चितवनया भरतपुर महानगरपालिका–६ या वडाध्यक्षय् नेपाली कांग्रेसया उम्मेदवार कृष्णलाल श्रेष्ठ निर्वाचित जुगु दु।

श्रेष्ठं नेकपा एमालेया डोलनारायण अधिकारीयात पराजित याउगु खः।

अथेहे, भरतपुरय् आःतक् २७ हजार ४३८ मतगणना जुइ धुकुगुलि प्रमुख पदय् सत्ता गठबन्धनया नेकपा (माओवादी केन्द्र) या उम्मेदवार रेनु दाहालं ९ हजार ९७० मत काये धुकुगु दु सा एमालेया उम्मेदवार विजय सुवेदीं ८ हजार २८५ मत काउगु दु।

अथेतु स्वतन्त्र उम्मेदवार जगन्नाथ पौडेलं ४ हजार ५०४ मत हःगु दु।

येँ महानगरपालिका–३ या अध्यक्षय् नेकपा एमालेया प्रेम थापा निर्वाचित जुगु दु। थापां २ हजार १३८ मत नापा प्यानलय् हे निर्वाचित जुगु खः।

थापाया निकटतम् प्रतिद्वन्दी नेपाली कांग्रेसया राजेश अधिकारी १ हजार ४९१ मत हःगु खः।

थापाया प्यानलय् मिसा सदस्य सीता थापा, दलित मिसा सदस्यय् शर्मिला परियार, खुला सदस्यय् केशवप्रसाद श्रेष्ठ व कृष्ण चालिसे निर्वाचित जुगु खः।

शंखरापुर नगरपालिकाया प्रमुखय् राप्रपाया रमेश नापित विजयी जुगु दु।

वयकःया निकटतम प्रतिद्वन्द्वी नेकपा एकीकृत समाजवादीया उम्मेदवार एलपी श्रेष्ठयात ४९८ मतं पराजित यासे नापित निर्वाचित जुुगु खः।

निर्वाचन आयोगया कथं नापितं ४७०० मत हःगु खःसा समाजवादीया उम्मेदवार लक्ष्मीप्रसाद श्रेष्ठं ४२०२ मत हःगु खः।

यल महानगरपालिका वडा ६ या वडाध्यक्षय् नेपाली कांग्रेसया रुपेन्द्रराज शाक्य निर्वाचित जुगु दु।

शाक्यं १३१८ मत हःगु खःसाः नेकपा एमालेया यशकुमार शाक्यं ५७६ मत हःगु खः। अथेहे राप्रपाया रमिता शाक्यं १३१ मत हःगु खः।

यल महानगरपालिकाया वडा ५ य् एमालेया विकासमान श्रेष्ठ निर्वाचित जुगु दु।

श्रेष्ठं १०७९ मत हया निर्वाचित जुगु खःसा नेपाली काँग्रेसया संजिप पाण्डें ५९२ मत हःगु खः।