राष्ट्रपति विद्यादेवी भण्डारीं थौं बुधबाः मदन भण्डारी विज्ञान नाप प्रविधि विश्वविद्यालय सम्बन्धय् व्यवस्था यायेगु निति दयकूगु विधेयक प्रमाणीकरण यानादीगु दु।

संघीय संसदया निगु हे सदनया बैठकं पारित जुगु प्रमाणीकरणया लागि पेस जुगु विधेयक संविधानया धारा ११३ या उपधारा (२) बमोजिम प्रमाणीकरण याउगु दु धका राष्ट्रपतिया कार्यालयं धाउगु दु।

सप्तकोसी ३४ दँ लिपा पुंलागु हे धारय् लिहावया उदयपुर व सप्तरीया बस्ती प्रभावित जुगु दु।

सप्तकोसीं कटान यायेवं उदयपुरया बेलका, सप्तरीया सप्तकोसी व कञ्चनरूप नगरपालिकाया छु बस्ती प्रभावित जुगु दु। आः गन कोसीइ खुँसिइ बाः वःगु दु।

२०४५ साल स्वया न्ह्यः अनहे कोसी खुँसिइ बाः वयेगु याइ। २०४५ सालया भुखाय् ब्बय् धुका कोसीं विस्तारं धार हिला पूर्वपाखे वःगु खः। कोसी पूर्वय् लिहावयेवं अन २०५१ साल लिपा बस्ती बढे जुगु खः।

आः कोसीं धार हिला पुलागु हे थासय् वयेवं उगु बस्ती प्रभावित जुगु खः। बेलका नगरपालिका वडा नम्बर ३ या अध्यक्ष कथं वडा नम्बर १, २, ३, ४, ८ व ९ या बस्ती खुँसि बाः वया प्रभावित जुया करिब २० हजार मनू प्रभावित जुगु धका धाउगु दु।

अभियान लघुवित्त वित्तीय संस्था लिमिटेडं थौनिसे प्राथमिक सेयर (आईपीओ) निष्कासन सुरु याउगु दु।

लघुवित्तं प्रतिसेयर १०० रुपैयाँ अंकित ९ करोड ७५ लाख रुपैयाँ बराबरया ९ लाख ७५ हजार कित्ता आईपीओ निष्कासन बिक्री खुल्ला याइगु जुगु दु। लघुवित्तं निष्कासन याउगु ९ लाख ७५ हजार कित्ता सेयरमध्ये ०.५ प्रतिशत अर्थात् १२ हजार ५०० कित्ता कर्मचारीपिनिगु लागि व ५ प्रतिशत अर्थात् ४८ हजार ७५० कित्ता सामूहिक लगानी कोषयात सुरक्षित यायेत्यःगु खः।

ल्यः दुगु ९ लाख १३ हजार ७५० कित्ता सेयरया लागि सर्वसाधारणपिन्स आवेदन बिइ फइ। आईपीआ साउन २२ गते तक आवेदन बिइ फइ। उगु इलय् न माग जुगु कथं आवेदन मवःसो भदौ १ गते तक आवेदन बिइगु ई थप जुइ धका प्रबन्धक मुक्तिनाथ क्यापिटलं जानकारी बिउगु दु। लगानीकर्तापिन्स न्यूनतम १० निसे ३ हजार कित्ता तक या लागि आवेदन बिइ फइ।

आवेदकपिन्स सी–आस्बा सदस्य बैंक व वित्तीय संस्था व मेरोसेयर वेबसाइट नाप एपपाखे आवेदन बिइ फइ।

यल महानगरपालिकाय् साउन १० गते निसे नख्खु–एकान्तकुनाय् लागू जुगु कथं ’वान वे’ (छखें जक वनेगु) प्रहरीं हटे याउगु विषययात कया मेयर चिरीबाबु महर्जन व प्रहरी महानिरीक्षक धिरजप्रताप सिंह दथुइ फोनय् ल्वापु जुगु दु।

प्रहरीं छापामार शैलीइ नख्खु–एकान्तकुनाय् वान वे हटे याना यल महानगरपालिकाया मेयर महर्जनं ‘वान वे’ यासे निर्खेर वनेगु गाडी सञ्चालनय् रोक लगे याउगु दु। ‘वान वे जुगुलि ट्राफिक व्यवस्थापन उपलब्धिमूलक जुयाच्वंगु खः, आईजीपी तःपिक बिउगु निर्देशनय् महानगरं तया तःगु बोर्ड हटे याना निर्खेर वनेगु याउगु खः,’ महानगरया मेयर महर्जनं धाउगु दु, ‘आईजीपी सिंह व जिगु फोनय् खँ जुगु दु।’ स्थानीय सरकारं याउगु निर्णययात प्रहरीं हस्तक्षेप याउगु धका मेयर महर्जनं द्धपः बिउगु खः।

थौं मंगलबाः सुथय् १० बजे प्रहरीं थःगु कार्यक्षेत्रय् महानगरं हस्तक्षेप याउगु धाःसे नख्खु व एकान्तकुनाय् महानगरं दयकूगु वान वे हटे याउगु खः। नेपाल प्रहरीया आईजीपी धीरजप्रताप सिंहया हे निर्देशनय् प्रहरीं उगु थासय् ‘वान वे’ हटे याउगु धका महर्जन धाउगु खः।

‘वान वे’ लागू यायेगु न्ह्यः महानगरं स्वनिगलय् ट्राफिक प्रहरी कार्यालय, जिल्ला प्रहरी परिसर यल, ट्राफिक प्रहरी कार्यालय सातदोबाटो, प्रहरी प्रभाग सानेपा, ट्राफिक प्रहरी वृत्त जावलाखेल, यल महानगरपालिका वडा नम्बर ४ व नगर प्रहरी बल यलय् पत्राचार याउगु खः।

वंगु २४ घण्टाया दुने स्वनिगः दुने ३१३ म्हेसित कोभिड १९ संक्रमित थपे जुगु दु।

थौं येँ जक २५३ म्हेसित कोराना सक्रमित जुगु दु। अथेहे ख्वपय् २४ म्ह व यलय् २६ म्हेसित कोरोना संक्रमितपि थपे जुगु दु।

थ्व नाप आः स्वनिगलय् सक्रिय संक्रमितपि ३ हजार ५९८ म्ह थ्यःगु दु।