नेवाः देय् दबू स्वनिगः विशेष प्रदेशया आह्वानय् स्वनिगःया थीथी लागाय् भाषा आयोगया सिफारिस कथं नेपालभाषा व तामाङ भाषायात सरकारी कामकाजि भाषाया रुपय् वागमती प्रदेशय् लागू यायेगु सवालय् थीथी लागाय् सहलह मुँज्या जुयाच्वंगु दु।

वंगु असार १८ गते नेवाः देय् दबू ख्वप जिल्ला समितिया ग्वसालय् थिमिइ तःजिक सहलह मुँज्या जूगु खः। उगु सहलह मुँज्याय् भाषा आयोगया सचिब जयराम अधिकारी, मूपाहां वागमती प्रदेशया सांसद प्रतिमा श्रेष्ठ, नेवाः देय् दबूया केन्द्रीय न्वकू उमेश स्थापित, नेवाः देय् दबूया स्वनिगः विशेष प्रदेशया नायो श्रीकृष्ण महर्जन, स्वनिगः विशेष प्रदेया न्वकू सुमन श्रेष्ठ, नेपाल तामाङ घेदुङया छ्याञ्जे चन्द्रलाला लामा लगायतपिन्सं न्वंवानादीगु खः।

उगु ज्याझ्वलय् आःया अवस्थाय् दबाव मुलक ज्याझ्वः यायेगु खँय् बः बियादीगु खः। देय् दबू ख्वप जिल्लाया नायो नरेश नेवाःया नायोसुइ जूगु उगु ज्याझ्वलय् ख्वप जिल्लाया बरिष्ठ न्वकू योगी स्यस्यः नं लसकुस न्वचू बियादीगु खः। अथे हे वागमती प्रदेशय् नेपालभाषा व तामाङ भाषायात सरकारी कामाजी भाषाया रुपय् मान्यता बिइगु सवालय् आः ल्ह्वनेगु पलाःया बारे नेवाः देय् दबू किपू नगर समितिं वंगु असार १७ गते शुक्रवाः सहलह मुँजया यात ।

नेवाः देय् दबू स्वनिगः विशेष प्रदेशया नायो श्रीकृष्ण महर्जन मूपाहां जुयादीगु उगु ज्याझ्वलय् आः नेवाःत व तामाङत जाना आन्दोलन यायेगु बाहेक लिकल्प मदु धकाः सहलह जूगु खः। अथे हे साउन महिनाया न्हापांगु वालय् हे किपुलिइ उगु मुद्दायात कया प्रदर्शन यायेगु धकाः तकं खँ जूगु खः। थ्व हे दुथुइ भाषा आयोगया सिफारिस कथं भाषायात मान्यता बिइकेत एमालेपाखें संकल्प प्रस्ताव तयेगु जुइ धकाः धाःगु दु।

नेपाःया संविधान कथं गठन याःगु भाषा आयोगं वागमती प्रदेशय् नेपालभाषा व तामाङ भाषायात सरकारी कामाजि भाषाया रुपमा मान्यता बिइत कानुन दयेका लागू यायेगु खँय् वागमती प्रदेशया सरकारं बेवास्तायात धाःसा प्रमुख प्रतिपक्षं संकल्प प्रस्ताव तइगु जूगु दु। देय् दबू येँ जिल्ला समितिया ग्वसालय् शनिवाः येँय् भाषा आयोगया सिफारिसया सवालय् जूगु सहलह मुँज्याय् एमालेया वागमती प्रदेशया सांसद राजेश शाक्यं अथे धयादीगु खः।

ज्याझ्वलय् एमालेया मेम्ह सांसद नारायण सिलवालं वागमती प्रदेशय् कामकाजि भाषा कथं भाषा आयोगया सिफारिसय् दुथ्याःगु नेपालभाषा व तामाङ भाययात मान्यता बिइगु सवालय् एमाले दुने सहलह जुयाच्वंगु दु धकाः धयादिल ।ज्याझ्वलय् वागमती प्रदेशय् नेपाली कांग्रेसका सांसदपिं नरोत्तम बैद्य व भिमसेन खत्रीं भाषा आयोगया सिफारिस कथं नेपालभाषा व तामाङ भाषायात कानुनी मान्यता बिइकेगु नितिं थःपिन्सं माःगु कथंया भूमिका म्हितेगु जुइ धकाः बचं बियादिल।

