नेपाली कांग्रेस निकट पत्रकारपिनिगु संस्था नेपाल प्रेस युनियनया गुक्वःगु महाधिवेशन थौं मकवानपुरया हेटौंडाय् सुरु जुइत्यःगु दु।

महाधिवेशनया उलेज्या प्रधानमन्त्री नाप नेपाली कांग्रेसया सभापति शेरबहादुर देउवा याइगु ज्याझ्वः दु। करिव च्यादँ लिपा जुइ त्यःगु प्रेस युनियनया महाधिवेशनं न्हुगु नेतृत्व ल्यइगु ज्याझ्वः दु।

अध्यक्ष पदय् संस्थापन पक्ष व इतर पक्ष प्यानल ज्वना प्रतिस्पर्धाय् कुहावःगु दु। अध्यक्ष पदय् संस्थापन पक्षपाखे अनिता विन्दु व इतर पक्षपाखे शिव लम्साल प्यानल ज्वना प्रतिस्पर्धाय् कुहावंगु दु।

नेपाल राष्ट्र बैंकं थौं मौद्रिक नीति सार्वजनिक याइगु जुगु दु।

न्हिनसिया ४ बजे पत्रकार सम्मेलन यासे मौद्रिक नीति सार्वजनिक याइ धका राष्ट्र बैंकया प्रवक्ता गुणाकर भट्टं जानकारी बिउगु दु।

व स्वया न्ह्यः थौं सुथय् राष्ट्र बैंक सञ्चालक समितिया बैठक सःतूगु दु। बैठकं मौद्रिक नीति पारित याइ। उगु मौद्रिक नीति न्हिनय् सार्वजनिक याइ।

मौद्रिक नीतिबारे गभर्नर महाप्रसाद अधिकारीं बिहीबाः बहनि अर्थ मन्त्रालया जिम्मेवारी सम्हाले यानादीम्ह प्रधानमन्त्री शेरबहादुर देउवायात ब्रिफिङ याये धुकुगु दु।

व स्वया न्ह्यः वयकलं अर्थ सचिव, राष्ट्रिय योजना आयोगया अध्यक्ष लगायतपिन्त न जानकारी बिइ धुकुगु दु।

यल महानगरपालिकाय् छेँ छेँय् नम्बर प्लेट तःगु बापत द्धःछि शुल्क काइगु जूगु दु।

यल महानगरं थःगु लागा दुनेया छेँ याउगु लागत सङ्कलन व पहिचान यायेगु धासें नम्बर प्लेट तिकाच्वंगु दु।

यल महानगरं छगु सूचं पिकयाः नम्बर प्लेट तःगु बापत द्वःछि तका शुल्क कायेगु धका धाउगु दुु। छेँ नम्बर प्लेटया ध्यबाः मपुसाः सम्पत्ति कर नं कायेगु सङ्केत महानगरं याःगु दु।

आः महानगरय् छेँ थुवाःपिन्स सम्पत्ति कर पुलिगु इलय् द्वःछि तका नम्बर प्लेट बापत न पुलेमाः धका छगु सुचं जारी याउगु खः।

छु दिं लगातार कथं सामान्य थहावना च्वंगु शेयर बजाः थौं धासा घटे जुगु दु।

शेयर बजाः परिसूचक नेप्से थौं बिहीवाः ५ दशमलव ८७ अङ्कं घटे जुया २ हजार ४४ दशमलव ७२ विन्दुइ कुहावंगु दु।

थौं बैंकिङ व मेमेगु समूहया शेयर सामान्य थहावंगु दु सा मेगु दक्को समूहया शेयर घटे जुगु दु। २२५ गु कम्पनीया ३९ लाख ८ हजार कित्ता शेयर १ अर्ब ६४ करोड २६ लाख रुपैयाँया कारोबार जुगु दु।

दकलय् अप्पो शिवम् सिमेन्टया १७ करोड रुपैयाँ शेयर किनबेच जुगु खः। थौं किसान लघुवित्तया शेयर झन्डै साढे ५ प्रतिशतं घटे जुगु दु। समग्रमा बजार घटे जूसा सेन्ट्रल फाइनान्सया शेयर धाःसा ३ प्रतिशतं थहावंगु दु।

ओमिक्रोन भेरियन्टया उपप्रजाति बीएफ.वान नेपालय् न खनेदुगु दु।

धुलिखेल अस्पतालया मोलिक्युलर एन्ड जिनोमिक सिक्वेन्सिङ रिसर्च ल्याबय् परीक्षण याउगुलि ओमिक्रोनया न्हुगु उपप्रजाति ‘बीएफ.वान’ पुष्टि जुगु दु।

कोरोना संक्रमण पुष्टि जुगु २२ गु नुमनायात आनुवंशिक परीक्षण (जिन सिक्वेन्सिङ) पाखे स्वगुलि थीथी उपप्रजाति खनेदुगु खः। थुगु प्रजातियात विश्व स्वास्थ्य संगठनं ‘भेरियन्ट अफ कन्सर्न’ घोषणा याउगु खः।

थ्व गुलि ग्यानापुसे च्वः धका धासा अध्ययन जुयाच्वंगु दु। विश्व स्वास्थ्य संगठनं वंगु असारय् ‘बीएफ.वान’ युरोपय् खनेदुगु पुष्टि याये धुकुगु खः। लिपागु निवाः दुने येँया अस्पतालय् भर्ना जूपिन्त कोरोना संक्रमितया निगुगु डोज खोप कायेधुपिन्त न खनेदुगु खः।

स्वास्थ्य तथा जनसंख्या मन्त्रालयया तथ्यांक कथं नेपालय् आः संक्रमणदर १० प्रतिशत स्वया अप्पो जुइ धुकुगु दु। विज्ञया कथं थ्व कोरोनाया प्यंगु लहर खः।