राष्ट्रपति विद्यादेवी भण्डारीं नागरिकता विधेयक प्रमाणीकरण यायेत अस्वीकार याःगु दु। राष्ट्रपतिं मङ्गलवाः चान्ह्यया १२ बजे तक न विधेयक प्रमाणीकरण मयोवं विधेयक स्वतः निष्क्रिय जूगु दु। संसदय् निक्वःतक पारित याना स्वीकृतिया लागि विधेयक राष्ट्रपतिया थाय् छ्वंगु खः।

संसदं पारितयाना निक्वःतक छं.्वंगु विधेयक १५ दिं दुने प्रमाणीकरण यायेमाःगु कानुनी व्यवस्था दु सा राष्ट्रपतिं विधेयक प्रमाणीकरण यायेत अस्वीकार याःगु खः। राष्ट्रपति भण्डारीं वंगु साउन २९ गते नागरिकता विधेयक लितः छ्वंयेगु झ्वलय् वैवाहिक अङ्गीकृत नागरिकता विधेयकया व्यवस्था, प्रादेशिक पहिचान नाप मांया नामय् नागरिकता जारी यायेगु मिसापिनिगु आत्मसम्मानय् घाः लागु विषय ल्ह्वंगु खः।

थुगु विषय हाकन विचाः यायेत सुझाव राष्ट्रपतिं बिउगु खःसा थुकियात बेवास्ता यासे संसदय् बहुमतं विधेयक गथे खः अथे हे पारित यान प्रमाणीकरणया लागि हाकन राष्ट्रपतिया थाय् छ्वंगु खः। संविधानया धारा ११३ या उपधारा (४) य् राष्ट्रपतिं छु न विधेयक सन्देशसहित लितः छ्वंगु अज्यागु विधेयकय् निगु हे सदनं हाकन बिचाः याना विधेयक प्रस्तुतरूपं वा संशोधन याना पारित यासे हाकन पेस याःसा पेस जूगु १५ दिं दुने राष्ट्रपतिं प्रमाणीकरण यायेमाःगु व्यवस्था दु।

अथेहे विधेयक निक्वःतक प्रमाणीकरण मजुलकि व प्रतिनिधि सभाया चालु अधिवेशन क्वचाये धुका आः थुगु विधेयक छु जुए धइगु विषययात स्वया च्वंगु दु।

वंगु २४ घण्टाय् देयन्यक थप ७४ म्हेसित कोरोना संक्रमण पुष्टि जूगु दु। स्वास्थ्य तथा जनसंख्या मन्त्रालयया कथं ३ हजार ५१२ म्हेसित परीक्षण याउगुलि ७४ म्हेसित संक्रमण पुष्टि जूगु खः।

स्वास्थ्य मन्त्रालयया कथं १ हजार ५३५ म्हेसित पीसीआर परीक्षण याउगुलि ३९ म्ह व १ हजार ९७७ म्हेसित एन्टिजेन परीक्षण याउगुलि ३५ म्हेसित् संक्रमण पुष्टि जूगु दु धका मन्त्रालयं धाःगु दु।

थ्व नाप कोरोना भाइरसया सक्रिय संक्रमितपि १ हजार ६१९ म्ह थ्यःगु दु सा २४ घण्टाय् १६० म्ह संक्रमणमुक्त जूगु दु।

शेयर बजाःया परिसूचक नेप्से थौं ३८ दशमलव ८१ अङ्कं घटे जूया १ हजार ८ सय ३६ दशमलव ६० विन्दुइ कुहावंगु दु।

थौं दक्को समूहया शेयर कुहावंगु दु। अथेहे बीमा, माइक्रोफाइनान्स, विकास बैंक, उत्पादन व जलविद्युत् समूहया शेयर तसकं कुहावंगु दु। नेप्से परिसूचकय् २३१ गु कम्पनीया ३८ लाख ५६ हजार कित्ता शेयर १ अर्ब २२ करोड रुपैयाँ न कारोबार जूगु दु।

दकलय् अप्पो हिमालयन डिस्टिलरी लिमिटेडया ५ करोड ६५ लाख रुपैयाँ बराबरया शेयर किनबेच जूगु दु। थौं कालिका पावर कम्पनीया शेयर १० प्रतिशतं घटे जुगु दु।

समग्र बजार घटे जूसा स्वाभिमान लघुवित्त वित्तीय संस्थाया शेयर झन्डै ४ प्रतिशत स्वया अप्पो थहावंगु दु।

डेंगू संक्रमणं २१ म्ह सी धुकुगु दु धका इपिडिमियोलोजी नाप रोग नियन्त्रण महाशाखां धाःगु दु। आःतकया तथ्यां कथं असोज ३ गतेतक संक्रमित जूपि १७ हजार ४९४ म्ह थ्यःगु दु।

आःतकया तथ्यांक कथं दकलय् अप्पो ४ हजार ८७८ म्हेसित संक्रमण पुष्टि जुइ धकुगु दु सा येँ ४ हजार ६७४, ख्वपय् ७१३ म्ह याना स्वनिगः दुने डेंगू संक्रमित जूपि १० हजार २६५ म्ह थ्यःगु दु।

अथेहे, मकवानपुरय् दकलय् अप्पो १ हजार ६१० म्हेसित संक्रमण जुगु दु। दाङय् १ हजार १४९, रुपन्देहीइ ६७९, चितवनय् ४२९, गुल्मीइ २९२, दार्चुलाय् १९२ व काभ्रेय् १५६ म्हेसित संक्रमण पुष्टि जुइ धुकुगु दु।

मेमेगु जिल्लाय् संक्रमित जूपिनिगु ल्याः १०० म्ह स्वया म्हो जुगु धका महाशाखाया तथ्यांकं धाःगु दु।