येँ महानगरपालिका वडा २७ या अध्यक्ष पदय् नेपाली कांग्रेसया उम्मेदवार योगेशकुमार खड्गी निर्वाचित जुगु दु।

अथेहे वडाया महिला सदस्य नेपाली कांग्रेसया उम्मेदवार सृष्टि कंसाकार वडा सदस्य पदय् दिनेश श्रेष्ठ व धर्म प्रजापती निर्वाचित जुगु खः।

दलित महिला सदस्य पदय् नेकपा एमालेया उम्मेदवार प्रभा परियार निर्विरोध निर्वाचित जुगु खः।

नागार्जुन नगरपालिका मेयरय् नेपाली कांग्रेस उम्मेदवार मोहनबहादुर बस्नेतं १० हजार १८६ मत हया निर्वाचित जुगु दु ।

वयकःया निकटतम प्रतिद्वन्द्वी एमालेया नन्दन हरि गौतमं ८ हजार ३६८ मत हःगु खः। अथेहे राप्रपाया उम्मेदवार ध्रुव प्रसाद खनालं २ हजार ४६९ मत हःगु खः। अथेतु।

उपमेयरय् एमालेया उम्मेदवार सुशिला अधिकारीं ९ हजार ४७४ मत हया निर्वाचित जुगु दु। वयकःया निकटतम प्रतिद्वन्द्वी राप्रपाया कल्पना नेपालीं २ हजार ७५३ मत हःगु खः।

कांग्रेसनाप गठबन्धन याउगु नेकपा एकीकृत समाजवादीया कृष्णहरि खत्रीं २ हजार १२६ मत जक काउगु खः।

येँ महानगरपालिका– २७ य् स्वतन्त्र उम्मेदवार बालेन्द्र साह स्वया एमाले उम्मेदवार केशव स्थापित न्ह्यने लाउगु दु।

‘कोर एरिया’ दु न्हापागु वडाय् ल्याखागुलि आःतक २ हजार ७१७ मत गणना जुगुलि स्थापितं ८०४ मत हया न्ह्यने लाउगु दु।

अथेहे कांग्रेसया सिर्जना सिंहं ६९५ मत, स्वतन्त्र उम्मेदवार शाहं ४३८ मत मेम्ह स्वतन्त्र उम्मेदवार सुमन सायमी न तिकिझ्याः ३१७ मत हःगु दु।

मेगु वडा नम्बर २५ य् न ल्या खाय् धुकुगु दु।

काभ्रेया धुलिखेल नगरपालिकाया मेयरय् नेकपा एमालेया अशोककुमार ब्याञ्जु श्रेष्ठ निर्वाचित जुयादीगु दु।

वय्कलं ८३५१ मत हया निर्वाचित जुयादीगु खः। वय्कःया निकटतम प्रतिस्पर्धी स्वतन्त्र उम्मेदवार विदुर बहादुर बस्नेतं ७४११ मत हःगु खः।

अथेहे उपमेयरय् नेपाली कांग्रेसया निराजन जंगम निर्वाचित जुयादीगु खः। वय्कलं ७९३८ मत हःगु खःसा एमालेया लालतारा अधिकारीइ ७७९१ मत कयादीगु खः ।

१२ वडा दुगु धुलिखेलय् ६ वडाय् नेपाली कांग्रेस, ५ वडाय् एमाले व १ वडा राप्रपाया उम्मेदवारं वडा अध्यक्ष खः।

यल महानगरपालिका वडा १५ या वडाध्यक्षय् एमालेया सुरेश बहादुर शाही निर्वाचित जुगु दु।

शाही १०६६ मत काउगु खःसाः वय्कःया प्रतिस्पर्धी एकिकृत समाजवादीया सुदर्शन मिश्रं १०३३ मत काउगु खः।

अथेहे नेपाली कांग्रेसया कमल कुमार विष्ट ७७४, राप्रपाया तोफा राइ नं १३९  मत कयादीगु खः।