नेवाः देय् दबू येँ जिल्ला समितिया नायो धनबहादुर महर्जन तिमिलाया नायोसुइ जूगु उगु ज्याझ्वलय् नेवाः देय् दबू स्वनिगः विशेष प्रदेशया नायो श्रीकृष्ण महर्जनं भाषा आयोगं सिफारिस याःगुनिसें आः तक जुइ धुंकूगु प्रक्रिया नापं आः यायेमाःगु खँ विषयवस्तु सहलहया नितिं न्ह्यब्वयादीगु खः । वय्कलं आःया अवस्थाय् सांसदतयसं संसदय् अले समुदायपाखें सतकय् दबावमुलक ज्याझ्वः यायेगु बाहेकाया विकल्प मदु धकाः धयादिल । ज्याझ्वलय् मूपाहां नेवाः देय् दबूका केन्द्रीय नायो पवित्र बज्राचार्यं आःया अवस्थाय् वागमती प्रदेशय् नेपालभाषा व तामाङ भाषायात कामकाजि भाषा कथं लागू याकेगु नितिं वागमती प्रदेशया सांसदतलिसे सहलह ब्याका वयकःपिन्सं बिउगु सुझाव कथं हे पलाः ल्ह्वना वनेगु जुइ धकाः धयादिल। थुगु कथंया अभियान आः स्वनिग्ः न्यंकं न्ह्याकेगु जुइ धकाः नेवाः देय् दबू स्वनिगः विशेष प्रदेशया नायो श्रीकृष्ण महर्जनं जानकारी बियादीगु दु।

नेवाः जागरण मञ्चया ग्वसालय् संस्कृति पर्यटन तथा नागरिक उड्डयन मन्त्री जीवनराम श्रेष्ठ मन्त्री पदय् नियुक्त जुयादीगुलिं भिन्तुना देछायेगु ज्याझ्वः जुगु दु।

उगु ज्याझ्वलय् जनकवि दुर्गालाल श्रेष्ठं, नेवाः न्ह्यलुवाः मल्ल के. सुन्दर, पूर्व राज्यमन्त्री तीर्थराम डंगोलपिन्स न खादा न्ययेका भितुना देछानादीगु खः।

मन्त्री श्रेष्ठं थम्हेसिया संस्कृति सम्पदाया नितिं ज्या यायेगु इलय् नेवाः न्ह्यलुवापिं लिसें सहलह याना न्ह्या वनेगु धका धयादीगु खः।

जागरण मंञ्चया अध्यक्ष सुजिब बज्राचार्यया सभाध्यक्षताय् जुगु उगु ज्याझ्वलय् सम्पदा संस्कृति नेवाः सरोकार व संस्कृति पर्यटन तथा नागरिक उड्डयन मन्त्रालय पाखें यायेमाःगु ज्यायात कया मन्त्री श्रेष्ठयात ज्ञापन पौ लःल्हानादीगु खः।

मंञ्चं मूछ्याञ्जे बिजयकृष्ण श्रेष्ठ लसकुस यानादिगु उगु ज्याझ्वः मंञ्चया न्वकू अमृत ताम्रकार न्ह्याकादिगु खः।

वंगु २४ घण्टाया दुने देयन्यक थप १०२ म्हेसित कोरोना भाइरस (कोभिड–१९) या संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं देयन्यक २६१५ नमुना परीक्षण याउगुलि उलि संक्रमण पुष्टि जुगु खः।

थ्व नाप देयन्यक संक्रिय संक्रमितपि ६०५ म्ह थ्यःगु दु। १५३९ म्हेसिगु पीसीआर परीक्षणय् ७२ म्ह व १ हजार ७६ म्हेसिगु एन्टिजेन परीक्षणय् ३० म्ह याना १०२ म्हेसित संक्रमण पुष्टि जुगु दु।

