क्षत्रपाटी निःशुल्क चिकित्सालयया ६६ क्वःगु बार्षिकोत्सवया लसताय् संस्थापक कम्पाण्डर बद्री मालीया झ्वाताः छगु ज्याझ्वः दथुइ येँ महानगरपालिका प्रबक्ता नाप १७ या वडा अध्यक्ष नविन मानन्धरं यानादीगु दु। क्षत्रपाटी निःशुल्क चिकित्सालयया अध्यक्ष डा. मनोजमान श्रेष्ठया सभाध्यक्षताय् जुगु उगु ज्याझ्वलय् अस्पतालय् ताः ईनिसे सेवायानाच्वपि कर्मचारीपिन्त सम्मान नाप हनापौं लःल्हागु खः।

क्षत्रपाटी निःशुल्क चिकित्सालय २०१३ साल माघ २३ गते झीतका ध्यवां सुरु जुगु नेपाःया न्हापागु सामुदायिक स्वास्थ्य संस्था खः । तत्कालिन सञ्चार, यातायातमन्त्री गणेश मान सिंहं २०१६ साल माघ २३ गते श्रीपञ्चमीया दिं कुन्हु भवनया सिलान्यास यानादीसे औपचारिक रुपं उलेज्या यानदीगु खः।

बार्षिकोत्सव ज्याझ्वलय् न्ववायेगु झ्वलय् मूपाहाँ येँ महानगरपालिकाया प्रबक्ता नाप १७ वडाया अध्यक्ष मानन्धरं शहरी क्षेत्रय् जनतापिनिगु स्वास्थ्य उपचारय् क्षत्रपाटी निःशुल्क चिकित्सालयया तधःगु भूमिका निर्वाह याःगु दु धका धयादीगु खः।

अस्पतालया अध्यक्ष डा. श्रेष्ठं थःगु प्यदँया कार्यकालय् अस्पतालय् यक्को हे लुमके बहःजु ज्या जुगु दु धका धयादीसे माऊ बद्री भवन तयार जुयाच्वगु नाप मेगु भवन बीर गणेशमान सिंहया नामय् दयकेगु प्रस्ताव न्ह्यने हयागु दु धका धयादीगु दु। प्रविधिमैत्री अत्याधुनिक भेन्टिलेटरनाप न्हुगु अस्पताल दयकाच्वनागु व येँ  महानगरपालिका नाप मेमेगु थास न ग्वाहालि वयाच्वंगु दु धका धयादीसे वयकःपिन्त सुभाय् न देछानादीगु दु।

माऊ बद्री भवन दयकेगु निति तत्कालिन मेयर बिद्यासुन्दर शाक्यया नेतृत्वया कार्यपालिकां ५ करोड ५० लाख बजेत बिनियोजन यानाबीगु खः।

थौं कन्ह्यः निगु अत्याधुनिक भवनय् स्वास्थ्य सेवा बियावयाच्वंगु दु सा न्हुगु अत्याधुनिक माऊ बद्री भवन निर्माण जुयाच्वंगु दु।

अथेहे क्षत्रपाटी निःशुल्क चिकित्सालयया २१ म्ह संस्थापकपि मदुपि बद्रीमान माली, हर्ष बहादुर माली, महाबिर माली, बद्रीमान मानन्धर, हर्ष नारायण महर्जन, तुलसी नारायण मानन्धर, रामहरि कृष्ण मानन्धर, हेमदेव मानन्धर, शम्भूलाल मानन्धर, सुरेन्द्र बहादुर पाँडे, इन्द्रमान मानन्धर, मुकुन्दराज जोशी, मोतिमान श्रेष्ठ, नाती पोडे, हरिहरराज लोहनी, मान बहादुर श्रेष्ठ, बहादुर कृष्ण मानन्धर,  सिद्धिलाल श्रेष्ठ, गणेश प्रसाद रेग्मी व बद्री नारायण मानन्धरया किपातय् स्वां दछायेगु ज्या जुग खः।

पद्मरत्न लुमन्ति गुथिया न्हापांगु तःमुँज्या जुगु दु। नेवाः न्ह्यलुवालिसें मानवअधिकारवादी नेता पद्मरत्न तुलाधरया लमुन्तिइ नीस्वनातःगु गुथिया तःमुँज्यां न्हूगु ज्यासना पुचः नं ल्यःगु खः ।

गुथिया नायः डा. केशवमान शाक्यं उगु ज्याझ्वःया उलेज्या यानादीगु खःसा सुम्निमा तुलाधरं लसकुस यानादीगु खः । तःमुँज्याय् गुथिया छ्याञ्जे नरेशवीर शाक्यं प्रगति विवरण व दांभरिं सुरेश प्रधानं आर्थिक विवरण न्ह्यब्वयादीगु खः ।

