येँया फोहोर क्वबियाः वनाच्वंगु गाडीयात सिसडोल लागाय् हानं पना बिःगू दु आः हानं फोहोरया गाडी पंगुया कारण धाःसा सी मदुनि।

सिसडोलया ल्याण्ड फिल साइट न्हिनय् ४ बजे बन्द जुइगु खःसां चान्हय् स्वंगः ट्रक अज्ञात ट्रक वयाः तीन पिप्ले आठमाइल लिक्कसं ढकाल खोला धाःथाय् फोहोर प्वंका थकूगु द्वपं स्थानीय मनूतय्सं बिःगु खः । अथे चान्हयय् वयाः लँय् हे फोहोर वाना थकूगुलिं स्थानीय वासिन्दां मनपाया फुक्क हे गाडी पना बिःगु खः। म्हीगः जक मनपाया १५२ गः फोहोरया गाडी बञ्चरेडाँडापाखे वंगु खः।

गाडीया थ्व ल्याः थपे यायां यंकेगु ग्वसाः यानाच्वंगु खःसां स्थानीय जनताया विरोधं यानाः आः हानं फोहोर यंकेगु ज्या बन्द जूसा लिपा प्रहरीं फोहोर वांछ्वः वःगु गाडी पत्ता लगे यानाः कारवाही यायेगु धाःगुलिं गाडी खुले याःगु खँ धाःगु दु। मनपा सूत्रं धाः कथं अन निजी क्षेत्रया फोहोर व्यवस्थापन याइगु संस्था–तय्सं चान्हय् वयाः फोहोर वाना थकूगु खः। स्वंगः मध्ये छगः गाडीयात ज्वने नं धुंकूगु दु।

फोहोर मुना यंकेगु ज्या बन्द जूगुलिं येँया दुवाः दुवातय् मुनाच्वंगु फोहोर म्हीग तसकं वःगु वां यानाः लँय् लँय् बाः वःगु दु। लँय् फोहोर बाः वयाः लँ फुक्क हे फोहोरया फोहोर जुयाः विभत्स खने दयाच्वंगु दु। अथेहे येँया फोहोरयात कयाः विहीवाः च्वंगु मनपा कार्यपालिकाया बैठकय् नं मेयर साह व थीथी वडाया वडा अध्यक्षपिनि दथुइ वादविवाद जूगु खँ सीदुगु दु।

किपूया साया जात्राय् महाद्यः जूया अभिनय याःम्ह गोविन्द्र महर्जन मन्त। किपूया सलिछेँ च्वम्ह २४ दँ दुम्ह महर्जन द्यःपुखुलि डुबेया मदुगु धका पारिवारिक स्रोतं धाःगू दु।

जात्राय् लोकह्वाःम्ह कलाकारया रूपय् अभिनय यानादीम्ह महर्जन आइतबाः चान्ह्यः १०ः१५ बजे बाघभैरव न्ह्यने द्यःपुखुलि डुबे जूगु खः। पूखुलि डुबे जूम्ह महर्जनयात बल्खुइ च्वंगू बयोधा अस्पातलय् उपचारया झ्वलय् मदुगु खः।

साया दुकायेगु झ्वलय् किपूलि लाखेयात उपहार कथं म्येँया तुति व छ्यं बिया जात्रा यायेगु झ्वलय् महर्जन डुबे जूगु खः।

किपू नगरपालिका वडा नम्बर १ या वडाध्यक्ष हीरालाल महर्जनया कथं न्हिच्छियकं जूगु जात्राय् थाके जूया महर्जन पूखुलि म्हितिइगु झ्वलय् थाके जूया अचेत अवस्था थ्यःगु धका धाःगु खः। 

राष्ट्रपति विद्यादेवी भण्डारीं नागरिकता विधेयक संसदय् लितः छ्वंय्वं आः प्रक्रियाबारे बहस सुरु जूगु दु। संविधानया धारा ११३ या उपधारा ४ य् राष्ट्रपतिं सन्देशनाप लितः छ्वंय्वं विधेयकयात कया निगू हे सदनं पुनर्विचाः यायेमाःगू उल्लेख दु।

