Display Style:
Column Style
स्वनिगलय् छवाःतक फोहोरया समस्या जुइगु
लहनान्युज | थिंलागा आमै ११४३, पुस ८ शुक्रवाः
स्वनिगलय् मेगु छवाः तक फोहोरया व्यवस्थापन यायेत समस्या जुइगु दु । फोहोर वायेगु थाय् नुवाकोटया सिसडोलंनिसें दीर्घकालीन रुपं फोहोर व्यवस्थापन यायेगु कथं दयेकूगु बञ्चरेडाँडा तक वनेगु निगू किलोमिटर ताःहाकःगु लँ दयेकेमाःगुलिं वइगु छवाः तक फोहोर व्यवस्थापन याये मफइगु खँ धाःगु दु ।
सहरी विकास मन्त्रालयं फोहोरया गाडी वयेवने याइबलय् लँ दयेकेगु ज्याय् समस्या वःगु धासें येँ महानगरपालिकायात छुं न्हि फोहोरया गाडी छ्वया महयेत याःगु इनाप कथं आःया नितिं फोहोर व्यवस्थापनया ज्या दिकेत्यंगु खः । थुकिं यानाः आः थनिंनिसें स्वनिगःया झिंच्यागू स्थानीय तहया फोहोर व्यवस्थापनया ज्या दीगु खँ धाःगु दु ।
स्वनिगलं न्हिं १२०० मेट्रिक टन फोहोर सिसडोलय् वांछ्वयाः व्यवस्थापन यायेगु ज्या जुयाच्वंगु दु । थुकी मध्ये नं दकलय् अप्वः येँ महानगरपालिका दुनें न्हिं ५०० मेट्रिक टन फोहोर उत्पादन जुयाच्वंगु दु । निजी व येँमनपाया निसः गः गाडीं फोहोर यंकेगु यानाच्वंगु खःसा थौंकन्हय् धाःसा न्यय्गः गाडी जक सिसडोल थ्यनाच्वंगु दु ।
स्वनिगलय् उत्पादन जुइगु फोहोर मध्ये ७५ प्रतिशत फोहोर सिसडोलय् व्यवस्थापन याना वयाच्वंगु दु ।
लुँ तोलां न्यासः थहावन
लहनान्युज | थिंलागा चर्तुदशी ११४३, पुस ७ बिहीवा.
लुँ तोलां थौं स्वसः थहावःगु दु। थौं लुँ तोलां स्वसः थहावना १ लाख १ हजार ५ सय रुपैयाँ थ्यःगु दु धका नेपाल सुनचाँदी व्यवसायी महासङ्घं धाःगु दु।
अथेहे वहः तोलां न न्यातका थहावःगु दु। थौं वहः तोलां न्यातका थहावना १ हजार ४ सय ५ रुपैयाँया न कारोबार जुगु दु धका महासङ्घं धाःगु दु।
न्हुपि सांसदपिन्स पद व गोपनीयताया शपथ ग्रहणयात
लहनान्युज | थिंलागा चर्तुदशी ११४३, पुस ७ बिहीवाः
सभाया न्हुपि निर्वाचित सांसदपिन्स थौं बिहीवाः पद व गोपनीयताया शपथ ग्रहण याःगु दु।
सङ्घीय संसद् भवनया हल न्हुगु बानेश्वरय् प्रतिनिधि सभाया ज्येष्ठ सदस्य पशुपतिशम्सेर जबरां सांसदपिन्स शपथ बिःगु खः।
थौं २६ म्ह सांसदपिन्स मातृभाषां सपथ काःगु दु सा मेपिन्स नेपाली भाषां काःगु खः। शपथ नाप सङ्घीय संसद् सचिवालयं सांसदपिन्त लोगो न वितरण याःगु खः।
बुंगद्यः व याकः मिसाया मूर्ति पाञ्ञुपिनिगु आपत्ति
लहनान्युज | थिंलागा चर्तुदशी ११४३, पुस ७ बिहीवाः
किपूया प्यंगः थां लागाय् बुंगद्यःया मूर्ति व याकः मिसाया मुर्ति तय्गु नितिं छुं दिं न्ह्यः जक जात्रा हे यानाः यलंं किपुलिइ तक मूर्ति हल । मूर्ति जात्रा यानाः हःगुलिं यक्व मनूत लय् नं ताःगु खः । सकलसिनं बांलाःगु ज्या जुइत्यन धकाः तकं धयाच्वंगु खः । तर अथे मूर्ति तय्गु नितिं मूर्ति हःगु छुं दिं लिपा हे बुंगद्यःया पान्जुपिनिगु संगठनं विज्ञप्ति पिकाय्वं विवादया खँ सार्वजनिक जूगु दु । विवादया खँ पिहांवय्वं सकलसिनं न्ह्यसः तयाहःगु दु, ‘थ्व छु जूगु खः ?’ धार्मिक ख्यलय् हे गुगु कथं विवादया खँ पिहांवल धकाः तकं आः समाजय् चर्चा जुयाच्वंगु दु ।
