देयन्यक अस्पतालय् अत्यावश्यक सेवा बन्द याना आन्दोलन यानाच्वंगु नेपाल चिकित्सक सङ्घ व सरकार दथुइ वार्ता सुरु जूगु दु।

प्रधानमन्त्री कार्यालय सिंहदरबारय् सरकारया प्रतिनिधि व चिकित्सक सङ्घया प्रतिनिधि दथुइ वार्ता जूयाच्वंगु दु धका प्रधानमन्त्रीया सचिवालयं धाःगु दु।

चिकित्सक सङ्घं स्वास्थ्यकःमिपिनिगु सुरक्षाया ग्यारेन्टीया माग याःगु दु। वंगु शुक्रवाः राष्ट्रपति विद्यादेवी भण्डारीं सवारीय झ्वलय् सुरक्षाया निति खटे जूपि प्रहरीं लाठी चार्ज याना राष्ट्रिय ट्रमा सेन्टरया वरिष्ठ अर्थोपेडिक सर्जन डा.जनिथलाल सिंहलगायत स्वास्थ्यकःमि घाःपाः जुगु खः।

थुगु हे घटनाया विरोध यायेगु निति चिकित्सक सङ्घं विरोध याना थौं आन्दोलन याःगु खः।

प्रतिनिधि सभाया बैठक थौं च्वनिइगु जुगु दु। न्हिनसिया ३ बजे संसद् भवन न्हुगु बानेश्वरय् च्वनेत्यःगु दु। उगु बैठकय् स्वगु कार्यसूची तयातःगु दु।

संघीय संसद सचिवालयं सार्वजनिक याःगु सम्भावित कार्यसूचीइ प्रधानमन्त्री पुष्पकमल दाहाल प्रचण्डं थारु आयोगया प्यक्वःगु वार्षिक प्रतिवेदन पेस याइगु, उपप्रधान नाप अर्थमन्त्री विष्णु पौडेलं आ.व. २०७९÷८० या बजेटय् अर्धवार्षिक मूल्यांकन प्रतिवेदनया सम्बन्धय् वक्तव्य बिइगु व सभामुख देवराज घिमिरें नेपाली कांग्रेसया सांसद कर्मा घले मदुगुलि शोक प्रस्ताव प्रस्तुत याइगु उल्लेख दु ।

घलेया उपचार यायेगु झ्वलय् थ्व हे माघ २४ गते त्रिवि शिक्षण अस्पताल महाराजगञ्जय् मदुगु खः।

सरकार सन्चालन यायेत सुझाव बिइत गठन यानातःगु उच्चस्तरीय राजनीतिक संयन्त्रया बैठक सुरु जूगु दु।

प्रधानमन्त्री निवास बालुवाटारय् जारी बैठक प्रधानमन्त्री पुष्पकमल दाहाल प्रचण्ड, उच्चस्तरीय राजनीतिक संयन्त्रया संयोजक केपी शर्मा ओली, रास्वपाया सभापति रवि लामिछाने, राप्रपाया अध्यक्ष राजेन्द्र लिङदेन सहभागी जुयाच्वंगु दु।

बैठकय् रास्वपा सरकारं पिहावने वं राजनीतिक अवस्था, आः जुइत्यःगु राष्ट्रपति निर्वाचनया उम्मेदवार लगायतया विषय छलफल जुइत्यःगु दु धका प्रधानमन्त्रीको सचिवालयं धाःगु दु।

नेवाः पत्रकार राष्ट्रिय दबू काभ्रे कचाः न प्यक्वःगु महाधिबेसनपाखे निर्वाचित जूपि न्हुगु ज्यासना पुचःयात भिंतुना देछायेगु ज्याः जुगु दु।

काभ्रे बहुमुखी क्याम्पसय् छगु ज्याझ्वः दथुइ न्हुगु ज्यासना पुचःयात भिंतुना देछागु खः। उगु ज्याझ्वःया मूपाहाँ काभ्रे बहुमुखी क्याम्पसया अध्यक्ष लामेदर कायस्थं न्हुगु ज्यासना पुचःयात हनापौं काभ्रे कचाःया नायः सोमकाजी शाक्यं स्वामां क्वखायेका हने ज्या याःगु खः।

ज्याझ्वलय् दबूया केन्दिय नायः नृपेन्द्रलाल श्रेष्ठं पत्रकार दबूया न्हापागु पुर्ण बैठकं दबूया कार्य योजना कनादीगु खः। धर्मादित्य धर्माचार्यं पत्रकारिता शुरु याःगु ने स १०४५ बुद्ध धर्मयात कया मातृभाष शताब्दी दिवस हनेगु जुइ धका धयादीगु खः।

राष्ट्रपति विद्यादेवी भण्डारीं अर्थतन्त्रयात सुदृढीकरण यायेगु निति गम्भीर पलाः न्ह्याकेमाः धका धयदीगु दु।

शुक्रबाः संघीय संसदय् मंकाः बैठकय् सम्बोधन यानादीसे राष्ट्रपति भण्डारीं आर्थिक अवस्था जटिल मोडय् अर्थतन्त्रया सूचक सुधारया संकेत खनेदुसा थकिइ दिगोपनाय् आस्वस्त जुइ फुगु अवस्था मदु धका धयादीगु दु।

मौद्रिक तरलताया समस्या, लगानीउा लागि माःगु स्रोतया अभाव व बाह्य कारणया तक उत्पादन क्षेत्र मजबुत जुइ फुगु मदु धका धयादीगु खः।

अर्थतन्त्रय् गुलि न समस्या थहाः क्वहाः जूगु विश्व अर्थतन्त्र, कोभिड महामारीया कारणपाखे वःगु खः धका धयादीसे राष्ट्रपति भण्डारीं न्ह्यने धयादीगु दु, ‘अय्न थुगु कारण क्यना लिचिलेगु सुविधा झीकेमदु।’

वयकलं अर्थतन्त्रय् प्रभाव याइगु आन्तरिक बाह्य कारणया समग्र अध्ययन याना सरकारया वृत्त नीतिइ संरचनागत सुधार यायेमाः धका धयादीगु खः।