तःमुँज्याया झ्वलय् ‘नेपाःया हिउपाः व पद्मरत्न अभियान’ विषयय् सहलह मुँज्या नं याःगु खः । सहलह मुँज्याय् वरिष्ठ साहितयकार तिलकप्रकाश कायस्थ, नेवाः न्ह्यलुवा नरेन्द्रभक्त हाडा व त्रिरत्न शाक्यपिंसं मदुम्ह पद्मरत्न तुलाधरं मानवअधिकारलिसें भाषिक, सांस्कृतिक आन्दोलनया ख्यलय् बियादीगु योगदान व वय्कःया व्यक्तित्वयात कयाः चर्चा यानादीगु खः ।

तःमुँज्यां गुथिया न्हूगु ज्यासना पुचः नं ल्यःगु खः । पुलांगु हे ज्यासना पुचःया निरन्तरता बियाः न्हूगु ज्यासना पुचः ल्यःगु खः ।

ज्यापु महागुथि येँ महानगर समितिं थ्व हे वइगु माघ १५ गते येँ महानगरपालिकाया मेयर बालेन साहया ज्यादति विरुद्ध येँया फिब्व ख्यलय् जुइत्यंगु वृहत् प्रदर्शनय् ब्वति कायेगु लागिं सकसितं इनाप याःगु दु ।

मेयर साहया ज्यादति विरुद्ध आइतवाः न्हिनय् २ बजे प्रदर्शन यायेत्यःगु खः। ज्यापु महागुथि येँ महानगर समितिया ग्वसालय् जूगु भेलां परम्परागत ६३ गू ज्यापु त्वालय् हाकुगु ब्यानर ब्वयेगु निर्णय याःगु दु ।

भेलां हरेक त्वालय् निगू निगू हाकुगु ब्यानर खायेगु धकाः निर्णय याःगु खः । लिसें १५ गतेया वृहत् प्रदर्शनीइ ब्वति कायेगु लागिं नं सकसितं इनाप याःगु दु ।

उगु वृहत सम्मेलनय् ब्वति कायेगु लागिं दरवारमार्ग, बागबजाः, महाबौद्ध आदि लागाया स्थानीय व्यापारीत थःपिनि पसः हे तिनाः वयेगु धकाः तयारी यानाच्वंगु खँ सीदुगु दु ।

उगु प्रदर्शनय् येँ मनपाया लिपांगु ज्याखँपाखें प्रभावित जूपिं स्थानीय समुदाय, व्यापारी व छेँथुवाःतय्सं नं ब्वति कायेगु लागिं तयारी यानाच्वंगु खँ नं सीदुगु दु ।

नेपाल राष्ट्रिय खड्गी समाज येँ जिल्ला समितिया ग्वसालय् न्ह्यः माघ १४ गते शनिवाः वसन्तपुरय् नेवाः हुलाप्याखं धेंधेंबल्लाः कासा–११४३य् अन्तिम प्रतिस्पर्धाय् जुइत्यःगु दु ।

वंगु शनिवाः येँ, यल, ख्वप व किपुलिइ जूगु अडिसनं अन्तिम प्रतिस्पर्धाया निंतिं कासामि छनोट याये धुकुगु दु। खड्गी समाज येँ जिल्ला समितिं बिउगु जानकारीकथं जगतसुन्दर ब्वनेकुथिइ जूगु अडिसनं १० म्ह, यलया आदर्श कन्या निकेतन मा.वि.इ जूगु अडिसनं १०म्ह, ख्वपया मेधा माध्यमिक विद्यालयय् जूगु अडिसनं १२ म्ह व किपूया हिलटाउन उच्च मा.वि.इ जूगु अडिसनं ९ म्ह प्रतियोगी छनोट जूगु खः ।

उगु ज्याझ्वलय् मुक्कं नेपालभाषाया आधुनिक व लोक म्येँय् हुलाप्याखं कासा जूवनाच्वंगु दु । कासाय् ब्वति काइपिंसं नेवाः पहः, नेवाः संस्कृति, नेवाः म्हसीका पिज्वइकथंया जक हलंज्वलं छ्यले दइ ।उगु हुलाप्याखनय् छम्हेसिनं जक ब्वति काये दइगु कासाय् न्हाप, लिउ, लियांलिउ, प्यंगूगु व न्यागूगु थासय् वयेत ताःलाःपिंत ट्रफीसहितत पुरस्कृत यायेगु ग्वसाः खलकं जानकारी बिउगु खः ।

अथे हे उत्कृष्ट भेषभूषा, हाउभाउ, समाः, कोरियोग्राफर व हुलाप्याखनय् न्ह्यब्वइगु हलंज्वलनय् नं पुरस्कृत यायेगु ग्वसाः खलकं धाःगु दु ।

लुँया भाः थौं न्हुगु कीर्तिमान कायम जूगु दु।

नेपाल सुनचाँदी व्यवसायी महासंघया कथं थौं लुँया भाः आःतकया हे दकलय् थिके जुगु दु धका धाःगु दु।

थौं लुँ तोलां १ लाख ६ हजार ९ सय रुपैयाँ न कारोवार जुगु दु धका महासंघं धाःगु दु।

अथेहे वहः तोलां १३ सय ८० रुपैयाँ न कारोवार जुगु दु धका महासंघं धाःगु दु।