यल महानगरपालिकाया मेयर चिरीबाबु महर्जन व ख्वप नगरपालिकाया मेयर सुनिल प्रजापति दथुइ भेटवार्ता जुगु दु।

मेयर महर्जन व प्रजापति दथुइ निगु सहरया सांस्कृतिक महत्वयात कायम यासे सम्पदा पुनःनिर्माणया नीतिबारे छलफल जुगु खः।

छलफल यायेगु निति मेयर महर्जन ख्वप नगरपालिका कार्यालयय् वंगु खः। निम्ह मेयर दथुइ सम्पदा पुननिर्माणय् ख्वप नगरपालिका न्ह्यने जुगु धका धासे सांस्कृतिक महत्वया सम्पदा संरक्षणय् यल महानगरपालिका न विशेष ज्याझ्वः सञ्चालन याना च्वनागु दु धका धयादीगु खः।

मेयर महर्जनं ख्वपया सम्पदा संरक्षणय् यानाच्वंगु नीति व योजनाबारे जानकारी कयादीगु खः।

स्वनिगलय् हैजाया बिरामीपि बढे जुयावंगु दु। म्हिगः थप निम्हेसित हैजा पुष्टि जुगु दु।

थ्व नाप असार २ गतेनिसे असार १५ गते तक येँ जक १४ म्हेसित हैजाको सङ्क्रमण पुष्टि जुइ धुकुगु दु धका स्वास्थ्य तथा जनसङ्ख्या मन्त्रालयया प्रवक्ता डा. सङ्गीता मिश्रां जानकारी बिउगु दु। वयकःया कथं हैजा पुष्टि जुपि प्यम्ह मिसा व झीम्ह मिजंपि खः।

हैजा फैलै जुगु मुख्य कारण दूषित लः खः धका धाउगु दु। हितिं वइगु लः, बोतल\जारया लाः व जमिन दुनेया लःया प्यंगु नमुना परिक्षण याउगुलि कोलिफर्म जीवाणु लुगु खः। अथेहे यलय् १८ गु लखय् नमुना याउगुलि १२ गु नमुनाय् इकोलिन लुगु दु धका धाउगु दु।

थौं बुधबाः सेयर बजाः नेप्से परिसूचक ४१.३९ अंकं थहावंगु दु।

दोहोरो अंकं थहावना नेप्से १९६२.७१ बिन्दुइ थ्यना कारोबार रकम १ अर्ब ४३ करोड १४ लाख थ्यःगु दु। बुधबाः थौं २२८ कम्पनीया ४३ लाख ८६ हजार कित्ता सेयर २९ हजार ४३४ पटक खरिद बिक्री जुगु खः।

बुधबाः थौं आँधीखोला लघुवित्त, सीवाईसी लघुवित्त व बरुण हाइड्रोपावर कम्पनीया सेयर थहावंगु दु। अथेहे मैलुङखोला जलविद्युत्, नेपाल इन्भेष्टमेन्ट बैंक डिभेन्चर २०८४ व नबिल ब्यालेन्स फन्ड घटे जुगु दु।

बुधबार कारोबार जुगु २२८ कम्पनी मध्ये ९ कम्पनीया सेयर थहावंगु दु।

लुम्बिनी प्रदेशया स्वास्थ्य, जनसङ्ख्या व परिवार कल्याण राज्यमन्त्री विमला वलीं राजीनामा बिउगु दु।

वलीं थ्व वंगु असार १२ गते राजीनामा मुख्यमन्त्री कुलप्रसाद केसी याउगु खःसा थौ बुधवाः प्रदेश सभाया बैठकय् जानकारी बिउगु दु। राजीनामा स्वीकृत जुगुु दु धका मुख्यमन्त्री केसीं धाउगु दु।

वंगु जेठ अन्तिमय् वलीं दाङया वाईसीएल नेता एकराज बस्नेतया छेँय् वना वया जहान ज म्ह्याय्यात अभद्र व्यवहार याउगु धासे उजुरी दर्ता जुगुलि छानबिन यायेत प्रदेश सरकारं स्वम्हेसिगु सदस्यीय समिति गठन याउगु खः।

सेयर बजारय् थौं नेप्से परिसूचक ११.८२ अंक घटे जुया १९२१.३१ बिन्दुइ कुहावंगु दु। सोमबाः परिसूचक २३.८५ अंकं घटे जुया १९३३.१३ बिन्दुइ कुहावंगु दु।

कुल २३० कम्पनीया २३ हजार १३३ कारोबारपाखे ३० लाख ३७ हजार ६८० कित्ता सेयर खरिद बिक्री जुगुलि १ अर्ब ५ करोड ८२ लाख ६३ हजार ५२२ रुपैयाँया कारोबार जुगु खः।

मंगलबार बैंकिङ व जीवन बीमा समूह जक थहावंगु दु सा मेगु दक्को समूह घटे जुगु दु। सीवाईसी नेपाल लघुवित्त, उन्नत सहकार्य लघुवित्त, एग्रिकल्चर डेभलप्मेन्ट बैंक लिमिटेड, सनराइज फर्स्ट म्युचअल फन्ड थहावंगु दु।

अथेहे लक्ष्मी इक्विटी फन्ड, जनरल इन्स्योरेन्स कम्पनी, युनाइटेड आईडीआई मार्दी आरबी हाइड्रोपावर लगायतया कम्पनी घटे जुगु दु।