संघीय संसद् सचिवालयं नेपाली कांग्रेसयात प्रमुख प्रतिपक्षी दलया मान्यता बिउसे प्रमुख प्रतिपक्षी दलया नेता याःगु सेवा सुविधासम्बन्धी पौ छ्वःगु दु।

कांग्रेसया संदसीय दलया कार्यालयय् उपसचिव होमनाथ पहाडीया पौंया लिसः बिउसे संसद् सचिवालयया नामय् तोके याना प्रमुख प्रतिपक्षी दलया नेता याःगु सेवा सुविधासम्बन्धी जानकारी बिउगु खः।

संघीय संसद् सचिवालयया सांसद सुविधा व्यवस्थापन महाशाखाया प्रमुख रामहरि थापां पौं छ्वया प्रमुख प्रतिपक्षी दलया नेता शेरबहादुर देउवायात वइगु सेवा सुविधाया विषय जानकारी बिःगु खः।

उपसचिव थापां पौं च्वया धाःगु दु, “न्ह्यः ब्बःगु विषय दलया कार्यालयय् पौं ल्याः २०७९।०८० च.नं. ४५ तिथि २०७९।०९।२९ या पतिइ प्रतिनिधिसभाय् विपक्षी दलया नेता माननीय श्री शेरबहादुर देउवाजुं प्रमुख विपक्षी दलया नेताया हैसियतं वइगु सुविधाया माग जुयावया च्वंगु सन्दर्भय् उगु सुविधा संघीय संसदया पदाधिकारी नाप सदस्यपिनिगु पारिश्रमिक व सुविधा सम्बन्धी ऐन, २०७३ या सम्बन्धित दफा व अनुसूची–१ नाप अनुसूची–२ कथं जुइगु व्यहोरा कथं जुइ।”

सचिवालयं विपक्षी दलया नेता याःगु हैसियतं नां हे तोके याना जानकारी बिइवं आः कांग्रेस प्रमुख प्रतिपक्षी दलया हैसियत खः कि मखु धइगु बहस क्वचाःगु दु ।

उपसभामुख इन्दिरा राना मगरं शपथ काउगु दु।

थौं सोमबाः राष्ट्रपति भवन शीतल निवासय् छगु ज्याझ्वः दथुइ सभामुख देवराज घिमिरे न वयकःयात शपथ याकूगु खः।

शपथ ग्रहण ज्याझ्वलय् राष्ट्रपति विद्यादेवी भण्डारी, उपराष्ट्रपति नन्दबहादुर पुन, राष्ट्रिय सभाया अध्यक्ष गणेशप्रसाद तिमिल्सिनाया न ब्बति दुगु खः।

राष्ट्रिय स्वतन्त्र पार्टी (रास्वपा)या रानामगर उसभामुखय् निर्वाचित जूगु खः। उपसभामुखय् निर्वाचित जुइ धुका राना पार्टीपाखे अलग च्वंगु दु।

राष्ट्रिय स्वतन्त्र पार्टी (रास्वपा) या उपनेताय् विराजभक्त श्रेष्ठयात ल्यःगु दु।

बसुन्धाराय् पार्टी कार्यालयय् च्वंगु संसदीय दलया बैठकं येँ क्षेत्र नम्बर ८ पाखे निर्वाचित जूम्ह श्रेष्ठयात उपनेताया जिम्मेवारी बिःगु खः।

अथेहे समानुपातिक सांसद सन्तोष परियारयात प्रमुख सचेतक कथं ल्यःगु खः।

नेवाः न्ह्यलुवा, भाषासेवी नाप उद्यमि मदुम्ह लक्ष्मीदास मानन्धरया लुमन्ति ‘परिवर्तनका संवाहक लक्ष्मीदास’ नांया सफू पितब्बज्या छगु ज्याझ्वः दथुइ येँया ¥याडिसन होटलय् जुगु दु।

उगु ज्याझ्वःया मूपाहाँ नेकपा एकीकृत समाजवादी पार्टीया नायःलिसें सांसद माधवकुमार नेपालं उगु सफू ‘परिवर्तनया संवाहक लक्ष्मीदास’ पितब्वज्या यानादीगु खः ।

ज्याझ्वःया सभाध्यक्ष जनकवि दुर्गालाल श्रेष्ठ च्वनादीगु खःसा वय्कलं मदुम्ह लक्ष्मीदास मानन्धरया लुमन्तिइ चिनाखँ न्यंकादीगु खःसा जनकवि श्रेष्ठं हे ज्याझ्वः क्वचाःगु उद्घोष यानादीगु खःसा नेवाः न्ह्यलुवा मल्ल के सुन्दर, लुम्बिनी विश्व विद्यालयया पुलांम्ह उपकुलपति डा. त्रिरत्न मानन्धरं मदुम्ह लक्ष्मीदास मानन्धरयात कयाः नुगःखँ तयादीगु खः । सफूया च्वमिपिं शुभेच्छाविन्दु व लक्ष्मण अधिकारीपिन्सं नं सफूया विषय थःगु नुगःखँ तयादीगु खः।

ज्याझ्वलय् पुलांम्ह पर्यटनमन्त्री जीवनराम श्रेष्ठ, बागमती प्रदेशया सांसद बसन्त मानन्धर, येँ महानगरपालिका नाप प्रवक्ता १७ वडाध्यक्ष नविन मानन्धर, पुलांम्ह पर्यटन राज्यमन्त्री दिलीप महर्जन लिसेलिसें थीथी व्यक्तित्वपिनिगु न ब्बति दुगु खः।

लुँया भाः तोलां निसः कुहावःगु दु। थौं लुँ तोलां निसः कुहावया १ लाख ५ हजार रुपैयाँ न कारोवार जुयाच्वंगु दु धका नेपाल सुनचाँदी व्यवसायी महासङ्घं धाःगु दु।

अथेहे वहःया धाःसा थौं स्थिर जुगु दु। वहः तोलां १ हजार ३ सय ७५ रुपैयाँ न कारोबार जूगु दु धका महासङ्घं धाःगु दु।