शेयर बजाः थौं बिहीवाः न घटे जूगु दु। शेयर बजार परिसूचक नेप्से थौं १९ दशमलव शून्य ६ अङ्कं घटे जूया २ हजार ३७ दशमलव ८३ विन्दुइ कुहावंगु दु।

थौं दक्को समूहया शेयर घटे जूसा उत्पादन, बीमा, फाइनान्स व माइक्रोफाइनान्स समूहया शेयर तसकं थहावंगु दु। २२३ कम्पनीया ६२ लाख ९८ हजार कित्ता शेयर १ अर्ब ७६ करोड १० लाख रुपैयाँया कारोबार जूगु दु।

दकलय् अप्पो शिवम् सिमेन्ट्सया ७ करोड २७ लाख रुपैयाँया शेयर किनबेच जूगु खः। थौं युनिलिभर नेपालया शेयर ८ प्रतिशत स्वया अप्पो व बुद्धभूमि नेपाल हाइड्रोया शेयर साढे ७ प्रतिशतं घटे जुगु खः समग्र बजाः कुहावंसा हिमालयन हाइड्रोपावर व अपर हेवा खोला जलविद्युतया शेयर १० प्रतिशतं थहावंगु दु।

फोहोर व्यवस्थापन बालक्क मयाउगु धासे थौं च्वंगु कार्यपालिकाया बैठकय् वडाध्यक्षपिन्स येँ महानगगरपालिकाया मेयर बालेन्द्र (बालेन) साह याउगु आलोचना जूगु दु।

थौं च्वंगु नगर कार्यपालिकाया बैठकय् वडाध्यक्षपिन्स मेयर बालेन याकचा वने स्वंगु, सहकार्य मयाउगु, फोहोर व्यवस्थापन सम्बन्धी ज्याया बारे जानकारी मबिउगु धका आलोचना याउगु खः।

थौं बिहीबारया कार्यपालिका बैठकय् कार्यपालिका सदस्यपिन्स फोहोरया विषय जक छलफल जूगु खः। वडा नम्बर १० या अध्यक्ष रामकुमार केसीं मेयर याकचा जक वना समस्या समाधान जुइ मखु धका धाउगु खः।

‘मेयर साब मन्त्रालय वनिइ, सिसडोल वनिइ, गन गन वना फोहोर सम्बन्धी खँ ल्हानाच्वंगु दु’ वयकलं धाउगु दु, ‘उगु ज्या यायेत थःगु टिमयात कया गुवलय् वनगु दु? जिमित जक मखु, फोहोर मैलाया टिमयात न्यना न मस्यू।’ मेयर असफल जुलकि धइगु महानगरपालिकाया जनप्रतिनिधिपि हे असफल जुइ धका धयादीसे स्वतन्त्र निर्वाचित जूसा थःपि मेयरनापं दु धका केसीं धाउगु दु।

निर्वाचित ७० दिं दुसा फोहोर व्यवस्थापन याये फयाच्वंगु मदुनि।

येँ महानगरपालिकाय् ईन्जिनियर, डाक्टर व नर्स तयेगु तयारी याउगु दु।

महानगरं ३२ म्ह ईन्जिनियर, २५ म्ह डाक्टर व २५ म्ह नर्स करारय् तयेगु तयारी याउगु दु धका छम्ह कार्यपालिका सदस्यं धाउगु दु।

थौंया कार्यपालिका बैठकय् उगु एजेण्डा पास यायेत मेयर बालेनं तयारी दुगु तर फोहोरया एजेण्डाय् जक छलफल यायेगु धका कार्यपालिका सदस्यपिन्स सः तयेवं करारय् कर्मचारी तयेगु ऐजेण्डा रोके जूगु दु।

थौं कार्यपालिकाय् १३ गु एजेण्डामध्ये फोहोर व्यवस्थापनया ऐजेण्डाय् जक छलफल जूगु खः।

प्रमुख प्रतिपक्ष दल नेकपा एमाले न प्रतिनिधि सभा व प्रदेश सभा निर्वाचन तयारी नाप सञ्चालनया लागि केन्द्रीय निर्वाचन परिचालन कमिटी गठन याउगु दु।

केन्द्रीय कार्यालय च्यासलय् थौं बिहीवाः च्वंगु सचिवालयया बैठकं अध्यक्ष केपी शर्मा ओलीया संयोजकत्वय् केन्द्रीय निर्वाचन परिचालन कमिटी गठन याउगु खः।

परिचालन कमिटीइ केन्द्रीय कमिटीया दक्को सदस्य नाप केन्द्रीय निकाय व आयोगया पदाधिकारी, जनसङ्गठनया अध्यक्ष व महासचिव नाप पार्टीया प्रदेश कमिटी अध्यक्ष, केन्द्रीय विभागया सचिव दइगु कथं गठन जुगु धका प्रचार विभाग प्रमुख पृथ्वीसुब्बा गुरुङं जानकारी बिउगु दु।

बैठकं भदाया ७ गते स्थायी कमिटी, ९ गते पोलिटब्युरो व ११ गते केन्द्रीय समितिया बैठक सःत्येगु निर्णय जूगु दु।

सत्ता गठबन्धनं सिट बाँडफाँटया लागि दयकूगु कार्यदलया थौं बिहीवाः च्वंगु बैठकं छु न निष्कर्ष पिहा मवःगु दु।

प्रधानमन्त्री निवास बालुवाटारय् च्वंगु बैठकय् नेकपा माओवादी केन्द्र, नेकपा एकीकृत समाजवादी व जनता समाजवादी पार्टी न २०७४ सालया लिच्वःया आधारय् सिट भागबन्डा यायेमाः धका धाउगु खः।

तर नेपाली कांग्रेसं धाःसा पालिका चुनावया लोकप्रिय मतया आधारय् सिट बाँडफाँट यायेमाःगु अडान कायेवं बैठक निष्कर्षय् थ्यकेमफुगु खः। थौंया बैठकय् सिट बाँडफाँटया मोडालिटीइ छलफल व सैद्धान्तिक रूपं सहमति जूग्ु खः।

चुनावय् तालमेलया लागि सिट बाँँडफाँटयात टुङ्गे यायेत सत्ता गठबन्धनं ११ म्ह सदस्यीय कार्यदल दयकूगु खः।