बाजुराय् म्हिगः मंगलबाः भुखाय् ब्बगलि छम्ह मिसा सीउगु दु।

जिल्लाया गौमुल गाउँपालिका–२ या जुरेलीइ स्थानीय जंगलय् घाँय् चाय्त वनाच्वम्ह भुखाय् ब्बया ल्ह्वः कुतवया सीउगु दु धका प्रहरीं धाःगु दु।

जिल्ला प्रहरी कार्यालयया प्रमुख प्रहरी नायब उपरीक्षक (डीएसपी) सुर्य थापां भुखाय् ब्बया ल्ह्वः कुतुवया जमुना रोकाया मदुगु धका स्थानीयपिन्स जानकारी बिःगु दु धका धाःगु खः।

डीएसपी थापाया कथं प्रहरी निरीक्षकया टोली उद्दारया लागि घटनास्थलय् परिचालन यानागु दु धका धाःगु दु।

वाग्मती प्रदेशय् थौं मन्त्रिपरिषद् विस्तार यायेगु तयारी याःगु दु। ११ मन्त्रालय कायम याना थौं मन्त्रिपरिषद् विस्तारया तयारी यायेत्यःगु खः।

म्हिगः बहनि च्वंगु मन्त्रिपरिषदया बैठकं आः कायम जूगु १४ गु मन्त्रालययात क्वपालां ११ गु मन्त्रालय दयकेगु निर्णय याःगु खः।

प्रदेशया प्रमुख सचिव मुकुन्दप्रसाद निरौलाया संयोजकत्वय् गठन याःगु न्याम्ह सदस्यीय कार्यदलं मन्त्रालय घटे यायेगु सुझावनाप मुख्यमन्त्री शालिकराम जम्कट्टेलयात प्रतिवेदन लःल्हाःगु खः।

उगु प्रतिवेदनय् वाग्मती प्रदेशय् १४ मन्त्रालययात घटे याना ११ मन्त्रालय दयकेगु उपयुक्त जुएगु सुझाव बिःगु खः।

थौं बहनि दुने मन्त्रिपरिषद् विस्तार यायेगु तयारी यायेत्यःगु दु। मुख्यमन्त्री जम्कट्टेलया अध्यक्षताय् थ्व हे पुस २६ गते स्वम्हेसिगु मन्त्रिपरिषद् गठन याःगु खः।

मंगलबाः न्हिच्छियकं कुहावया च्वंगु सेयर बजाः बन्द जुइ न्ह्यः थहावगु दु। मंगलबाः ८.१४ अंकं थहावना बजाः २१७३.२४ बिन्दुइ थ्यना रोके जुगु दु।

बजाः २१४० तक कुहावःगु खः। शून्य दशमलव ३८ प्रतिशतं बजाः थौं थहावःगु खः। थौं २४८ धितोपत्रया ५२ हजार ४५० गु कारोबारपाखे ८३ लाख १८७ कित्ता सेयर किनबेच जूगु दु।

३ अर्ब ३ करोड २३ लाख ३९ रुपैयाँया कारोबार जुगु दु। बैंकिङ, इन्भेष्टमेन्ट, उत्पादन नाप प्रशोधन व म्युचुअल फन्ड उपसूचक घटे जुगु दु। दकलय् अप्पो वित्त उपसूचकया लगानीकर्तापिन्स धाःसा कमेयाःगु दु।

अथेहे सानिमा जीआईसी इन्स्योरेन्स व सूर्योदय वामी लघुवित्तया भाः सकारात्मक सर्किट लेबलय् थ्यःगु दु। शिवश्री हाइड्रो, गुहेश्वरी मर्चेन्ट बैंक, मल्टिप्रपोप फाइनान्सया भाः न थहावःगु दु।

थौं मैलुङ खोला जलविद्युतया भाः दकलय् अप्पो ५.४८ प्रतिशतं घटे जूगु दु।

संघीय संसद भवन न्ह्यने छम्ह मनूखं थःत हे मिँच्याका आत्महत्याया कुतः थौं न्हिनय् यायेत्यःगु खः।

बानेश्वरपाखे तीनकुने मार्गया मू सतक दथुइ हे इलाम पञ्चकन्याया प्रेमप्रसाद आचार्य न पेट्रोलं थःत लुना मिँ च्याकेगु कुतः यायेत्यःगु खः।

उम्ह मनूखं प्रधानमन्त्री पुष्पकमल दाहाल प्रचण्ड संसद भवनं पिहा वयेत्यंव हे आत्मदाहया कुतः याःगु खः।

वयात प्रहरीं उद्धार याना बर्न अस्पताल कीर्तपुर अस्पतालय् यकूगु खः।