घटनाक्रम कथं वंगु मंसीर १५ गते यलंं बुंगद्यःयानापं याकः मिसाया किपूया मुर्ति प्यंगःथामय् जात्रा यानाः यंकूगु खः । वयां लिपा मंसीर १९ गते श्री ह्यगृव भैरव अले ३२ पानेजु संघया नायः यज्ञरत्न शाक्यया ल्हाःचिं दुगु विज्ञप्ति छगू जारी जुल । विज्ञप्तिइ किपूया प्यंगःथामय् अथे मूर्ति तय्त्यंगु थःपिन्सं सामाजिक सञ्जालपाखें जक सीका काय्माःगुलिं अजूचाःगु खँ न्ह्यथनातःगु दु । विज्ञप्तिइ धयातःगु दु, ‘किपूया प्यंगःथां धार्मिक व पौराणिक कथं तसकं महत्वपूर्णगु थाय् खः । किपूया पवित्र थाय् प्यंगःथां किपू, गन बुंगद्यःया प्रतिनिधि जल पानेजुं शक्ति स्वरुप कन्या कुमारी अर्थात याकः मिसायात स्वां मब्यूसे जाउला जात्रा याय्मज्यूगु परम्परा लिसें मान्यता दु । आः उगु थासय् बुंगद्यःया मूर्ति व याकः मिसाया मूर्ति तय्धुंकाः बुंगद्यःया प्रतिनिधि जल पानेजु किपुलिइतक लाकां हे मन्ह्याःसे न्यासि वनाः स्वां ब्यूवनेगुया औचित्य मन्त ।’
थुगु कथंया खँ उल्लेख यानातःगु विज्ञप्ति पिहांवय्वं बुंगद्यःनाप स्वापू दुपिं जक मखु, मेमेपिं नं अजू चाःगु दु, थ्व छु खः धकाः । बास्तवय् बुंगद्यःया रथ जात्राया झ्वलय् ज्याउलाख्यलय् रथ साले प्यन्हु न्ह्यः किपूया प्यंगःथामय् याकः मिसायात स्वां ब्यूवय्माःगु चलन दु । किपुमितय्सं बुंगद्यःयात थःपिनि जिलाजं धाय्गु यानाच्वंगु दु । बुंगद्यः किपूया याकः मिसायाथाय् ख्यालि वयाच्वंगुलिं रथ सालेत बुंगद्यःयात काय्त वःगु धइगु याकःमिसायात स्वां ब्यूवइगु खः धाय्गु यानाच्वंगु दु । न्ह्यागु हे जूसां बुंगद्यः व किपूया याकः मिसाया स्वापू अवश्य नं दुगु खँ संस्कृतिपाखें हे स्पष्ट क्यनाच्वंगु दु ।
अले बुंगद्यःया जात्राया झ्वलय् याकः मिसाया भुज्याः धइगु नं दु । याकः मिसा भुज्याः धकाः मिसातय्सं जक बुंगद्यःया रथयात सालीगु खः । अबले किपूया मिसात वना बुंगद्यःया रथ सालेमाः धाइ । अथे हे ज्याउलाख्यलय् रथ जात्राया इलय् किपूमितय्गु पूजा नापनापं बाजं ज्वनावनेमाः धइगु मान्यता दु । उगु जात्रायात किपूमितय्सं थःपिनिगु हे जात्रा कथं नाला वयाच्वंगु दु । थ्व ल्याखं स्वल धाःसा किपू, प्यंगःथां, याकः मिसा नापं बुंगद्यःया स्वापू यच्चुक खनेदु ।
अथे हे, बुंगद्यःनाप स्वापू दुगु अवस्थाय् प्यंगःथामय् तःगु मूर्तिया सवालय् विवाद ब्वलनावःगुलिं किपूया प्यंगःथांया बारे नं मनूतय्सं च्यूताः तयाहःगु दु । बुंगद्यःया पानेजुपिन्सं विज्ञप्ति पिकाय्गु जक मखु, लिपा वनाः ला थुगु कथंया समस्यायात समाधान याय्गु नितिं इनाप यासें गुठी संस्थानयात तकं पौ च्वयाः दर्ता यानादीगु दु । छखे किपुलिइ स्वां तःवनेगुया औचित्य मन्त धकाः विज्ञप्ति पिकाय्गु अले हाकनं समस्या समाधानया नितिं पलाः ल्ह्वनेत गुठी संस्थानयात इनाप याःगुयात मनूतयसं अर्थपूर्ण रुपं कयाहःगु दु ।
