नेकपा एकीकृत समाजवादीया सम्मानित नेता नाप पूर्व प्रधानमन्त्री झलनाथ खनालं गठबन्धनपाखे थःपिनिगु पाटीयात अपमान याउगु द्धपः बिउगु दु।

बुधवाः समाजवादी प्रेस संगठन नेपाल, जिल्ला शाखा येँया ग्वसालय् जुगु छगु ज्याझ्वलय् सम्बोधन यायेगु झ्वलय् सम्मानित नेता खनालं अथे धयादीगु खः।

वयकलं गठबन्धनया हे कारण थःगु पार्टी न गुलि हयेमाःगु सिट व मत हये मफुगु दाबी यानादीगु खः। सम्मानित नेता खनालं आः ९ लाख मतदाता पार्टीइ दुगु खःसा थुगु ल्याः झन्डै २० लाख बराबर दु धका धयादीगु खः।

सम्मानित नेता खनालं रुस व युक्रेनया हताःया कारण क्यना सरकारं पेट्रोलियम पदार्थय् भाः थकाउगु थःपिनिगु पार्टीया बिरोध दु धका धयादीगु खः।

नेपाल मजदुर किसान पार्टीया अध्यक्ष नारायणमान बिजुक्छेंया जहान मन्त।

बिजुक्छेया जहान शोभा प्रधान उपचारया झ्वलय् थौं बुधबाः यलया हरिसिद्धिइ नेपाल क्यान्सर अस्पतालय् ६२ दँय् मदुगु खः।

नीदँ निसे क्यान्सर ल्वचं पीडित जुयाच्वम्ह स्वन्हु न्ह्यःनिसे क्यान्सरं च्यापे जुया अस्पताल प्रधान थौं बुधबाः न्हिनय् उपचारया झ्वलय् मदुगु धका नेपाल क्यान्सर अस्पतालया मेडिकल निर्देशक डा. सुदीप श्रेष्ठं जानकारी बिउगु खः।

यल महानगरपालिका २० वडा युवा समितिया ग्वसालय् छवाः तक न्ह्याउगु मन्तब्य कला व उद्घोषण प्रशिक्षण क्वचाःगु दु।

यलया ख्वाय् बहीइ लोटस रिसर्च सेन्टरय् जुगु प्रशिक्षण ज्याझ्वलय् नीम्हेसिगु सहभागिता दुगु खः। लोटस रिसर्च सेन्टरया हलय् जुगु समापन समारोहय् यल महानगरपालिका २० वडाध्यक्ष चन्द्रलाल महर्जन मूपाहाँ न दसिपौ लल्हानादीगु खः। वयकलं थःगु नुगः खँ तयेगु झ्वलय् वडां भौतिक विकास जक प्राथमिकताय् मतस्ये वडाय् च्वपिनिगु आर्थिक, सामाजिक नाप ब्यक्तित्व विकासयात न ध्यान बिइ धका धयादीगु खः।

थुग प्रशिक्षण ज्याझ्वलय् छवाःया दुने प्रशिक्षण मन्तब्य नाप उद्घोषण कलापाखे जुगु प्रगतिं थः तसक प्रभावित जुयागु दु धका धयादीगु खः।

नेपाली काँग्रेस २० वडा इकाई समिति सभापति नाप वडा सदस्य शैलेन्द्र शाक्यया सभाध्यक्षतय् जुगु उगु ज्याझ्वलय् वडा सदस्यपि गीता महर्जन, इकाई उपसभापति नाप प्रशिक्षण संयोजक रामगोपाल महर्जन, प्रशिक्षक सुरजवीर बज्राचार्यपिन्स थः थःगु खँ तयादीगु खःसा प्रशिक्षार्थीपिपाखे सानुलाल महर्जन, हिराकाजी शाक्य, मदन महर्जन, प्रमिला शाक्य, पुनिता श्रेष्ठ, रुपकृष्ण कर्माचार्य, राजेन्द्र महर्जन, दुर्गालक्ष्मी शाक्यपिन्स थःपिनिगु  अनुभव कनादीगु खः।

क्रोधकला शिरोमणि धका हस्तकला ख्यलय् नांजाम्ह प्राज्ञ कालु कमालेया डकुमेण्ट्री पितब्वज्या जुगु दु।

उगु ज्याझ्वलय् यलय् निर्वाचितजूपि जनप्रतिनिधिपिन्त न भिन्तुना देछागु खः। उगुु ज्याझ्वलय् बागमति प्रदेशया सांसद शोभा शाक्य व नेपाल ललित कला प्रज्ञा प्रतिष्ठानया कुलपति के के कर्माचार्यया विशेष उपस्थिति दूगु खः।

ज्याझ्वलय् क्रोधकला शिरोमणि कुमालें यलया मेयर चिरिबाबु महर्जनया नापं वडाध्यक्षपिन्त भिन्तुना देछाना दीगु खः। उगु ज्याझ्वलय् कालु कमालेया आधिकारीक वेबपेज सार्वजनिक याःगु खःसा डकुमेण्ट्री न पितब्वज्या याउगु खः।

कुमार यात्रुं च्वयादीगु उगु डकुमेण्ट्रीया अवधारणाव सम्पादन नवराज लामां यानादीगु खः।