नेपाल आदिवासी जनजाति पत्रकार महासंघ (फोनिज) युके शाखा न स्थापना याउगु फोनिज युके पत्रकारिता सम्मान व सिरपा निम्ह फोनिजकर्मी पत्रकारपिन्त लःल्हागु दु।

फोनिज युके पत्रकारिता सम्मान २०२२ पाखे पत्रकार टिकाराम प्रधान व फोनिज युके पत्रकारिता सिरपा २०२२ पाखे पत्रकार निलिफा सुब्बा लःल्हागु दु।

येँ जुगु छगु ज्याझ््वः दथुइ आदिवासी जनजाति आयोगया अध्यक्ष राम बहादुर थाप मगरं निम्हेसित सम्मान यानादिगु खः। निम्हेसित न दसिपौ नाप म्हति २५ हजार नगद सिरपा लःल्हागु खः।

फोनिज युके न सञ्चारक्षेत्रपाखे आदिवासी जनजाति समुदाय विकासया लागि च्वसा न्ह्याकाच्वपि पत्रकारपिनिगु लागि दँय् सिरपा लःल्हानाच्वंगु खः। उगु ज्याझ्वलय् न्ववानादीसे आदिवासी आयोगया अध्यक्ष राम बहादुर थापा मगरं आदिवासी जनजातिपिनिगु हकहित व अधिकार सुनिश्चिताया लागि फोनिजकर्मीपिनिगु तःधगु ल्हाः दु धका धयादीगु खः।

नेपाल आदिवासी जनजाति महासंघया अध्यक्ष गेल्जे लामा शेर्पा न थज्यागु सिरपा न आदिवासी जनजातिया मुद्दाय् च्वसा न्ह्याकिइगुलि प्रोत्साहन जुइ धका धयादीगस खः।

नेपाल आदिवासी जनजाति पत्रकार महासंघ (फोनिज) संघीय समितिया ग्वसालय् उगु सिरपा लल्हायेगु ज्या जुगु खः।

नेपाल आदिवासी जनजाति पत्रकार महासंघ (फोनिज) न स्वलातक संगठन सुदृढीकरण अभियान सञ्चालन याइगु जुगु दु।

फोनिजया म्हिगः शुक्रबाः जुगु संघीय समितिया स्वक्वःगु पूर्ण बैठकं साउन १ गतेनिसे असोज २७ गतेतक अभियान न्ह्याकेगु निर्णय याउगु खः।

अभियानया इलय फोनिजया जिल्ला व विदेश शाखा, प्रादेशिक समितिपिनिगु बैठक सञ्चालन, वार्षिक क्यालेण्डर निर्माण, प्रशिक्षण लगायत ज्या जुइ धका महासचिव मिलन लिम्बू न न्ह्यब्बःगु कार्ययोजनाय् उल्लेख याउगु दु।

अथेहे स्वलाया अभियान दथुइ फोनिजं थःगु सदस्यपिनिगु अभिलेखयात डिजिटलाइज याइगु जुगु दु। आः सदस्यताया लागि अनलाइन प्रणालीमार्फत आवेदन बिइगु व अनलाइनपाखे हे सदस्यता स्वीकृति लगायत प्रक्रिया कथं जुइत्यःगु दु।

नेपाल पत्रकार महासंघया संस्थापक अध्यक्ष सत्यनारायणबहादुर श्रेष्ठ हे कायम यायेत फोनिजं अभियानया झ्वलय् नेपाल पत्रकार महासंघया जिल्ला, प्रदेश व केन्द्रय् ज्ञापनपत्र लःल्हायेगु, संघं सञ्चार तथा सूचना प्रविधि मन्त्रालय व प्रदेश सरकारया सञ्चार स्वइगु मन्त्रालययात न ज्ञापनपौ लःल्हाइगु जुगु दु।

अथेहे अभियानया झ्वलय् फोनिजं नेपाल आदिवासी जनजाति महासंघ लगायत थीथी आदिवासी जनजातिपिनिगु संघसंस्था नाप अन्तरसम्बन्ध सुधारया लागि थीथी चरणया अन्तरक्रिया व छलफल यायेगु निर्णय याउगु दु।

बैठकं असोज २८ व २९ गते फोनिजया नीति नाप विधान सम्मेलन यायेगु निर्णय याउगु दु।