ऐतिहासिक नापं सांस्कृतिक कथं महत्वपूर्ण चन्द्रागिरी नगरपालिका वडा नं. १२ या नेवाः वस्ती बलम्बुइ झिंस्वक्वःगु नेवाः एकता दिवस तजिक हनिइगु जुगु दु। बुधवाः बलम्बुइ पत्रकारपि नापलायेगु ज्याझ्वलय् नेवाः देय् दबू चन्द्रागिरी नगर समितिया नायः नारायण महर्जनं उगु खँ कनादीगु खः । वय्कलं वइगु पुष १६ गते दर्जनौं सांस्कृतिक बाजा नापं स्वनिगःया थीथी लागां द्धलंद्धःम्ह मनूत गुर्जुधाराय् मुना सांस्कृतिक बाजा सहित जुलुस पिकया बलम्बुइ वनिगु जानकारी बियादिगु खः।

उकिया नितिं थीथी लागाय् प्रचार प्रसार यायेगु ज्या जुयाच्वंगु खँ न्ह्यथसें वइगु शुक्रवाः बलम्बुइ सुकुन्दा ¥याली पिकाये त्यनागु नं कनादिगु दु। महर्जनं प्रेस विज्ञप्तिइ धयातःगु दु ‘थुगुसी झिंस्वक्वःगु नेवाः एकता दिवस तःजिक हनेगु नितिं नेवाः दबू चन्द्रागिरी नगर समिति व ज्यापु महागुथि चन्द्रागिरी नगर समितिया स्थानीय व्यवस्थापन व स्थानीय संयोजनय् जूवनाच्वंगु दु ।

नेवाः दबू केन्द्रया संयोजनय् नेवाः स्वायत्त राज्य मंकाः संघर्ष समितिइ दुथ्याःगु घटकत, नेवाः समाजया थीथी जातीय संघ संस्था, नेवाः अभियान न्ह्याका वयाच्वंगु संघ संस्था नापं दुथ्याका १३ क्वःगु नेवाः एकता दिवस हना मंकाः ग्वसाः खलःया ग्वसालय् जुइत्यःगु खः। बलम्बुइ जुइगु नेवाः एकता दिवसय् स्वनिगःया थीथी थासं ब्बति कायेत्यःगु दु। संघीय लोकतान्त्रिक गणतन्त्र नेपाः दुने पहिचानया आधारय् नेवाः स्वायत्त राज्य सुनिश्चित यायेगु हे नेवाः राजनीतिक आन्दोलनया मू आज्जु खः । मंकाः संघर्ष समितिया ग्वसालय् नेपाल संवत ११३० पोहेलाथ्व नवःमिया दिनय् येँया दशरथ रंगशालाय् लखौं लख नेवाःत मुना जनस्तरपाखें नेवाः स्वायत्त राज्य घोषणा याःगु खः ।

थिमिया बोडेय् जूगु नेवाः राष्ट्रिय राजनीतिक सम्मेलनया क्वःछिना कथं नेवाः दुने परम्परांनिसें दयावयाच्वंगु जातीय, क्षेत्रीय, सांस्कृतिक, धार्मिक अनेकता व विविधता दथुइ एकता क्वातुकेत पोहेलाथ्व नवःमिया दिं नेवाः एकता घोषणा याःगु खः । थ्व हे ऐतिहासिक दिंयात लुमंकाः नेवाः एकता दिवस हना वयाच्वंगु जुल ।

अन्तर्राष्ट्रि श्रम संगठन अभिसन्धि १६९ (आइएलओ १६९) नापं आदिवासी अधिकार सम्वन्धि संयुक्त राष्ट्र संघीय घोषणा पत्र (युएनड्रिप २००७) लगायत थीथी अन्तर्राष्ट्रिय सन्धी महासन्धीपाखें आदिवासीतय्त बियातःगु अधिकार सुनिश्चित याना कार्यान्वयन यायेमाः, भाषा आयोगया सिफारिस कथं वाग्मती प्रदेशय् नेपालभाषायात कामकाजि भाषाया रुपय् कार्यान्वयन यायेमाः, स्वनिगलय् आदिवासी नेवाःतय्गु वसोवासया समस्या समाधान यायेमाःगु नेवाःतय्गु सामुहिक भूमि, नेवाः संस्कृतिनाप स्वानाच्वंगु भूमि रक्षा यायेमाःगु नापं समग्रतय्त नेवाः भूमियात रक्षा यायेमाःगु सः थ्वयेकेगु याइ ।

थुगु ज्याझ्वलय् नेपाल आदिवासी जनजाति महासंघया नेतृत्व, आदिवास जनजाति आयोगनिसें भाषा आयोगया प्रतिनिधि तकं सहभागी जुइ ।’ देय् दबू चन्द्रागिरी नगर समिति व ज्यापु महागुथि चन्द्रागिरी नगर समितिया मंकाः ग्वसालय् उगु पत्रकार सम्मेलन जूगु खः । ज्यापु महागुथि चन्द्रागिरी नगर समितिया नायः धनवीर महर्जन, देय् दबू स्वनिगः विशेष प्रदेशया नायः श्रीकृष्ण महर्जनपिनिगु न उपस्थिति दुगु खः।

न्ह्यगू दल व स्वम्ह स्वतन्त्र सांसदपिनिगु समर्थनय् प्रधानमन्त्री जुयादीम्ह माओवादी केन्द्रया अध्यक्ष पुष्पकमल दाहाल प्रचण्डं पुस मसान्त दुने मन्त्रिपरिषदयात पूर्णता बिइगु तयारी याःगु दु।

