नेवाः देय् दबू यल जिल्ला समितिया न्हापांगु तःमुँज्या क्वचाःगु दु।नेपालभाषा मंकाः खलः भवनय् जुगु उगु तःमुँज्याय् रविन्द्र शाक्य निर्बिरोध निर्वाचित जुगु दु।

देय् दबू यल जिल्ला समितिया नायः हिराकाजी महर्जनया सभाध्यक्षताय् मूपाहां कथं देय् दबू केन्द्र्रया नायः पवित्र वज्राचार्यं त्वाःदेवाय् मत च्याकाः उलेज्या यानादीगु खः ।

मूपाहां वज्राचार्यं नेवाः आन्दोलनं झीत न्ह्याबलें सक्षम यानाच्वनी धासें नेवाःत राजनीतिक रुपं सचेत जुइमाःगु खँय् बः बियादिल । वय्कलं झी नेवाःत राजनीतिक रुपं सचेत मजूगलिं हे लिउने लानाच्वंगु खः धासें झीसं आः नं वाः चायेके मफुत धाःसा झी आः स्वयां नं लिउने लाः वनीगु अवस्था वइ धयादिल । देय् दबूया केन्द्रीय सल्लाहकारनापं विशेष पाहां डा. पुष्पराज राजकर्णिकार, न्वकु उमेश स्थापित नेवाःतय्त आदिभूमिं विस्थापित याना यंकाच्वंगुया कारणं विकास निर्माणय् गैर नेवाःत हावी जूगुलिं खः धका धयादिल ।

यल जिल्ला समितिया न्वकु रविन्द्र शाक्यं लसकुस यासें न्ह्याःगु ज्याझ्वलय् ज्यापु महागुथि नेपाःया केन्द्रीय न्वकु अष्टमान महर्जन, देय् दबू येँ जिल्लाया नायः धनबहादुर महर्जन तिमिला, देय् दबू राष्ट्रिय परिषदया दुजः शरणगोपाल डंगोल, वरिष्ठ समाजसेवी मोतिलाल शिल्पकार, नेपालभाषा मंकाः खलः यलया पुलांम्ह नायः ऋषिप्रसाद श्रेष्ठ, देय् दबू स्वनिगः विशेष प्रदेशया नायः श्रीकृष्ण महर्जन लगायतं भिंतुना न्वचु बियादीगु खः ।

उगु तःमुँज्यां शाक्यया अध्यक्षताय् नीछम्हेसिया न्हूगु ज्यासना पुचः नं ल्यःगु खः । न्हूगु ज्यासना पुचलय् कृष्णभक्त डंगोल वरिष्ठ उपाध्यक्ष, मदन श्रेष्ठ उपाध्यक्ष, बुद्धिलक्ष्मी महर्जन सचिव व नानीहेरा शाक्य कोषाध्यक्षय् च्वनादीगु दु ।

दुजलय् राजु शाक्य, अमिनराज महर्जन, रमिता वज्राचार्य, रमेश तण्डुकार, सुरज तण्डुकार, बाबुराजा वज्राचार्य च्वनादीगु दु ।

थुकथं हे मेपिं दुजलय् निर्मल डंगोल, दशराज तण्डुकार, पशुपति तुलाचन, सुदन शाक्य, चन्द्रकमल श्रेष्ठ, अनिता अवाले, राम महर्जन, सविता डंगोल, महेन्द्रकुमार महर्जन व अस्तेन्द्रकुमार महर्जन च्वनादीगु दु ।

देयन्यक थौं नेपाल टेलिकमया मोबाइल सेवा अबरुद्ध जूगु दु।

कम्पनीया मोबाइल सेवा अन्तर्गत ल्यान्डलाइन, प्रिपेड व पोस्टपेडया फोन न्हिनसिया १२ बजेनिसे अबरुद्ध जूगु दु।

