वंगु २४ घण्टाया दुने देयन्यक २७१ म्हेसित कोरोना भाइरस संक्रमण पुष्टि जूगु दु। अथेहे छम्हेसिगु ज्यान वंगु दु।

स्वास्थ्य तथा जनसंख्या मन्त्रालयया कथं २ हजार ४८५ म्हेसित पीसीआर परीक्षण याःगुलि २२४ म्ह व १ हजार ४३५ म्हेसित एन्टिजेन परीक्षण याःगुलि ४७ म्हयाना २७१ म्हेसित संक्रमण पुष्टि जूगु दु धका मन्त्रालयं धाःगु दु।

२४ घण्टाय् १७५ संक्रमणमुक्त जूगु दु।

मंसिर ४ गते जुइगु प्रदेश व प्रतिनिधिसभा चुनावय् सिटया बाँडफाँट यायेत च्वंगु सत्ता गठबन्धनया शीर्ष नेतापिनिगु बैठक निष्कर्षय् थौं न मथ्यःगु दु।

बहनि ५ बजेनिसे ८ बजेतक सिट बाँडफाँट यायेगु विषय छलफल यायेत शीर्ष नेतापिनिगु सहमतिइ मजुगु कन्ह्यः हाकन बैठक च्वनिइगु धका धाःगु दु।

चुनावी तालमेल यायेगु इलय् थःपिन्त १०० सिट माः धका दावी नेपाली कांग्रेसं याःगु दु। माओवादीं ६०, नेकपा एकीकृत समाजवादीं ४०, जसपां ३२ व जनमोर्चा न निगु सिटया दावी याःगु खः।

नेवाः पत्रकार राष्ट्रिय दबु धादिङ जिल्लाय् स्वक्वःगु जिल्ला अधिवेशन थौं क्वचाःगु दु।

थौं जुगु अबिधेशनं सर्बसम्मत कथं अध्यक्षय् सन्तोषराज श्रेष्ठयात ल्यःगु दु।

अथेहे उपाध्यक्षय् राजाराम डङ्गोल, सचिवय् लक्ष्मी शाक्य, कोषाध्यक्षय् मनिश श्रेष्ठयात ल्यःगु खः।

अथेहे दुजलय् कल्पना श्रेष्ठ, सुजन श्रेष्ठ व सुरेश श्रेष्ठयात सर्वसम्मतं ल्यःगु खः।

भाषा आयोगया सिफारिस कथं वाग्मती प्रदेशय् नेपालभाषा व तामाङभाषायात प्रदेशया कामकाजि भाषा यायेगु वाग्मती प्रदेशया मुख्यमन्त्री राजेन्द्र प्रसाद पाण्डें बचं बियादीगु दु ।

भाद्र १४ गते मंगलवाः भाषा आयोगया सिफारिसयात कार्यान्वयन यायेगु सवालय् वयकःया हे निवासय् जूगु सहलहया झ्वलय् वयकलं अथे बचं बियादीगु खः। सहलह ज्याझ्वलय् सस्कृति पर्यटन तथा नागरिक उड्डयनमन्त्री जीवनराम श्रेष्ठ, नेवाः देय् दबूया केन्द्रीय अध्यक्ष पवित्र बज्राचार्य, उपाध्यक्ष उमेश स्थापित, सचिव मचाराजा महर्जन, स्वनिगः विशेष प्रदेशया अध्यक्ष श्रीकृष्ण महर्जनया उपस्थिति दुगु खः ।

उगु इलय् देय् दबू स्वनिगः विशेष प्रदेशया अध्यक्ष महर्जनं भाषा आयोगया सिफारिस कथं काभ्रे जिल्लाया मण्डनदेउरपुर नगरपालिकापाखें दयेका राजपत्रय् तकं पिकाये धुंकूगु ऐनया प्रतिलिपि लःल्हानादीगु खः। अनं लिपा सनिलय् हाकनं नापलाना स्वनिगः विशेष प्रदेशया अध्यक्ष महर्जनं मन्त्री पाण्डेयात भाषा आयोगं याःगु सिफारिस पौ, भाषा आयोगं संस्कृति पर्यटन तथा नागरिक उड्डयनमन्त्रालययात च्वःगु पौ, संस्कृति पर्यटन तथा नागरिक उड्डयन मन्त्रलायपाखें वाग्मती प्रदेशया संस्कृति तथा पर्यटन मन्त्रालययात च्वःगु पौ नापं प्रदेशया नितिं भाषा सम्वन्धि प्रस्तावित मस्यौदा ऐन तकं लःहायेगु यानादीगु खः ।

उगु इलय् मन्त्री पाण्डें गुगु नं हालतय् थःगु कार्यकतालय् भाषा आयोगया सिफारिस कथं नेपालभाषा व तामाङ भाषायात कामकाजि भाषाया नितिं ज्या याना वनेगु बचं बियादीगु खः ।

राष्ट्रिय परीक्षा बोर्डं कक्षा १२ या लिच्वः सार्वजनिक यायेगु तयारी याःगु दु।

बोर्डया अध्यक्ष महाश्रम शर्मा न लिच्वः सार्वजनिकया तयारी जुयाच्वंगु दु तर गुगु इलय् यायेगु धका धाःसा निर्णय जुगु मदनि धका जानकारी बिःगु दु।

वंगु जेठ १६ गतेनिसे २५ गतेतक सञ्चालन जुगु १२ कक्षाय् परीक्षा जुगलि ४ लाख स्वया अप्पो परीक्षार्थीपिनिगु सहभागी जुगु धका  बोर्ड न धाःगु दु।

राष्ट्रिय परीक्षा बोर्डया परीक्षा नियन्त्रण कार्यलयं थुगु पटक स्वगु किसिमया लिच्वः सार्वजनिक यायेत्यःगु दु। आंशिक, ग्रेड वृद्धि व नियमित विद्यार्थीपिनिगु ब्यागलं ब्यागलं याना स्वगू किसिमया लिच्वः सार्वजनिक यायेगु परीक्षा नियन्त्रक कृष्णप्रसाद शर्मा जानकारी बिःगु दु।

ग्रेड अप्पोकेगु व आंशिक परीक्षार्थीया लिच्वः अक्षराङ्कन पद्धति कथं प्रकाशन जुइगु व नियमित पाखे परीक्षार्थीया लेटर ग्रेडिङ जुइ धका धाःगु दु।