शताब्दी पुरूष सत्यमोहन जोशीयात राष्ट्रिय सम्माननाप अन्तिम बिदाइ याःगु दु ।

मदुम्ह जोशीयात सरकारं थौं आइतवाः राष्ट्रिय सम्मानसहित नेपाल प्रहरीया छगू टुकडीइ शोक सलामी बिया अन्तिम बिदाई याःगु खः ।

यल महानगरपालिकाय् जोशीया पार्थिव म्ह्यय् प्रधानमन्त्री शेरबहादुर देउवां राष्ट्रिय ध्वाये फायेका अन्तिम श्रद्धाञ्जली ब्यूगु खः ।

महानगर परिसरय् जोशीयात मन्त्री, राजनीतिक दलया शीर्ष नेता, नेवाः न्ह्यलुवाः, कलाकार व सर्वसाधारणपिन्स अन्तिम श्रद्धाञ्जली देछागु खः।

प्रधानमन्त्री शेरबहादुर देउवां वाङ्मय शताब्दी पुरुष सत्यमोहन  जोशी मदुगुलि बिचाः हायकूगु दु।

प्रधानन्त्री देउवां सामाजिक सञ्जालपाखे जोशी मदुगु बुखँ न्यना थःत तसकं दुःख लगे जुगु धका धासे वयकया आत्मां चीर शान्तिया कामनायासे शोकसन्तप्त परिवारपिन्त बिचाः हायकूगु दु।

प्रधानमन्त्री देउवां जोशी न नेपाली संस्कृति क्षेत्रय् यागु योगदानयात राज्यं न्ह्यावलय् न लुमकिइ धका उल्लेख याःगु दु।

नेकपा एमालेया अध्यक्ष केपी शर्मा ओलीं शताब्दी पुरुष सत्यमोहन जोशी मदुगुलि थःत दुःखी जूगु दु धका धाःगु दु।

सामाजिक सञ्जालय् ट्विट यासे वयकलं जोशीया मदुगुलि वंगु शताब्दीनाप थौंया पुस्ता न जीवन्त साक्षात्कार यायेगु अवसर गुमे यायेमाःगु दु धका धाःगु दु।

वयकलं जोशीया छेँजःपिन्त बिचाः हायकूगु दु।

राष्ट्रपति विद्यादेवी भण्डारीं वाङ्गमय शताब्दी पुरुष सत्यमोहन जोशी मदुगुलि देशं छम्ह अभिभावक गुमे यायेमाःगु दु धका धयादीगु दु।

राष्ट्रपति भण्डारीं थःगु सामाजिक सञ्जालं जोशीप्रति बिचाः हायकादीसे देशया अथक श्रष्टा नाप अभिभावक गुमृ यायेमःगु दु धका धयादीगु खः।

वयकलं सत्यमोहन जोशीया सार्थक जीवन झीगु सकसिगु लागि प्रेरणाया स्रोत जुगु धका उल्लेख यानादीगु दु। संस्कृतिविद् सत्यमोहन जोशी १ सय ३ दँय् थौं मदुगु खः।

शताब्दी पुरुष सत्यमोहन जोशी १०३ दँय् मन्त। यलया ग्वार्कोय् किष्ट मेडिकल कलेजय् वासः याना वयाच्वम्ह जोशी थौं सुथय् ७ बजे जुया ९ मिनेटय् मदुगु खः।

जोशीया छातीइ निमोनिया सङ्क्रमण खनेदुगु खः। निमोनिया व मुटु ल्वय् नाप डेगू सङ्क्रमण खनेदुगुलि वयकः २४ दिंनिसे वासः याका वयाच्वंगु खः।

वयकःयात २०७९ या संविधान दिवसया लसताय् सरकारं ‘राष्ट्र गौरव’पाखे मानपदवी प्रदान यायेगु निर्णय तक याःगु खः।