नेपाल प्रेस युनियनय् छम्ह उपाध्यक्ष व स्वम्ह सचिव नाप २० म्ह केन्द्रीय सदस्य निर्विरोध निर्वाचित जुगु दु। समावेशी उपाध्यक्षय् दीपेन्द्र वान्तवा निर्विरोध निर्वाचित जुगु दु।

थारु सचिवय् सहदेव चौधरी, अनलाइन सचिवय् छाँया भण्डारी व टेलिभिजन सचिवय् अशोककुमार तिवारी निर्विरोध निर्वाचित जुगु दु। अथेहे, मिसा सदस्यय् पूजा शर्मा व सिर्जना कुमारी गौतम निर्विरोध निर्वाचित जुगु दु।

खस आर्य मिसा केन्द्रीय सदस्यय् बालिका सिवाकोटी व जेविका कार्की, थारुपाखे लक्ष्मीमान थारु, थारु मिसा सदस्यय् अञ्जना थारु, मधेशी मिसाय् सुधा देव न निर्विरोध जुगु दु। आदिवासी जनजातिपाखे छविलाल माल, निमा लामा व सुवासकुमार सुनुवार, आदिवासी मिसापाखे रीता मगर, दलित मिसापाखे फूलमाया सुनार, लैंगिक अल्पसंख्यकय् नारद कोहार, अपाङ्गता कोटाय् कौरव खत्री निर्वाचित जुगु दु।

बागमती प्रदेश मिसापाखे आत्मा गुरागाईं व रमा लुइटेल, गण्डकीपाखे कृष्णकुमारी ढकाल व मायाकुमारी अधिकारी, सुदूरपश्चिमपाखे जमुना न्यूरे व निर्मला भट्ट, स्वनिगःपाखे तेजना पण्डित निर्विरोध जुगु दु।

अध्यक्षनाप मेगु पदया लागि थौं मतदान जुइत्यःगु दु। अध्यक्षया लागि अनिता विन्दु, शिव लम्साल व भुवन भट्ट दथुइ प्रतिस्पर्धा जुइत्यःगु दु। वरिष्ठ उपाध्यक्षय् प्रेम केसी व सरोज अधिकारी व महासचिवय् जगन्नाथ दुलाल व दिलीप पौडेलपिन्स उम्मेदवारी बिउगु खः।

पुष्पलाल श्रेष्ठया ४४ क्वःगु स्मृति दिवसया लसताय् येँया पुष्पलाल पार्कय् जुगु छगु ज्याझ्वः दथुइ जसपा पार्टी त्वःता २० म्ह एमाले प्रवेश याउगु दु।

जसपा पार्टी त्वःता मनरत्न शाक्य, केशव महर्जन लगायतपिन्त एमालेया अध्यक्ष केपि शर्मा ओली छगु ज्याझ्वः दथुइ लसकुस यानादीगु खः।

नेकपा (एमाले)का अध्यक्ष केपी शर्मा ओलीं शहीदयात जातीयकरण याये मज्यु धका धाउगु दु।

पुष्पलाल श्रेष्ठया ४४ क्वःगु स्मृति दिवसया लसताय् जुगु ज्याझ्वलय् न्ववानादीसे अध्यक्ष ओलीं अथे धयादीगु खः।

‘जि इतिहासकारपिन्त इनाप याये। शहीद जातीय विषय मखु राष्ट्रिय आन्दोलनया विषय खः। जातीय शहीद दयकेमते। जातयात मखु राष्ट्रया सहिद जुइ’ वयकलं धयादीगु दु, ‘सु यात स्यात वहे न्हापाम्ह शहीद खः।

ह्यूपाःया लागि बलिदान यायेगु इलय् न्ह्यागु न पार्टी जूसा वयालिपा राष्ट्रिय शहीद जुइ धका धयादीगु खः। नाप अध्यक्ष ओलीं पुष्पलालं नेपाःयात तानाशाहपाखे मुक्त याउगु जुगुलि राजनीतिक चेतनानाप अन्धविश्वास हटे याउगु दाबी यानादीगु खः।

वंगु २४ घण्टाया दुने देयन्यक ४५६ म्हेसित कोरोना भाइरस संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं ३ हजार ८३८ म्हेसित परीक्षण याउगुलि ४५६ म्हेसित कोराना संक्रमण पुष्टि जुगु खः।

२ हजार १६८ पीसीआर परीक्षणय् ३८४ व १ हजार ६७० म्हेसित एन्टिजेन परीक्षणय् ७२ म्ह संक्रमण पुष्टि जुगु दु धका मन्त्रालयं धाउगु दु।

वंगु २४ घण्टाय् ८० म्ह कोरोना भइरस संक्रमणमुक्त जुगु दु। देयन्यक कोरोना भाइरस सक्रिय संक्रमितपि २ हजार ८४१ म्ह दु।

विदेश वनिपि नेपाःपिन्स विदेशी मुद्रा हिलेत बैंक खाता अनिवार्य याउगु दु।

चालु आर्थिक वर्ष २०७९÷८० या लागि नेपाल राष्ट्र बैंकं जारी याउगु मौद्रिक नीतिं अथे व्यवस्था याउगु खः।

नेपाल राष्ट्र बैंकया गभर्नर महाप्रसाद अधिकारीया कथं विप्रेषणयात औपचारिक माध्यमपाखे स्वदेशय् दुकया प्रमाणया आधारय् थी थी सेवा व सुविधा छुट जुइगु व्यवस्थाया लागि तक थुगु दँय् समन्वय याइगु जुगु दु।

विदेशपाखे वइगु विप्रषणया दायरा अप्पोकेत आःया विप्रेषणसम्बन्धी व्यवस्थाय् पुनरावलोकन यायेगु घोषणा तक नेपाल राष्ट्र बैंकं याउगु दु।

सूचना प्रविधि लगायत सेवा निर्यात याना परिवत्र्य विदेशी मुद्रा दुकायेगु ज्याय् प्रोत्साहन यायेत माःगु नीतिगत व्यवस्था यायेगु नेपाल राष्ट्र बैंकं मौद्रिक नीतिपाखे घोषणा याउगु दु।