कञ्चनपुर–१ य् गठबन्धन नाप नेकपा (माओवादी केन्द्र) या उम्मेदवार बिना मगर नेकपा (एमाले) या तारा लामा तामाङ न्ह्यने लाना च्वंगु दु।

१ हजार मतगणना जुगुलि बिना मगरं २३६ मत हये धुकुगु दु सा तामाङं ५९७ मत काःगु दु ।

संविधानसभा अध्यक्ष सुवासचन्द्र नेम्वाङ् न्यागु मतं ल्युने लानाच्वंगु दु।

इलाम क्षेत्र नम्बर २ य् नेम्वाङ व सत्ता गठबन्धनपाखे नेपाली कांग्रेसया जिल्ला सभापति डम्बर खड्का चुनावी मैदानय् दुगु खः। आःतक १ हजार ६२३ मतगणना जुइ धुकुगु दु।

उकिइ एमाले उपाध्यक्ष तक जुयादीम्ह नेम्वाङं ५३७ मत काःगु दु। खड्कां न्यागु मत बढी अप्पो ५४३ मत काःगु दु।

अथेहे, राष्ट्रिय जनमुक्ति पार्टीया खड्गबहादुर पालुङ्वां ३७२ मत काःगु दु।

१ लाख १५ हजार ४२३ मतदाता दुगु उगु क्षेत्रय् ६९ हजार ८५ मत कुहावःगु खः।

येँया क्षेत्र न १ य् १५ हजार मत गणना क्वचाःगु दु।

आः तकया गणना कथं कांग्रेस व राप्रपा दथुइ जम्मा २१ मतया फरक जुगु दु।

कांग्रेसया प्रकाशमान सिंहं ३८५० मत काये धुकुगु दु सा राप्रपाया रवीन्द्र मिश्रं ३८७१ मत हःगु दु।

अथेहे नेकपा एमालेया उम्मेदवार किरण पौडेलं २२३१ मत काःगु दु।

इलाम क्षेत्र नम्बर १ य् नेकपा एमालेया महेश बस्नेत न्ह्यने लाना च्वंगु दु।

४ हजार मतगणना जुइ धुकुलि बस्नेतं १ हजार २५८ मत हःगु दु। अथेहे नेकपा एकीकृत समाजवादीया झलनाथ खनालं १ हजार ४१ मत काःगु दु।

खनाल सत्ता गठबन्धनया उम्मेदवार खः।

येँया निर्वाचन क्षेत्र नम्बर ९ य् नेकपा एमाले व राष्ट्रिय स्वतन्त्र पार्टी दुथुइ प्रतिस्पर्धा जुयाच्वंगु दु।

उगु क्षेत्रय् नेकपा एमालेया कृष्णगोपाल श्रेष्ठं १ हजार ७४९ मत हया न्ह्यने लानाच्वंगु दु।

अथेहे राष्ट्रिय स्वतन्त्र पार्टीया टेकबहादुर पोखरेल १ हजार ६७३ मत हःगु दु सा सत्ता गठबन्धनया उम्मेदवार नेकपा माओवादी केन्द्रया कल्पना धमला ९१६ व राप्रपाया देवेन्द्र प्रधान ३५१ मत हःगु दु ।