येँ बन्द याकाच्वपि २५ म्ह बन्दकर्तापिन्त प्रहरी ज्वःगु दु। नेत्रविक्रम चन्द विप्लव नेतृत्वया नेकपापि नाप प्यंगु पार्टीया आह्वान थौं बन्द याका वयाच्वपि २५ म्हेसित प्रहरीं ज्वःगु खः।

बन्दया कारण चिकाकःगु दुरीया गाडी सामान्य रूपं चले जुगु दु। ताःहाकःगु दुरीया गाडी धाःसा फाट्टफुट्ट जक चले जुगु दु।

थौंया बन्द विप्लव नाप ऋषि कट्टेल अध्यक्ष दुगु नेपाल कम्युनिस्ट पार्टी, वैज्ञानिक समाजवादी कम्युनिस्ट पार्टी नेपाल व नेकपा (माओवादी समाजवादी) पिनिगु समर्थन दुगु खः।

एमसीसी सम्झौता खारेज व महँगी नियन्त्रणलगायतया माग तया थौंया बन्द आह्वान याःगु खः।

फुटपाथ व्यापारीपिन्स येँ महानगरपालिकाया कार्यालय नाराबाजी याःगु दु। महानगरं फुटपाथ व्यवस्थापन यायेगु धासे चिधःगु व्यवसायीपिन्त हटे याःगु धासे फुटपाथय् व्यवसाय याइपि व्यवसायपि महानगरपालिकाय् वना नाराबाजी याःगु दु।

उमिसं मेयर बालेनयात नापलाना ज्ञापन पौं बुझे यायेत स्वःगु खःसा वास्ता मयागुलि नाराबाजी याःगु खः। जिमीगु म्वायेगु अधिकार सुनिश्चित याः, रोजगारीया ग्यारेन्टी याः, फुटपाथ व्यवसायीपिन्त व्यवस्थापन याः, गाँसबासया ग्यारेन्टी याः, श्रमया सम्मान याः, नगर प्रहरीया अत्याचार बन्द याः, विना विकल्प धोका बिइ दइ मखु धका नारा लगे याःगु खः।

स्वतन्त्र राष्ट्रवादी स्वरोजगार श्रमिक संघर्ष समितिया नामय् ज्ञापन पौं लःल्हावंपि उमिसं स्वगु बुँदे माग छवाः दुने पूरा मयासा तधःगु आन्दोलन यायेगु चेतावनी बिःगु दु।

श्रृजनशील लघुवित्त वित्तीय संस्था लिमिटेडं १५ भदौनिसे धितोपत्रको प्राथमिक सार्वजनिक निष्कासन (आईपीओ) बिक्री खुल्ला याइगु जुगु दु।

लघुवित्तं आःतक कायम जारी पूँजी १० करोड ९३ लाख ७५ हजार रुपैयाँया ३६ प्रतिशत सार्वजनिक निष्कासन याइगु जुगु दु।

कम्पनीं नेपाल धितोपत्र बोर्डपाखे प्रतिकित्ता १०० रुपैयाँ अंकित भाःया ३ करोड ९३ लाख ७५ हजार रुपैयाँ बराबरया ३ लाख ९३ हजार ७५० कित्ता सेयर सार्वजनिक निष्कासन यायेत अनुमति काःगु दु।उकिमध्ये कुल सार्वजनिक निष्कासन जुइगु सेयरमध्ये जारी पुँजीया ०.५ प्रतिशतं ५ हजार ४७० कित्ता कर्मचारीपिनिगु लागि व सर्वसाधारणया लागि छुटे याःगु सेयरमध्ये ५ प्रतिशत अर्थात् १९ हजार ६५० कित्ता सेयर सामूहिक लगानी कोषपिन्त सुरक्षित याःगु खः।

ल्यः दनिइगु ३ लाख ६८ हजार ५९० कित्ता सेयरया लागि सर्वसाधारण लगानीकर्तापिन्त आवेदन बिइ फइगु जुगु दु। आईपीओ याकन १९ भदौ व उगु इलय् न माक्वः आवेदन मववसा २९ भदौ तक थप याइगु जुगु दु। कम्पनीं आईपीओ निष्कासनया लागि धितोपत्र निष्कासन व बिक्री प्रबन्धकय् सनराइज क्यापिटल लिमिटेड याइगु जुगु दु।

इष्टर्न हाइड्रोपावर लिमिटेडं आयोजना प्रभावित जू थाय् च्वपिनिगु लागि ७ भदौ थौंनिसे धितोपत्रया प्राथमिक सार्वजनिक निष्कासन (आईपीओ) बिक्री खुल्ला याःगु दु।

कम्पनीं प्रतिकित्ता १०० रुपैयाँ अंकित भाःया ६ करोड २० लाख रुपैयाँ बराबरया ६ लाख २० हजार कित्ता सेयर सार्वजनिक याःगु दु। थौं पिकागु आईपिओ आयेजना प्रभावित क्षेत्र भोजपुर जिल्लाय् च्वपिन्स आवेदन बिइ फइगु जुगु दु।

लगानीकर्तापिन्स न्यूनतम १० कित्तानिसे अधिकतम १ लाख कित्ता सेयरया लागि आवेदन बिइ फइगु जुगु दु।

निष्कासन बन्द याकन २१ भदौ व उगु इलय् न माग कथं आवेदन मवसा ५ असोज तक बिए फइ धका धाउगु दु। कम्पनीं भोजपुर जिल्लाय् ५ मेगावाटया पिखुवा खोला जलविद्युत् आयोजना निर्माण सम्पन्न याना विद्युत उत्पादन यानाच्वंगु खः।

दाङय् च्याम्ह बन्दकर्तापिन्त प्रहरी ज्वःगु दु। बन्द झ्वलय् सतकय् अवरोध याःपि तुलसीपुरपाखे प्यम्ह व घोराहीपाखे प्यम्हेसित बन्द याकाच्वंगु झ्वलय् प्रहरीं ज्वःगु खः।

तुलसीपुरपाखे नेत्रविक्रम चन्द विप्लव नेतृत्वया नेकपा निकट युवा संघ नेपाल दाङया संयोजक सुदर्शन शेर्पाइली, उपाध्यक्ष दीपेन्द्र वली, जनपत्रकार संघया जिल्ला अध्यक्ष हेमन्त प्रकाश वली व अखिल नेपाल क्रान्तिकारी टे«ड युनियन महासंघया केन्द्रीय सदस्य सञ्जय वलीपिन्त ज्वःगु धका जिल्ला प्रहरी कार्यालय दाङका प्रहरी नायब उपरीक्षक राजनकुमार गौतमं धाःगु दु।

अथेहे घोराहीपाखे अखिल क्रान्तिकारी दाङया संयोजक खुमन पौडेल, जिल्ला सदस्य हिमाल केसी, टार्जन वली व प्रकाश बुढामगरयात प्रहरी ज्वःगु खः।