मधेशी एकता समाजं येँय् मधेशय् शिक्षा धइगु विषयस अन्तरक्रिया ज्याझ्वः याःगु खः।

ज्याझ्वलय् प्राध्यापक प्रमोद मिश्र, शिक्षाविद् विनय कुसियैत, अधिवक्ता मोहना अन्सारी, अनुसन्धानकर्ता डा. सोहन साह, अधिकारकर्मी रामसुफल सदाय, दलित अभियन्ता संजय पासी व च्वमि लेखिका रीता साहं न्ववानादीगु खः ।

वक्तातय्सं जनक, बुद्ध व गार्गीया भूमि धकाः म्हस्यूगु तराई मधेश शिक्षाय् ल्यूने लानावंगु चिन्ताया विषय जूगु बिचाः तयादिल। शिक्षाया अवस्था चिन्ताजनक जूगुलिइ राज्य व समाज निम्हं दोषी जूगु वय्कःपिनिगु धापू खः।

प्रोफेसर प्रमोद मिश्रं मधेशय् शिक्षाया अवस्था सहर स्वयां ग्रामीण भेगय् भयावह जूगु धयादिल। वय्कलं कथित क्वय्या जाति अर्थात् दलित समुदायया बसोवास दुगु थासय् शिक्षाया अवस्था झन हे खराब जूगु न्ह्यथनादिल।

मानन्धर ल्याय्म्ह पुचःया ‘रजत जयन्ती समारोह’ थिमिइ क्वचाःगु दु।

‘थःगु धर्म तजिलजियात न्ह्याबलें थकाय्’ धइगु मूल नारा बियाः स्थापना याःगु थिमि चोडे त्वाःया मानन्धर ल्याय्म्ह पुचलं ज्याझ्वलय् लोपोन्मुख नौ बाजाया ब्वज्या याःगु खः। पुचःया २५दँ पूवंगु लसताय् जूगु ज्याझ्वलय् मध्यपुर थिमि नगर प्रमुख सुरेन्द्र श्रेष्ठं लोप जुइत्यंगु मौलिक सम्पदा व तजिलजि ल्यंकेगु अभियानय् स्थानिय सरकारया ग्वहालि दयाच्वनीगु प्रतिबद्वता वय्कलं प्वंकादिल।

अथे हे, नगरपालिका उप प्रमुख विजयकृष्ण श्रेष्ठं छगू हे तालय् नौ बाजाया न्ह्यब्वया स्वयाः मन आनन्दित जूगु धयादिल। समारोहस मध्यपुर थिमि वडा नं ५ या वडाध्यक्ष बालकृष्ण श्रेष्ठ, भक्तपुर उद्योग वाणिय संघया नायः शिव प्रसाद मानन्धर, भक्तपुर इलेक्ट्रोनिक्स व्यवसायी संघया नायः गंगाराम मानन्धर, भक्तपुर चेम्बर अफ कमर्सया नायः न्हुच्छेरत्न मानन्धर, नेपाल ज्ञानमाला समिति, भक्तपुर क्षेत्रीय उपसमितिया कजि पुण्यरत्न शाक्यं भिंतुना ब्युसें थःथःगु खँ तयादीगु खः।

पुचःया छ्यान्जे पूर्णकुमार मानन्धरं लसकुस यानादीगु ज्याझ्वः रत्नप्रसाद मानन्धरया सभापतित्वय् क्वचाःगु खः। औपचारिक ज्याझ्वः धुंकाः सांस्कृतिक ज्याझ्वलय् विवेक मानन्धर नेतृत्वया झीगु नेवाः पुचःया सांगीतिक न्ह्यब्वया, किशोरीतय् हुलाप्याखं व म्ये नं न्ह्यब्वःगु खः। सांगितिक ज्याझ्वलय् चण्डिका घजु, रञ्जना सितिखु, बाबुकाजी मानन्धर, चनेलाल मानन्धरलिसें नं म्ये हालादीगु खः।

मन्दाकिनी हाइड्रोपावर लिमिटेडया आईपीओ थौं (साउन १७ गते) बाँडफाँड जुत्यःगु दु।

बिक्री प्रबन्धक बीओके क्यापिटल मार्केट लिमिटेडया कार्यालय येँया नारायणचौरय् न्हिनसिया ४ बजे आईपीओ बाँडफाँड जुइ धका धाउगु दु।

कम्पनीं थ्व वःगु साउन ९ गतेनिसे सर्वसाधारणया लागि १०० रुपैयाँया दरं ११ करोड ७६ लाख ७ हजार ३०० रुपैयाँ बराबरया ११ लाख ७६ हजार ७३ कित्ता आईपीओ निष्कासन याउगु खः।

सीडीएस एन्ड क्लियरिङया कथं उगु आईपीआय् १६.५३ गुणा स्वया अप्पो आवेदन वःगु धका धाउगु खः।

लुँ तोलां थौं निसः थहावंगु दु।

थौं लुँ तोलां निसः थहावना ९५ हजार ६ सय रुपैयाँ न कारोबार जुगु दु धका नेपाल सुनचाँदी व्यवसायी महासङ्घं धाउगु दु।

अथेहे, वहःया भाः धाःसा स्थिर जुया तोलाया १ हजार २ सय २० रुपैयाँ न हे कारोबार जुगु दु धका महासङ्घं धाउगु दु।

प्रदेश १ या मुख्यमन्त्री राजेन्द्रकुमार राईयात कोरोना संक्रमण जुगु दु।

सोमबाः पीसीआर जाँच याउगुलि वयकःयात कोरोना संक्रमण खनेदुगु खः। मुख्यमन्त्री नाप वयकःया परिवारया सदस्यपि, सचिवालय, निवासया सुरक्षाकःमि व कर्मचारी लगायत १६ म्हेसिगु म्हिगः सोमबाः पीसीआर परीक्षण याउगु खः।

पीसीआर परीक्षण याउगुलि मुख्यमन्त्री नाप वयकःया जहान शोभा पाठक व राजनीतिक सल्लाहकार जीवन राईयात न संक्रमण खनेदुगु धका मुख्यमन्त्रीया प्रेस सल्लाहकार बन्धु पोखरेलं धाउगु दु।

मुख्यमन्त्री नाप स्वम्हेसिगु न स्वास्थ्य अवस्था सामान्य दु धका धाउगु दु।