प्रतिनिधिसभाया महाभियोग सिफारिस समितिइ निलम्बित प्रधानन्यायाधीश चोलेन्द्रशमशेर जबराया बयान क्वचाःगु दु।

शनिबाः व स्वया न्ह्यः बयान काःगु लिखित रुपय् ल्हाःचिं तयकेगु नाप पूरा न्ह्यसःया लिसः काये धुका वयकःया बयान क्वचाःगु खः। आः शनिबाःया ३ बजे सिफारिस समितिं मेगु बैठक च्वना प्रतिवेदन तयार याइ धका ज्येष्ठ सदस्य रामबहादुर विष्टं जानकारी बिःगु खः।

‘महाअभियोग प्रस्तावय् अनुसन्धान क्वचाःगु दु, प्रतिवेदन तयार याये ल्यः दनिइ, सचिवायपाखे मस्यौदा तयार जुगु दु, उकियात अन्तिम रुप बिइत न्हिनय् ३ बजे बैठक सःतूगु दु’ धका वयकलं पत्रकारपिन्त धाःगु दु।

वाति लः मुनेगु व सफा चःबिया अभियन्ता प्रकाश अमात्य थौं मन्त । वय्कः शुक्रवाः बहनी मदुगु खः ।

थौं न्हिनय् हृदयघात जूम्ह वय्कःयात मेडिसिटी अस्पताल यंकूगु खः। वासः याकुयाकुं बहनी साढे ८ बजे पाखे मदुगु खः। सिथि नखःयात लः दिवस कथं हनेगु अभियान न्ह्याकादीम्ह मध्ये छम्ह खः ।

अत्याधुनिक सार्वजनिक चःबि व्यवस्थापनया ज्याय् सक्रिय जुया च्वनादीम्ह वयकःयात लहना वाःपौंया ४०० ल्याखय् वंगु भाद्र १७ गते छगु ज्याझ्वलय् लहना बिशेष सम्मान जुगु खः।

गुथि, इन्फो, एनजिओ फरम लिसें रेडक्रसलिसे आवद्ध अमात्य भाषा ख्यलय् नं सक्रियम्ह खः । वय्कःया जहान व काय छम्ह दी ।

थौं शुक्रबाः नेप्से परिसूचक १४ अंक न घटे जूगु दु। म्हिगः बिहीबाःया तुलनाय् थौं नेप्से ०.७३ प्रतिशत घटे जूया १९१०.३८ विन्दुइ बन्द जूगु दु म्हिगः नेप्से ५७ अंक घटे जुगु खः।

२२० धितोपत्रय् २९ लाख १६ हजार २७१ कित्ता सेयर ९० करोड ८१ लाख रुपैयाँया खरिदबिक्री जुगु दु। थौं कारोबार जूगु २२० धितोपत्रमध्ये नबिल ब्यालेन्स फण्ड–२ या भाः ७.८७ प्रतिशतं घटे जूगु दु।

अथेहे बुद्धभूमि नेपाल हाइड्रोपावर कम्पनी लिमिटेडया सेयर भाः ६ प्रतिशत घटे जुगु खः। थौं दकलय् अप्पो सेयर खरिद–बिक्री रिडी पावर कम्पनी लिमिटेडया जुगु दु। थुगु कम्पनीया ४ करोड २३ करोड रुपैयाँया सेयर खरिद–बिक्री जूगु खः। थौं कारोबार जूगु १३ गु समूहमध्ये म्युचुअल फण्ड समूहया परिसूचक थहावंगु दु सा ल्यदनिइगु समूहया परिसूचक घटे जूगु दु।

म्युचुअल फण्ड समूहया परिसूचक ०.०७ प्रतिशत थहावंगु दु। दकलय् अप्पो परिसूचक घटे जुगुलि वित्त समूह जुगु दु। थुगु समूहय् परिसूचक १.३६ प्रतिशतं घटे जुगु खः।

लुँ तोलां द्धःछि कुहावल लुँ तोलां थौं द्धःछि कुहावंगु दु। थौं तोलां द्धःछि कुहावया ९१ हजार ५ सय रुपैयाँ न कारोबार जुगु दु धका नेपाल सुनचाँदी व्यवसायी महासङ्घं धाःगु दु।

अथेहे, वहः तोला न झीतका कुहावंगु दु। वहः तोलां झीतका कुहावया १ हजार १ सय ७० रुपैयाँ न कारोबार जुगु दु धका महासङ्घं धाःगु दु।

२०७४ सालया प्रतिनिधि सभा व प्रदेशसभा सदस्यपिनिगु बन्दसूची असोज १ गतेनिसे स्वतः खारेज जुइ धका निर्वाचन आयोगं धाःगु दु।

आःतक कायम बन्दसूची असोज १ गते चान्ह्यः १२ बजेनिसे स्वतः खारेज जुइगु निर्णय जुगु दु धका आयोगया प्रवक्ता शालिग्राम शर्मा पौडेलं जानकारी बिःगु दु।

वइगु मंसिर ४ गते जुइत्यःगु प्रदेश व प्रतिनिधि सभा निर्वाचनय् समानुपातिकपाखे बन्दसूची थ्व हे असोज २ व ३ गते बुझे यायेगु कार्यतालिकाय् दु।

तर २०७४ या बन्दसूची कायम दुगु अवस्थाय् लिपागु पटकया बन्दसूचीइदुपि २०७९ या बन्दसूचीइ समावेश यायेज्यु वा मजिउ धइगु अन्यौलय् दु। थुकियात दलपिन्स प्रष्ट यायेत निर्वाचन आयोगयात इनाप याःगु दु।