वंगु सोमवाः प्रधानमन्त्री प्रचण्डया नेतृत्वय् च्याम्हेसियागु मन्त्रिमण्डल गठन जुइवं सरकारयात पूर्णता बिइगु बारे आन्तरिक छलफल सुरु जुगु खः। सत्ता गठबन्धनय् दुथ्यापि दलपिन्स अय्न सरकारय् वनेगु मवनेगु धइगु बिषया निर्णय जूगु मदुनि । जसपा, राप्रपा व नागरिक उन्मुक्ति पार्टी न सरकारय् वनेगु मवनेगु धइगु निर्णय याःगु मदुनि। प्रचण्ड नेतृत्वया सरकारय् न्ह्यगू दल व स्वतन्त्र याना १ सय ६९ सांसदपिनिगु समर्थन दुगु खः।

संविधानं २५ म्ह स्वया अप्पो मन्त्री दयके मदइगु व्यवस्था दु। आःतक च्याम्ह मन्त्रीपिन्स शपथ काये धुकुगु दु सा १७ मन्त्रीपि थये याये ल्यःदनिइ। न्हापागु चरणय् माओवादीं सरकारया नेतृत्वय् छम्ह उपप्रधानमन्त्री काये धुकुगु दु सा एमाले व राष्ट्रिय स्वतन्त्र पार्टी न छम्ह छम्ह उपप्रधानमन्त्री जुइ धुकुगु दु । अथेहे स्वम्ह मन्त्री एमालेपाखे व जनमत पार्टीपाखे छम्ह जुइ धुकुगु दु।

बागलुङ जिल्लाय् केन्द्रविन्द जुया स्वकः तक भुखाय् ब्बःगु दु धका राष्ट्रिय भूकम्प मापन तथा अनुसन्धान केन्द्रं धाःगु दु।

केन्द्रया कथं १ बजे जुया २३ मिनेटय् बागलुङया अधिकारी चौर जःखः केन्द्रविन्दु जूया ४.७ रेक्टरस्केल, २ बजे जूया ७ मिनेटय् खुङ्गा जःखः केन्द्रविन्दु जूया ५.३ रेक्टरस्केलया भुखाय् ब्बःगु खः।

अथेहे सुथय् ३ बजे जुया २८ मिनेटय् अधिकारी चौर जःखः केन्द्रविन्दु जुया ४ रेक्टरस्केलया भुखाय् ब्बःगु दु धका केन्द्रं धाःगु दु।

नेवाः पत्रकार राष्टिय दबू न थौं छगु ज्याझ्वःयासे पत्रकारपिन्त न्हापागु पटक संगठीतयाम्ह सत्यनारायण बहादुर श्रेष्ठया १०७ क्वःगु जन्मजयन्ती हनेत्यःगु दु।

उगु उगु ज्याझ्वलय् प्रेश काउन्सिल, पत्रकार महासंध व नेपाल आदिवासी जनजाती महासंघपिनिगु उपस्थिति दइ धका दबूया नायः सुरजबीर बज्राचार्य लहनान्युजयात धयादीगु दु। नेपालय् पत्रकारतय्त संगठित यायेगु तातुनां दकले न्हापां २००८ सालय् नेपाल टुडेया सम्पादक सत्यनारायण बहादुर श्रेष्ठं नेपाल पत्रकार संघ स्वनादिगु खः।

२००९ साल वैशाख २८ गते आर्य समाज मन्दिर, भोताहितिइ जूगु संघया निक्वःगु सभां हाकनं नेपाल टुडेया सम्पादक सत्यनारायणबहादुर श्रेष्ठयात हे सभापति ल्यःगु खः। ग्रीष्मबहादुर देवकोटाया सफू “नेपालको छापाखाना र पत्रपत्रिकाया इतिहास” य् १२ पाना नेपाल पत्रकार महासंघ गठनया खँय् च्वयातःगु दु ।

गोरखापत्रय् २००९ सालय् प्रकाशित पत्रकार संघया ज्याखँया समाचारं नं २००८ सालय् सत्यनारायण बहादुर श्रेष्ठं संस्थापक अध्यक्ष जुयाः न्ह्यज्याकूगु संगठनया खः धका च्वयातःगु खः। सत्य स्थापित यायेत ध्यानाकर्षण याकूसें पत्रकारिता ख्यलय् थुलि अन्याय व गलत तथ्य स्थापित यायेगु कुतः पनेतः नेवाः पत्रकार राष्टिय दबू ने.सं. ११४० निसें वय्कःया जन्मजयन्ती हनेगु ज्याझ्वः न्ह्याका वयाच्वंगु खः ।

नेकपा एकीकृत समाजवादीया अध्यक्ष माधवकुमार नेपालं थःत जानकारी हे मबिस्ये माओवादी अध्यक्ष पुष्पकमल दाहाल ‘प्रचण्ड’ प्रधानमन्त्री जुगु धका धाःगु दु।

थौं मंगलबाः पार्टी कार्यालयय् जुगु छगु ज्याझ्वलय् नेपालं प्रचण्ड प्रधानमन्त्री जुगु धका थम्हेसिया पत्रपत्रिका ब्बना जक सिगु खः धका धाःगु दु।

प्रचण्डया व्यवहारं थः दुःखी जुगु दु धका धासे पार्टी कार्यकर्ताहपिन्त बैठकमा धाःगु खः। नेपालं थः कांग्रेस व माओवादी निगु पार्टीपाखे न पीडित जुइमाःगु दु धका धाःगु खः।