नेपाल विद्युत् प्राधिकरणं मंगलबाःनिसे थीथी थासय् चार्जिङ स्टेसनया उपकरण तयेगु सुरु याःगु दु।

ऊर्जा जलस्रोत तथा सिंचाइमन्त्री पम्फा भुसालं नेपाल विद्युत् प्राधिकरणया रत्नपार्कय् केन्द्रीय कार्यालयय् स्थापना जूगु चार्जिङ स्टेसन याइगु जुगु दु।

प्राधिकरणं चार्जिङ स्टेसन पूर्वाधार विकास आयोजनाया कथं न्हापागु चरणय् तयातःगु ५१ गु चार्जिङ स्टेसन धमाधम जडान यायेगु ज्या जुयाच्वंगु दु। चार्जिङ स्टेसन जडानया लागि सिभिल पूर्वाधार निर्माणं ज्या लगभग क्वचाःगु दु।

छु ई दुने ५१ गु थासय् चार्जिङ स्टेसन तयेगु प्राधिरकणया आज्जु दु। थ्व नाप साझा पुल्चोक, साझा बल्खु, हल्चोक व त्रिभवन अन्तर्राष्ट्रिय विमानस्थलय् न चार्जिङ स्टेसन तयेगु योजना दु।

प्राधिकरणं बिर्तामोड, दमक, विराटनगर, इटहरी, बेलाका, सुनसरी बसपार्क, लाहान, बर्दिबास व सिन्धुलीमाडीइ चार्जिङ स्टेसन स्थापना यायेत्यःगु दु।

अथेहे खुर्कोट, बनेपा, पथलैया, हेटौंडा, चितवन, मुग्लिन, धार्के, पोखरा, बर्दघाट, बुटवाल, भैरहवा, चन्द्रौटा, लमही, कोहलपुर, लम्की, अत्तरीया, महेन्द्रनगर व सुर्खेतय् चार्जिङ स्टेसन तयेगु ग्वसाः दु।

लुँया भाः तोलां थौं स्वसः थहावंगु दु। लुँ तोलां स्वसः थहावना ९४ हजार ८ सय रुपैयाँ तोके याःगु दु धका नेपाल सुनचाँदी व्यवसायी महासङ्घं धाःगु दु।

अथेहे वहः भाः धाःसा थौं स्थिर जुगु दु। वहः म्हिगः हे तोलाया १ हजार १ सय ४५ रुपैयाँ न कारोबार जूगु दु धका महासङ्घं धाःगु दु।

२०७८ सालया मदन पुरस्कार डा. नवराज लम्सालया कविता संग्रह अग्निया बिइगु जुगु दु।

मदन पुरस्कार गुठीया साधारण सभां अग्नियात मदन पुरस्कार बिइगु निर्णय याःगु दु धका अध्यक्ष कुन्द दीक्षितं जानकारी बिःगु दु।

अथेहे २०७८ सालया जगदम्बा–श्री पुरस्कार बनारसपाखे प्रकाशित ‘उदय’या सम्पादक दुर्गाप्रसाद श्रेष्ठ बिइत्यःगु दु। निगु हे सिरपाया राशी म्हति ४ लाख रुपैयाँ याःगु खः।

सिरपा नरस्वां पिइगु कन्ह्य कुन्हु बिइत त्यःगु खः।

वंगु २४ घण्टाया दुने देयन्यक १७३ म्हेसित कोरोना भाइरस संक्रमण पुष्टि जूगु दु।

स्वास्थ्य तथा जनसंख्या मन्त्रालयया कथं २ हजार ८३९ म्हेसिगु परीक्षणय् १७३ म्हेसित संक्रमण पुष्टि जुगु खः।

६४३ म्हेसिगु पीसीआर परीक्षणय् ६५ म्ह व २ हजार १९६ म्हेसिगु एन्टिजेन परीक्षणय् १०८ म्ह याना १७३ म्हेसित संक्रमण पुष्टि जूगु दु।

वंगु २४ घण्टाय् ३९६ म्ह संक्रमणमुक्त जुगु दु धका मन्त्रालयं धागु दु। आःतक देयन्यक कोरोना भाइरसया सक्रिय संक्रमितपि ३ हजार १२ म्ह थ्यःगु दु।

नेवाः समुदायपिनिगु आस्थाय् घाः लाका व्यंग्य याःगु धाःसे कमेडियन अपूर्व क्षितिज सिंहविरूद्ध जिल्ला प्रहरी परिसर येँ जाहेरी बिःगु दु।

थौं शनिबाः नेवाः समुदायया अभियन्तापिन्स टेकुइ वना सिंहविरूद्ध जाहेरी बिःगु खः। सिंह न स्ट्यान्डअप भिडिओ कमेडी क्याफेया युट्युब च्यानलपाखे ‘नेवाः परम्परा’ शीर्षकय् तःगु खः।

नेवा समुदायया भाषा, संस्कृति नाप सभ्यताय् लक्षित यासे अपमानजनक व्यंग्य याःगु धासे जाहेरी बिःगु खः। जाहेरीइ मतियार जूपिन्त तक कारबाहीया माग याःगु दु।

सिंहं हाँस्यव्यंग्य यायेगु झ्वलय् नेपाल भाषा, नयेगु व मिसापिन्त व्यंग्य याःगु द्धपः बिःगु खः। सिंहविरूद्ध ८५ म्हेसित जाहेरी बिःगु खः।