येँ महानगरपालिकाया नगर सभा बैठकय् नं शंखमुलय् सतक तब्या यायेगु नामय् निजी जग्गा कब्जा यानाः डोजर चले याःगु बिषय वहस जुगु दु।येँ महानगरपालिका २२ वडाध्यक्ष चिनीकाजी महर्जनं शंखमुलय् डोजर चले याना ज्यादति बारे छानबिन यानाः दोषी

यात कारवाही यायेमाः माग यानादीगु दु। उकिष यात लिसः बीगु भल्वलय् प्रमुख प्रशासकीय अधिकृत बसन्त अधिकारीं उगु थासय् ‘जीएलडी’ अन्तर्गत हे सडक तब्या याये माःगु खः धासें वहे प्रक्रिया पूरा यानाः महानगरं डोजर चले याःगु खः धका धयादिगु खः।

२२ वडाध्यक्ष महर्जनं छगू थासं दुहां वनाः मेगु थासं पिहां वयेगु निकास मदुगु लँपुइ जीएलडी चले मजुइगु कानुनी व्यवस्था दु धासें धयादिल, ‘यदि जीएलडी कथं सुयां निजी जग्गा काये माःगु हे अवस्था दुसां नं राज्यं क्षतिपूर्ति बियाः जक कायेमाः धइगु कानुन दु । मनपा अथे कानुन हाचांगायाः वने जिउ ला ?’

वय्कःया न्ह्यसःयात मेयर बालेन साहं नं लिसः बी मफुगु खःसा प्रशासकीय अधिकृतं यदि थुकी गल्ती हे जूगु खःसां वार्ता यानाः निष्कर्ष पिकाये नु धकाः प्रस्ताव तयादिल ।

नेकपा (एमाले)या अध्यक्ष केपी शर्मा ओलीं सोनाम ल्होछार (तवार ल्हो) नखः समुदायपिनिगु परम्परा व संस्कृतिया संरक्षण नाप सम्वद्र्धन यायेत न्ह्याः वनेफयेमाः धका धयादीगु दु।

सोनाम ल्होछार (तवार ल्हो) या भिंतुना सन्देशय् वयकलं धयादीगु दु थीथी संस्कृतिया आधारित थज्याःगु नखः न देशय् राष्ट्रिय एकता, पारस्परिक सामाजिक सद्भाव व सहिष्णुताया मौलिकता आधारय् दु धका उल्लेख यानादीगु दु।

संविधानं विविध भाषा नाप संस्कृति विषययात मौलिक हकया सुनिश्चित यागु दु धयादीसे थीथी समुदायया धार्मिक नाप सांस्कृतिक आस्थायात सम्मान यासे नेपाः थीथी भाषा, लिपि, धर्म, संस्कृति, सभ्यता व सांस्कृतिक सम्पदाया संरक्षण जुया वयाच्वंगु दु धका धयादीगु दु ।

अध्यक्ष ओलीं नेपाः बालागु देय् नाप बहुसांस्कृतिक विशेषता मौलिक पूँजीया कथं दुगु धका उल्लेख यानादीसे छप्प व सहिष्णुताया विशेषताय् समृद्ध देश निर्माणय् सदुपयोग यायेमाः धका धयादीगु खः।

नेपाली कांग्रेसया सभापति नाप पूर्वप्रधानमन्त्री शेरबहादुर देउवां ‘सोनाम ल्होसार’ या लसताय् भिंतुना बियादीगु दु।

देउवां थुगु नखः न नेपाःया समाजय् सामाजिक सद्भावना थकाइ धका धयादीगु दु। वयकलं तामाङ जातिया मू नखः ‘सोनाम ल्होसार’ या लसताय् स्वदेश व विदेशय् च्वनाच्वपि तामाङ समुदायपिनिगु भिं उसाँयया कामना यानादीगु दु।

सभापति देउवां सामाजिक, सांस्कृतिक, जातीय व धार्मिक विविधतां जाःगु झीगु देय् थीथी भाषा, धर्म, वर्ण, सम्प्रदाय, जातजातिया थःथःगु विशिष्ट संस्कति व परम्परा दु धका उल्लेख याःगु दु।

थौं देयन्यक सोनाम ल्होछार–२८५९ हकिइगु जुगु दु।

तामाङ समुदायपिन्स न्हुगु दँ कथं माघ शुक्ल पारु कुन्हु सोनाम ल्होछार नखः थीथी ज्याझ्वःयासे हना वयाच्वंगु खः।

थुगु नखःया लसताय् थौंन्हिनय् तिनख्यलय् नेपाल तामाङ घेदुङं बृहत तामाङ सांस्कृतिक महोत्सवया ग्वसाः ग्वया तःगु दु।

महोत्सवय् प्रधानमन्त्री पुष्पकमल दाहाल प्रचण्डं थौं न्हिनय् १ बजे छगु दथुइ उलेज्या ज्याझ्वः याइगु दु।

थुगु नखः तामाङनाप ह्योल्मो, थकाली, जिरेल, नेस्याङ्वा, भोटे, दुरा, लेप्चापिन्स थःथःगु शैली व परम्परा कथं हनिइगु याइ।

भिंतुना राष्ट्रपति विद्यादेवी भण्डारीं बहुजातीय, बहुभाषिक, बहुसांस्कृतिक विविधतायुक्त नेपाःया समाजय् सोनाम ल्होसार थेजाःगु नखःपाखे नेपाःमि दथुइ सद्भाव, सहिष्णुता व बन्धुत्वया भावना थहावनिइ धका धयादीगु दु।

सोनाम ल्होसारया लसताय् भिंतुना सन्देश बियादीसे वयकलं सोनाम ल्होसार नखः न सकल नेपाःमि दथुइ छप्प जुया आर्थिक व सामाजिक रूपं समृद्ध देय् निर्माण यायेत न्ह्यानेगु सकसित ऊर्जा प्रदान याये फयेमाः धका भिंतुना बियादीगु दु।

राष्ट्रपतिं थज्यागु नखः न बृहत् राष्ट्रिय एकतायात थप सुदृढ यायेत ग्वाहालि जुइ धका उल्लेख यानादीगु दु। तामाङ समुदायया नखः सोनाम ल्होसारया लसताय् स्वदेश व विदेशये च्वनाच्वपि सकल तता केँह व दाजु किजापिनिगु सुख, शान्ति, भिंउसाँय् व समृद्धिका लागि भिंतुना बियादीगु खः।

सोनाम ल्होसार नखः तामाङ समुदाय न न्हुगु दँ कथं माघ शुक्ल पारु कुन्हु हना वयाच्वंगु खः। थुगु नखः तामाङ समुदायपिन्स कुल पूजा, प्रकृति पूजा व बुद्धया सन्देश लुमका थःथःति नापलायेगु याइ।