येँ डेंगूया महमारी तसकं फैलै जुगु दु। थुगु इलय् डेंगूया बिरामी न्हिया न्हिथं अप्पोगु दु।

येँया क्षत्रपाटी निःशुल्क चिकित्सालय न डेंगूया बिरामी अस्पतालय् बेड मगाना त्रिपालतया बिरामीपिनिगु उपचार यायेत बाध्य जूगु दु।

चिकित्सालयया अध्यक्ष डा. मनोजमान श्रेष्ठं लहानान्युजयात बिगु जानकारी कथं थौंकन्ह्यः न्हि १५० म्ह ति डेंगु उपचार यायेगु लागि वयेगु याः।

सेवा शुल्क दगुलि उपचार यायेगु निति वयेगु याः सा सेवाः बिइ मफया च्वंगु दु। अस्पतालय् बेड मगाना त्रिपाल तया बिरामीपिनिगु उपचार याना च्वनागु दु। आः ४० म्ह ति भर्ना जुयाच्वंगु दु धका धयादीगु दु।

लुभुइ समालोचक अपर्णा प्रधानया प्यंगु सफू विमोचन जूगु दु। कुतः पिकाक न प्रकाशन याःगु समालोचक अपर्णा प्रधानं च्वयादीगु नेपालभाषाया यान्त्रिकपुर, ल्वहं द्यः, पुनर्जन्म व प्रतिविम्व नां सफू छगु ज्याझ्वः दथुइ विमोचन जूगु खः।

विमोचित सफू लघु बाखं संग्रह, आत्मवृत्तान्त व समालोचना संग्रह खः। ज्याझ्वलय् महालक्ष्मी नगरपालिकाया मेयर हरिगोबिन्द श्रेष्ठं लुभु क्षेत्रया सफू विमोचन यायेगु मौका बिःगुलि कुतः पिकाक व समालोचक प्रधानयात सुभाय् बिःगु खः।

लघु बाखं संग्रहय् टिप्पणी यानादीसे नेपालभाषा एकेडमीया सदीस्य सचिवज डा. पुष्पराज राजकर्णिकारं साहित्यिक ज्याझ्वःया याःगु उगु सफू महत्व व उकिइ अभिव्यक्त याइगु प्रभाव लिपा तकं लाइगु धका धयादीगु खः।

उगु ज्याझ्वलय् तिलक प्रकाश कायस्थ, कृष्णभक्त बोडे, विष्णु केशरी ताम्राकार, पूर्ण ताम्राकार, ई. रामबहादुर श्रेष्ठ, विमल ताम्राकार लगायतपिनिगु न ब्बति दुगु खः । समालोचक प्रधानं साहित्यय् थीथी विधाय् च्वयादीगु सफू आःतक २९ गु थ्यने धुकुगु दु।

किपू नगरपालिकां मापदण्ड विपरीत दयेकातःगु भौतिक संरचना थुना बिःगु दु। किपू नगरपालिकां १० नम्बर वडाय् मापदण्ड विपरीत निर्माण यानातःगु पखाः थौं थुनाबिःगु खः।

किपू नगरपालिकाया मेयर राजकुमार नकःमि पखाः मापदण्डं तोके याःगु स्वया बिपरित यानाः व नक्सा पास मयाःगुलिं नगरपालिकां नेपाल प्रहरी व नगरप्रहरीया ग्वाहालिं अनधिकृत रुपमा दयेकातःगु संरचनात थुनाःगु खः।

मेयर नकःमि ‘कम्पाउन्ड दयेकेगु नितिं नगरपालिकां मापदण्ड तोके यानातःसा छम्ह स्थानीय थःगु छेँ मापदण्ड विपरीत विना नक्सापास पखाः दयेका तःगुलिं थुनेमाःगु खँ धका धाःगु दु।

वंगु २४ घण्टाया दुने देयन्यक ४४४म्ह कोरोना संक्रमण जूगु दु।

अथेहे कोरोना सक्रमणं स्वम्ह सीगु दु। स्वास्थ्य तथा जनसंख्या मन्त्रालयया कथं ४ हजार ९५४ म्हेसिगु परीक्षण याःगुलि ४४४ म्हेसित कोरोना संक्रमण पुष्टि जूगु खः।

स्वास्थ्य मन्त्रालयया कथं १ हजार ९९६ म्हेसित पीसीआर परीक्षण याःगुलि २११ म्ह व २ हजार ९५८ म्हेसिगु एन्टिजेन परीक्षण याःगुलि २३३ म्हेसित संक्रमण जूगु खः।

अथेहे बिहीबाः कोरोना संक्रिय संक्रमितपि ४ हजार १९९ म्ह थ्यःगु दु। २४ घण्टाय् ३०७ म्ह संक्रमणमुक्त जूगु दु।

थौं बिहीवाः परिसूचक नेप्से १८.३० अंक (०.८९ प्रतिशत) कुहावया २०३९.५४ अंकय् बन्द जूगु दु। नेप्से कुवावया दक्को उपसूचक न घटे जूगु दु।

मेमेगु उपसूचक २.२ प्रतिशत व वित्त कम्पनी उपसूचक २.०७ प्रतिशतं कुहावंगु दु। अथेहे बजाः लिड याना च्वंगु बैंकिङ उपसूचक न ०.३६ प्रतिशत न कुहावंगु दु। बिहीबाः नेप्सेय् ४२ लाख ३४ हजार ११७ कित्ता सेयर किनबेच जुगुलि १ अर्ब ७१ करोड ७४ लाख ३७ हजारया कारोबार जूगु खः।

उकि मध्ये हिमाल दोलखा हाइड्रोपावरया ११ करोड २४ लाख ६५ हजारया कारोबार जूगुलि रिडी पावरया ९ करोड ४१ लाख २८ हजार व नेष्डो समृद्धि लघुवित्तया ८ करोड ३१ लाख ४० हजारया कारोबार जूगु खः। बिहीबाः बजारय् १८७ कम्पनीया सेयर कारोबार जूगुलि १६८ कम्पनीया सेयर भाः कुहावएगु दु। अथेहे १५ कम्पनीया सेयर भाः थहावंगुलि प्यंगु कम्पनीया सेयर भाः स्थिर जूगु दु।

बिहीबाः कारोबार जूगु मध्ये अपर हेवाखोला जलविद्युत् कम्पनीया सेयर भाः ९.९ प्रतिशतं थहावना सकारात्मक सर्किट भाः जूया बन्द जूगु खः। अथेहे रुरु जलविद्युत् कम्पनीया सेयर भाः ८.९३ प्रतिशतं थहावंगुलि नेष्डो समृद्धि लघुवित्तया सेयर भाः २.०७ प्रतिशतं थहावंगु दु।

मैलुङ खोला जलविद्युत् कम्पनीया सेयर भाः ५.८२ प्रतिशतं कुहावंगु दु सा मल्टिपर्पस फाइनान्सया सेयर भाः ४.२७ प्रतिशत व खानीखोला हाइड्रोपावर कम्पनीया सेयर भाः ४.१८ प्रतिशतं घटे जूगु खः।