किपूया प्यंगः थामय् गुगु कथं बुंगद्यःया मूर्तिनाप याकः मिसाया मूर्ति तय्गु ज्या यानाच्वंगु धइगु सुखी गःछेँ समाजपाखें खः।
उगु समाजया नायः रामकुमारी महर्जनं थःपिन्सं मदिक्क न्यादँ न्ह्यःनिसें हे पानेजुपिंलिसे अथे मूर्ति तय्गु नितिं सहलह ब्याका वयाच्वनागु अवस्थाय् पान्जुपिन्सं आकाझाकां विज्ञप्ति पिकाःगुलिं थःपिं अजूचाःगु धयादिल । वय्कलं बुंगद्यःया मूर्ति व याकःमिसाया मूर्ति काःवनेत तकं पान्जुपिन्त खबर यानागु दाबी यासें पान्जुपिनिगु हे इनाप कथं वाङ्मय शताब्दी पुरुष सत्यमोहन जोशीलिसे नं गुलि खँय् सहलह ब्याकेगु ज्या यानागु, गुथि संस्थाननिसें पुरातत्व विभागयात तकं समन्वय यानागु अले पुरातत्व विभागं स्वीकृति तकं ब्यूगु खँ कनादिल ।
अथे हे मूर्ति तय्गु नितिं बुंगद्यःया जात्रानाप स्वापू दुपिं घःकूतलिसे नं मदिक्क हे सहलह ब्याकाच्वनागु धासें वय्कलं थःपिं निरन्तर रुपं आः नं सहलह ब्याकावनेत तयार दुगु धयादिल । छुं नं कथंया समस्या सहलहपाखें हे समाधान जुइगु विश्वास दुगु धासें नायः रामकुमारी महर्जनं गुुठी संस्थान, पुरातत्व विभाग, बुंगद्यःया पानेजुनिसें सकललिसे खुल्ला रुपं सहलह ब्याकावनेत थः तयार दुगु खँ लहना वाःपौयात कनादीगु दु ।
रञ्जिता श्रेष्ठं थारु व सुमना श्रेष्ठं नेपालभाषं शपथ काइगु
लहनान्युज | थिंलागा चर्तुदशी ११४३, पुस ७ बिहीवाः
थौं संसदय् जुइगु शपथ ग्रहण ज्याझ्वलय् रास्वपाया सुमना श्रेष्ठं नेपालभाषं शपथ काइगु जुगु दु। अथेहे नेकपा एमालेया राज अहमद फारुकीं उर्दु, नेकपा माओवादी केन्द्रया हितबहादुर तामाङ, मिना तामाङ, सूर्यमान तामाङपिन्स तामाङ भाषां शपथ कायेत निवेदन बिःगु दु।
माओवादी केन्द्रया महिन्द्र राय यादवं हिन्दी भाषां व उमरावती देवी भोजपुरी भाषां शपथ काइगु जुगु दु। रौतहट निर्वाचन क्षेत्र नम्बर २ पाखे स्वतन्त्र रुपं निर्वाचित सांसद किरण कुमार साहं संस्कृत भाषां शपथ काइगु जुगु दु। राष्ट्रिय स्वतन्त्र पार्टी (रास्वपा) या सांसद असिम शाहं नेपाली÷मुस्लिम भाषां शपथ कायेगु निति निवेदन बिःगु दु।
रास्वपाया सांसद लक्ष्मी तिवारीं अवधि, मनिष झाले न मैथली शपथ काइगु जुगु दु। राप्रपाया अशोक कुमार चौधरी, नागरिक उन्मुक्ति पार्टीया रञ्जिता श्रेष्ठ, अरुणकुमार चौधरी व गंगाराम थारु व स्वतन्त्र सांसद लालवीर चौधरीपिन्स थारु भाषां शपथ काइगु जुगु दु। अथेहे जनमत पार्टीया सोनु मुर्मु सन्थाली भाषां, जनमत पार्टीया चन्द्रकान्त (सीके) राउत, बिनिता कुमारी सिंह व अनिता देवीं मधेशी भाषां शपथ काइगु जुगु दु।