‘राष्ट्रपतिं छु न विधेयक सन्देशनाप लितः छ्वलकि अज्यागू विधेयकय् निगु हे सदनं पुनर्विचाः याना उगु विधेयक प्रस्तुत रुपं वा संशोधननाप पारित याना हाकन पेस यायेमाः अथेहे पेस जूगु १५ दिं दुने राष्ट्रपतिं प्रमाणित यायेमाः’ संविधानया धारा ११३ या उपधारा ४ य् अथे धयातःगु दु।

राष्ट्रपतिं लितः छ्वंगु विधेयक सरकारं न्ह्यने यके चाहे जूसा आः हाकन संसदय् पुलागु हे प्रक्रिया कथं न्ह्याकेमाः । प्रतिनिधि सभा नियमावली कथं अथे लितः हःगु विधेयकबारे संसदया महासचिव व वयागु अनुपस्थितिइ सचिवं संसदय् जानकारी बिइमाः।संसद् अधिवेशन चालु मजूगु अवस्थाय् सूचं टाँसे याना अथे जानकारी बिइमाःगु नियम दु।

संसद् बैठक कन्ह्य च्वनिइगु दु। प्रक्रिया कथं राष्ट्रपति लितः छ्वया हःगु विधेयक सरकारं हाकन प्रतिनिधि सभाय् टेबुल यायेमाः। अथे टेबुल याःगू विधेयकय् विचाः याये माःगु धासे प्रस्ताव पारित यायेमाः। वयालिपा संसदं विधेयकय् संशोधन यायेत ७२ घन्टाया ई बिइमाः। वया लिपा प्रतिनिधि सभां दफावार छलफलया लागि समितिइ छ्वयेगु वा संसदं क्वछिइमाः।

प्रतिनिधि सभां पास जुइवं विधेयक राष्ट्रियसभाय् छ्वयेमाः। राष्ट्रियसभा न प्रतिनिधि सभाय् थे प्रक्रिया पूरा यायेमाः। राष्ट्रियसभाय् पारित जुइवं विधेयकयात प्रतिनिधि सभां स्वीकृत याना प्रमाणीकरणया लागि राष्ट्रपतिया थाय् छ्वयेमाः। अथे याना छ्वंगू विधेयक राष्ट्रपतिं हाकन लितः छ्वंय् मज्यूगु संवैधानिक व्यवस्था दु।

राष्ट्रपति विद्यादेवी भण्डारीं नागरिकता विधेयक प्रतिनिधि सभाय् लितः छ्वंगु दु। राष्ट्रपति भण्डारीं विधेयकय् पुनर्विचाः यायेमाः धका धासे विधेयक लितः छ्वंगु विज्ञप्तिइ उल्लेख याःगू खः।

विधेयकयात संसदीय समितिं पास याःगू प्रतिनिधि सभाय् छ्वंगु खः। प्रतिनिधि सभां राष्ट्रिय सभाय् छ्वंगू विधेयक राष्ट्रिय सभाय् पारित जूइवं सभामुख अग्नि प्रसाद सापकोटां प्रमाणित यायेत राष्ट्रपतिया थाय् त्वंगू खः।

तर राष्ट्रपति विद्यादेवी भण्डारीं विधेयकसम्बन्धी छू विषय सङ्घीय संसदपाखे पुनर्विचाः यायेमाःगू धासे छगु सन्देश नाप प्रतिनिधि सभाय् छ्वंगु खः।

साउन ६ गते प्रतिनिधि सभा व साउन १२ गते राष्ट्रिय सभाय् बहुमतं पारित विधेयक प्रमाणीकरणया लागि संसदय् साउन १५ गते राष्ट्रपति कार्यालय छ्वंगू खः। १५ दिंया ई म्हिगः क्वचाःगू खः।

नेपालभाषाया सफू ब्वज्या म्हिगः क्वचाःगु दु। वंगु साउन २६ गते प्रज्ञा भवनय् नेपाल भाषा एकादेमिया चान्सलर यज्ञरत्न ध्वाखा न उलेज्या यानादीगु खः।

उगु सफू ब्वज्याय् कवि सिद्धिचरण श्रेष्ठया सीस्वां, फूस्वां व भूषण प्रसाद श्रेष्ठया छन्द ७७ व नेवाः गजल सफू विमोचन जूगु खः।

सफू ब्वज्याय् च्वसापासा, नेपालभाषा एकेडेमी, नेपालभाषा मिसा खलः, ईलोहं प्रकाशन, नागार्जुन पब्लिकेशन, कुतः पिकाक लगायतपिन्स ब्बति काःगू खः।