किपूलिइ ऐतिहासिक व साँस्कृतिक सम्पदायात जगेर्ना नाप पर्यटन प्रबद्र्धनया लागि थ्व हे वइगु श्रावण २७ गते शुक्रबाः चान्ह्यः सम्पदा यात्रा जुइगु दु।

थ्व २७ गते चान्ह्यः सम्पदा यात्रा जुइगु धका जोशी ननी हेरिटेज होम्सय् थौं छगु पत्रकार सम्मेलन याना जानकारी बिउगु खः। परम्परागत रूपं सापारु कुन्हु हना वयाच्वंगु “बहाः चाः हिलेगु” थुगुसि पर्यटन प्रबद्र्धन यायेगु निति प्रचार यायेगु कथं ज्याझ्वः जुइ धका थौं छगु पत्रकार सम्मेलनयासे जानकारी बियादीगु खः।

उगु सम्पदा यात्राय् किपूया ५३ थासय्  अवलोकन याकेत्यःगु खः। लिच्छबीकालनिसे किपूया नेवाः बस्ती, विहार, चिभाः व चुकः नाप स्वापू दुगु सम्बन्धित सभ्यताया अवलोकन याये दइगु कथं सम्पदा यात्रा जुइत्यःगु धका धाउगु दु।

उगु थासय् अप्पो याना बन्द हे जुयाच्वनिइगु जुगुलि उगु दिं बहाः बहीइ दुने द्यःया अवलोकन याये दइ धका ग्वसाः खलकं धाउगु दु।

वंगु २४ घण्टाया दुने देयन्यक थप ९१२ म्हेसित कोरोना संक्रमण पुष्टि जुगु दु। अथेहे छम्हेसिगु ज्यान वंगु दु।

स्वास्थ्य तथा जनसंख्या मन्त्रालयया कथं ६ हजार ४९१ म्हेसिगु परीक्षण याउगुलि ९१२ म्हेसित संक्रमण पुष्टि जुगु दु।

उकि मध्ये २ हजार ९४१ म्हेसिगु पीसीआर परीक्षण याउगुलि ५२९ म्ह व ३ हजार ५५० म्हेसिगु एन्टिजेन परीक्षण याउगुलि ३८३ म्हेसित संक्रमण जुगु दु धका मन्त्रालयं धाउगु दु।

थ्व नाप कोरोना भाइरसया सक्रिय संक्रमितपिनिगु ल्याः ५ हजार ७६० म्ह थ्यःगु दु सा ३७० म्ह संक्रमणमुक्त जुगु दु।

शेयर बजाः थौं शुक्रवाः ३४ दशमलव ८५ अङ्कं घटे जुगु दु। थौं नेप्से २ हजार १ सय १३ दशमलव ३० बिन्दुइ कुहावंगु दु।

थौं म्युचल फन्डबाहेक दक्को समूहया शेयर घटे जुगु दु सा बीमा, विकास बैंक, व्यापार, फाइनान्स व जलविद्युत् समूहया शेयर यक्को अङ्कं कुहावंगु दु।

शेयर बजारय् २१३ गु कम्पनीया ६४ लाख १६ हजार कित्ता शेयर २ अर्ब ६२ करोड रुपैयाँया कारोबार जुगु दु। दकलय् अप्पो शिवम् सिमेन्ट्सया १५ करोड ६६ लाख रुपैयाँया शेयर किनबेच जूगु दु।

थौं मैलुङ खोला जलविद्युत् कम्पनीया शेयर ७ प्रतिशत स्वया अप्पो घटे जुगु दु। समग्र बजाः घटे जूसां जोशी जलविद्युत् कम्पनीया शेयर ६ प्रतिशत स्वया अप्पो थहावंगु दु।

लुँया भाः थौं न तोलां न्ह्यसः थहावंगु दु। थौं लुँया भाः तोलां न्ह्यसः थहावना ९६ हजार ८ सय रुपैयाँ थ्यःगु दु।

वहः तोलां न थौं झीतका थहावंगु दु। वहः तोलां न झीतका थहावना १ हजार २ सय २० रुपैयाँ न कारोबार जुगु दु।

येँ महानगरपालिका वडा नं. १३ पाखें वडाध्यक्ष ध्रुवनारायण मानन्धरं छगू वक्तव्य पिकासें घरबाटो सम्बन्धी छगू विवादय् असम्बन्धित मनूतय्सं न्हिंन्हिं वडा कार्यालयय् वयाः वडाया ज्याय् पंगः थं वयाच्वंगु खँ ध्यानाकर्षण याउगु दु ।

येँया १३ वडा दुने छगू जग्गा राष्ट्रिय वाणिज्य बैंकपाखें लिलाम यानाः मी धुंकाः उकियात माःगु लँ बीगु खँय्् विवाद पिहां वःगु खः। १३ वडाया अध्यक्ष मानन्धरं धयादीकथं १३ वडा दुने लाःगु छेँबुँ लिलाम जुइबलय् वडाया प्रतिनिधि समेत तयेमाःगु खः। तर थ्व मुद्दाय् २४ वडाय् च्वनाः बैंकं गोप्य रुपं जग्गा लिलाम याना छ्वःगु खनेदु । लिलाम बारे वडायात छुं जानकारी तकं मबिउ।

थज्याःगु मामिलाय् घरबाटो बीगु गैरकानुनी जुइगु खने दुगुलिं वडापाखें घरबाटो मबिउगु खँ वय्कलं कनादीगु दु। थःथःपिं जक च्वनाः याःगु उगु लिलामय् जग्गा न्याना काःम्ह गौतमराज खड्का नांयाःम्ह मनुखं दंक जग्गा न्याना कायेगु लागिं अथे थःथः जक च्वनाः लिलामया ज्या क्वचायेकूगु खनेदु धाःगु दु ।

जग्गा न्याना काःपिं मनूतय्सं धाःसा वडा अध्यक्ष मानन्धरं २ करोड दां माग याःगु व उगु ध्यबा मबिल धकाः घरबाटो मबिउगु खः धासें पोष्टर हे तिकाः प्रचार यानाच्वंगु दु। वडा अध्यक्ष मानन्धरं थ्व मुद्दायात थःपिंसं हे अख्तियारय् उजुरी तयेधुनागु जूगुलिं अनया फैसला पीत इनाप यानादीगु दु ।

वय्कलं लिलामय् सहभागी बैंक व जग्गा न्याःपिं मनूत थःगु खँ न्यनेत तयार जुइधुंकूसां थौंकन्हय् असम्बन्धित मनूत सक्रिय जुयाः ख्याच्वः बिउ वयाच्वंगु खँ नं कनादिल ।