि नं दोषी खः धकाः जिम्मेवारी काइमखु धयादीगु दु ।

वय्कलं प्रदूषण अप्वयेकगुलिइ हरेक व्यक्तिया भूमिका दुसां जि नं प्रदूषणया निंतिं दोषी खः धकाः सुं नं जिम्मेवारी कायेत मस्वइगु व खाली मेपिंत जक द्वपं बियाः थः लिचिलीगु धयादीगु दु । प्रवक्ता मानन्धरं येँ महानगरया सभाकक्षय् शिक्षा सरोकारवालातलिसे जूगु छगू अन्तक्र्रिया ज्याझ्वलय् धयादीगु खः ।

येँ महानगरपालिका वातावरण व्यवस्थापन विभागं शिक्षालिसे तप्यंक सरोकार दुपिं विद्यालय व्यवस्थापन समिति, प्रधानाध्यापक, शिक्षक व विद्यार्थीलिसे जूगु ‘स्वच्छ हावा’ विषयक अन्तक्र्रियाय् नवासें वय्कलं उगु खँ धयादीगु खः । येँ देय्यात जीवन्त व मानव बसोबास योग्य सहर दयेकेत वायु प्रदूषण म्हो यायेमाःगु आवश्यक जूगु खँय् बः बियादसें उकिया निंतिं क्षेत्रगत रुपय् व सम्बन्धित विषय विज्ञतय्सं अध्ययन यानाच्वंगु व थुकथं अध्ययनपाखें प्राप्त सुझावयात नीतिइ हे दुथ्याकाः प्रदूषण नियन्त्रणया निंतिं ज्याझ्वः दयेकेगु, तर्जुमा यायेगु व कार्यान्वयन यायेगु ज्या थःपिंसं यानाच्वनागु वय्कलं धयादीगु दु ।

प्रवक्ता मानन्धरं हरेक व्यक्ति प्रदूषणया निंतिं उतिकं जिम्मेवार दु धासें सकसिनं थुकियात वाःचायेकाः जिम्मेवारी काःसा जक प्रदूषण म्हो याये फइ धयादिल । शिक्षा समितिया संयोजकलिसें २२ वडाअध्यक्ष चिनिकाजी महर्जनं वायु प्रदूषण थेंज्याःगु ज्यायात नियन्त्रण यायेत अभियान हे न्ह्याकेमाःगु व उकिया निंतिं थुकथंया ज्याझ्वः शिक्षा क्षेत्रय् न्ह्याके फत धाःसा उकिं बांलाःगु लिच्वः पिहां वइ धयादिल । वातावरण समितिया संयोजकलिसें १२ वडाअध्यक्ष बालकृष्ण महर्जनं सकतांकथंया विकल्पया प्रयोग व कुतः यानाः येँ देय्यात च्वने ल्वयेक सहर दयेकेगु जिम्मेवारीयात साझा संकल्पया रुपय् न्ह्यःने यंकेमाःगु खँय् बः बियादिल ।

महानगरया प्रमुख प्रशासकीय अधिकृत वसन्त अधिकारीं वायु प्रदूषण म्हो यायेत प्रचारात्मक व प्रवद्र्धनात्मक ज्याझ्वः हयेमाःगु खँय् बः बियादिसें प्रदूषणय् म्होति हयेत बांलाःगु ज्याया प्रवद्र्धन व गलत ज्यायात निरुत्साहित यायेगु प्रणाली हयेमाः धयादिल ।

येँ महानगरया शिक्षा सल्लाहकार रेशु अर्यालं ब्वनेकुथि दुने नं झाः , सिमा हः, कचा, भ्वं आदि पक्का नं च्याकेगु याःगु दयेमाः धासें अज्याःगु वस्तुया व्यवस्थापन च्याकाः यायेगु स्वयां नं वातावरणीय विधि नाला वनेगुपाखे विद्यालय प्रशासनं ध्यान बीमाःगु आवश्यक जू धयादिल । वातावरण विज्ञालिसें युएसएड स्वच्छ हावा परियोजनाया प्रमुख भूषण तुलाधरं येँया वायु प्रदूषण विश्व स्वास्थ्य संगठनं क्वःछिनातःगु मापदण्ड स्वयां झिदुगं अप्वः दु धासें मृत्युया प्रमुख न्यागू कारण मध्ये वायु प्रदूषण छगू जूगु खँ कनादिल ।

अन्तक्र्रियाय् महानगरं ब्वनेकुथिइ ‘ह्याप्पी फ्राइ डे’ ज्याझ्वः संचालन यायेगु व थ्व कुन्हु विद्यार्थीतय्त सीपमूलक व व्यवहारिक क्रियाकलाप याकेगु योजना दयेकूगु जानकारी बिसें ब्वनेकुथि थःपिंसं हे नं प्रदूषण नियन्त्रणया निंतिं ज्या यायेमाःगु निष्कर्ष पिकाःगु दु ।