सिफारिस समितिं बिःगु बयानय् ल्हाःचिं तयेकेगु तयारी जुयाच्वंगु दु। १७४ पेजया बयान ब्बना न्यकेगु ज्या जुयाच्जंगु दु।

दक्को ब्बना न्यकेधुका ल्हाःचिं तयेत ५ घण्टा लगे जुइगु महाअभियोग सिफारिस समितिया सदस्यपिन्स अनुमान याःगु दु। आः महाअभियोग सिफारिस समितिया बैठक ४५ मिनेटया लागि स्थगित जूगु दु।

समितिया सदस्य मीन विश्वकर्माया कथं सुरुमा जबरां दक्को ब्बने धुका लिपागु छपातय् जक ल्हाःचि तयेगु धका धाःगु खः।

नेपाल टेलिकमं थौंनिसे ई–सिम वितरण याइगु जुगु दु। दूरसञ्चार कार्यालय, सुन्धारा काउन्टरपाखे कम्पनीया ग्राहकपिन्त निःशुल्क ई–सिम वितरण सुरु यायेत्यःगु दु धका टेलिकमं धाःगु दु।

ई–सिम सपोर्ट याइगु मोबाइल सेटदुपि ग्राहकं थुगु न्हुगु प्रविधिया सिम प्रयोग यायेफइगु जुगु दु। आः फिजिकल सिम प्रयोग याना कम्पनीया ग्राहकं पोस्टपेड व प्रिपेड सिमयात निःशुल्क ई–सिम हिलेफइ।

अथेहे न्हुगु पोस्टपेड काइपि ग्राहकपिन्स आःया भावय् ई–सिम उपलब्ध याइगु जुगु दु। न्हुगु प्रिपेड सिमकार्ड काइपि ग्राहकपिन्स याकन हे थुगु सिम उपलब्ध याकेगु धका टेलिकमं धाःगु दु।

ई–सिम सपोर्ट याइगु मोबाइल सेट दुपिन्त नेपाल टेलिकमया न्हापाया ग्राहकपिन्से सिम कायेत फारम भरेयाना बुझे यायेमाः। ई–सिम छगु प्रकारया भर्चुअल अथे धइगु इलेक्ट्रोनिक सिम खः।

येँ महानगरपालिकां हात्तीसारच्वंगु जय नेपाल हलया लागाय् टुकुचा खुसिया उत्खन याःगु दु।

महानगरं नक्सा याःगु मार्किङया आधारय् डोजर यानाः हल परिसरय् १५ फिट म्हुगु इलय् टुकुचा खुसि लुंगु खः।

नारायणहिटी दरबार क्षेत्रपाखै वयाच्वंगु टुकुचा उगु लागाय् तनाच्वंगु खः ।

स्थानीयबासिन्दा व सम्पदा संरक्षणया लागाय् ज्या यानाच्वंपिन्सं टुकुचा  खुसिं अतिक्रमण यानाः छेँ दंगु धासै बिरोध यानावयाच्वंगु दु ।

येँ महानगरपालिकाय् ट्राफिक विज्ञ सल्लाहकारय् जगतमान श्रेष्ठयात नियुक्त याःगु दु।

नेपाल प्रहरीया पूर्व एसएसपी श्रेष्ठयात मेयर बालेन शाह न विज्ञ सल्लाहकारय् नियुक्त याःगु खः।

नगरकार्यपालिकाया पाखे विभागीय प्रमुख महेश कुमार काफ्ले न ल्हाःचिं तयातःगु पत्रय् भदौ २८ निसे लागू जुइगु कथं नियुक्त याःगु दु धका उल्लेख याःगु दु ।

राष्ट्रपति विद्यादेवी भण्डारीं न्यागु विधेयक प्रमाणीकरण याःगु दु। राष्ट्रपतिं थ्व स्वया न्ह्यः नागरिकता विधेयकयात सन्देशनाप प्रतिनिधिसभाय् लित छ्वंगु खःसा लिपा संसदं हाकन हुबहु पारित यासे प्रमाणीकरणया लागि सभामुखं छ्वंगु खः।

तर, शीतल निवासय् विधेयक थ्यःगु छवाः थ्यःसा आःतक प्रमाणीकरण जुइफुगु मदुनि। राष्ट्रपति उगु विधेयकबारे निरन्तर परामर्श यानाच्वंगु दु। थ्वया दथुइ मंगलबाः राष्ट्रपतिं संघीय संसदया निगु सदनया बैठकं पारित याःगु नागरिकता बाहेकया विधेयक राष्ट्रपतिं प्रमाणीकरण याःगु दु।

राष्ट्रपति कार्यालयया कथं संविधानया धारा ११३ या उपधारा २ कथं भण्डारीं तथ्यांकसम्बन्धी कानुनयात संशोधन व एकीकरण यायेत दयकूगु विधेयक प्रमाणीकरण याःगु दु।

अथेहे स्टाण्डर्ड नाप व तौल ऐन, २०२५ यात संशोधन यायेत दयकूगु विधेयक, प्रत्यायन सम्बन्धय् व्यवस्था यायेत दयकूगु विधेयक, सार्वजनिक पदधारण याइपिन्स शपथ सम्बन्धय् व्यवस्था यायेगु विधेयक व योगमाया आयुर्वेद विश्वविद्यालयया सम्बन्धय् व्यवस्था यायेगु विधेयक प्रमाणीकरण याःगु दु धका राष्ट्रपति कार्यालयया प्रवक्ता सागर आचार्य न जारी याःगु विज्ञप्तिइ उल्लेख याःगु दु।