टेलिकमया आधिकारिक वेबसाइट तक अवरुद्ध जूगु दु ।

टेलिकमं आःतक छाय् सेवा अवरूद्ध जूगु धका छु न जानकारी बिःगु मदुनि।

थौं न्हुपि मन्त्रीपिन्स पद व गोपनीयताया शपथ काःगु दु।

नेकपा एमाले, नेकपा माओवादी केन्द्र, राष्ट्रिय स्वतन्त्र पार्टी व राष्ट्रिय प्रजातन्त्र पार्टीपाखे मन्त्री जूपिन्स राष्ट्रपति कार्यालयय् पद नाप गोपनीयताया शपथ काmगु दु।

राष्ट्रिय प्रजातन्त्र पार्टीया अध्यक्ष राजेन्द्र लिङ्देन उपप्रधानमन्त्री नाप ऊर्जा व जलस्रोत मन्त्रीया शपथ काःगु दु। माओवादीपाखे रेखा शर्मा सूचना, सञ्चार नाप प्रविधिमन्त्री व अमनलाल मोदी संघीय मामिला नाप सामान्य प्रशासनमन्त्री जूगु दु। अथेहे सुदन किराती पर्यटन नाप नागरिक उड्ययनमन्त्री व सुशीला श्रीपाली भौतिक पूर्वाधार राज्यमन्त्री जूगु दु।

नेकपा एमालेपाखे डा. विमला राई पौडेल, पदम गिरी, भगवती चौधरी व हरि उप्रेती मन्त्री नियुक्त जूगु दु। पौडेल परराष्ट्र व गिरी स्वास्थ्य मन्त्री जूगु दु। राप्रपापाखे सहरी विकासमन्त्रीइ उपाध्यक्ष बिक्रम पाण्डे व कानुनमन्त्रीइ ध्रुवबहादुर प्रधान जुगु दु सा दीपक सिंह उर्जा राज्यमन्त्री जूगु दु।

राष्ट्रिय स्वतन्त्र पार्टीपाखे डोलप्रसाद अर्यालयात श्रम व शिशिर खनालयात शिक्षा मन्त्री नियुक्त याःगु दु। अथेहे तोसिमा कार्की स्वास्थ्य नाप जनसंख्या राज्यमन्त्री जूगु दु।

उपप्रधान नाप ऊर्जामन्त्री नियुक्त जूगु दु। राष्ट्रपति कार्यालय, शीतल निवासय् थौं राष्ट्रपति विद्यादेवी भण्डारीं पद व गोपनीयताया शपथ बिःगु खः।

थ्व नाप आः प्रचण्ड सरकारय् प्यम्ह उपप्रधानन्त्री जूगु दु । एमाले उपाध्यक्ष विष्णु पौडेल उपप्रधान नाप अर्थ, माओवादी वरिष्ठ उपाध्यक्ष नारायणकाजी श्रेष्ठ उपप्रधान नाप भौतिक पूर्वाधार व राष्ट्रिय स्वतन्त्र पार्टीया सभापति रवि लामिछाने उपप्रधान नाप गृहमन्त्री जुइ धुकुगु दु।

वाग्मती प्रदेशसभाया मुख्यमन्त्री शालिकराम जम्कट्टेलं थौं विश्वासया मत काइगु कार्यसूचीइ दुथ्याकूगु दु।

प्रदेशसभाया थौं च्वसनिइगु बैठकय् उगु कार्यसूची दु धका प्रदेशसभा सचिवालयं धाःगु दु। मुख्यमन्त्री जम्कट्टेलं वंगु पुस २६ गते स्वम्हेसिगु मन्त्रिपरिषद् गठन याःगु खः।

थौं च्वनिइगु प्रदेशसभा बैठकय् प्रदेशसभा नियमावली, २०७४ कथं विश्वासया मत विभाजनया लागि माःगु तयारी पूरा जुइ धुकुगु दु धका सभामुख भुवनकुमार पाठकं जानकारी बिःगु दु।

प्रदेशसभाय् नेपाली कांग्रेसया ३७, नेकपा (एमाले)या २७, नेकपा (माओवादी केन्द्र)या २१, राप्रपाया १३, नेकपा (एकीकृत समाजवादी)या न्ह्यम्ह, नेमकिपाया स्वम्ह व हाम्रो नेपाली पार्टीया निम्ह सदस्यपि दु।