सेयर बजाः थौं भचा सुधार जूगु दु। थौं बुधबाः सेयर बजाःया परिसूचक नेप्से २.८७ अंक (०.१४ प्रतिशत) न थहावंना २०५७.८५ अंकय् बन्द जूगु दु।

नेप्सेय् सामान्य सुधार जूसा कारोबार रकमय् धाःसा यक्को खनेमदु। आइतबाः २ अर्ब स्वया अप्पो कारोबार जूगुलि सोमबाः करिब १ अर्ब ७३ करोड व मंगलबार १ अर्ब ३३ करोडया कारोबार जूगु खः।

तर बुधबाः कारोबार रकम डेढ अर्ब स्वया अप्पो जूगु दु। नेप्सेय् बुधबाः ३६ लाख ७८ हजार ७०५ कित्ता सेयर किनबेच जूगुलि १ अर्ब ५२ करोड ६१ लाख ८६ हजारया कारोबार जूगु खः। उकि मध्ये अरुण कावेली पावरया १६ करोड ९२ लाख ६६ हजारया कारोबार जूगुलि अपी पावरया ८ करोड ८ लाख २५ हजार रिडी हाइड्रोपावरया ५ करोड ६४ लाख ६८ हजारया कारोबार जूगु खः।

मंगलबाः कारोबार जूगु मध्ये मन्दाकिनी हाइड्रोपावरया सेयर भाः १० प्रतिशत व अपर हेवाखोला जलविद्युत् कम्पनीया सेयर भाः ९.९९ प्रतिशतं थहावना सर्किट लेभलय् बन्द जूगु खः। अथेहे रुरु जलविद्युत् कम्पनीया सेयर भाः ५.८६ प्रतिशं थहावंगु दु।

अथेतु, सिद्धार्थ इक्विटी फण्डया इकाइ भाः ३.५८ प्रतिशतं कुहावंगु दु। गोर्खाज फाइनान्सया सेयर भाः २.३६ प्रतिशत व एनएलजी इन्स्योरेन्सया सेयर भाः २.३१ प्रतिशतं घटे जूगु दु।

वंगु २४ घण्टाया दुने देयन्यक थप ४८७ म्हेसित कोरोना संक्रमण पुष्टि जूगु दु।

अथेहे छम्ह सीउगु दु। स्वास्थ्य तथा जनसंख्या मन्त्रालयया कथं ४ हजार १७७ म्हेसिगु परीक्षण याःगुलि ६३४ म्हेसित संक्रमण पुष्टि जुगु खः।

स्वास्थ्य मन्त्रालयया कथं १ हजार ८०६ म्हेसिगु पीसीआर परीक्षण याःगुलि २४२ म्ह व २ हजार ३७१ म्हेसिगु एन्टिजेन परीक्षण याःगुलि २४५ म्हेसित संक्रमण पुष्टि जूगु धका मन्त्रालयं धाःगु दु।

थ्व नाप आःतक कोरोना भाइरसया सक्रिय संक्रमितपि ४ हजार २९८ म्ह थ्यःगु दु। लिपागु २४ घण्टाय् १६४ म्ह संक्रमणमुक्त जूगु दु।

येँ महानगरपालिकाया मेयर बालेन्द्र साह न अवैध संरचना दयकाचःगु दक्को थासय् हटे यानात्वतिइगु धका धाःगु दु।

बुधबाः न्यूरोडय् अवैध संरचना हटे यायेत थः हे फिल्डय् वना अवैध संरचना दयकातःगु तधःगु वा चिधःगु सूयात न मत्वतेगु धका धाःगु दु।

मेयर शाह न धाःगु दु, ‘काठमाडौं जिल्ला अदालतयात तक त्वते मखु,’ वयकलं धाःगु दु, ‘अवैध संरचना न्ह्याम्हेसिया दयकूगु जूसा कानुनया दायराय् हयेगु जुइ।’ बबरमहलय अत्याधुनिक शैलीइ दयकातःगु अदालतया अन्डरग्राउन्ड पार्किङ प्रयोग याःगु मदु। उकियाना व्यस्त सतका फुटपाथय् सेवाग्राहीपिन्स सवारी साधन पार्किङ यानाच्वंगु दु।

येँ महानगरपालिकां खिचापूखुलि च्वंगु आरबी कम्प्लेक्स न्ह्यने न डोजर चले याःगु दु।

काठमाडौं मल न्ह्यने नक्सा पास मयासे दयकूगु संरचना थुनेवं याना महानगरपालिकां आः खिचापूखुलि च्वंगु संरचना थुनेगु ज्याः न्ह्याकूगु दु।

महानगरपालिकां उगु् कम्प्लेक्स न्ह्यने संरचना थुनेगु ज्या आः जुयाच्वंगु दु। मेयर बालेन साहया उपस्थितिइ अवैध संरचनाय् डोजर न्ह्याका च्वंगु दु।

येँ महानगरपालिकां सुन्धाराय् च्वंगु काठमाडौं मलय् दयका तःगु अनधिकृत संरचना हटे याःगु दु।

बुधबाः सुथय् मेयर बालेन्द्र साह (बालेन) या उपस्थितिइ डोजर ज्वना अनधिकृत संरचना हटे याःगु खः। काठमाडौं उपत्यका ट्राफिक प्रहरी प्रमुख डीआईजी मीरा चौधरी नाप उगु टोली अन वंगु खः।

काठमाडौं मल कर्मचारी सञ्चय कोषया स्वामित्वय् दु। उगु भवन बालं कया अनधकिृत रुप नक्सा विपरीतया संरचना दयका उपयोग यानावया च्वंगु खः।