सूर्यविनायक नगरपालिकाया मेयर व उपमेयर निगुलि हे नेकपा एमाले विजयी जुगु दु।

मेयरय् एमालेया बासुदेव थापा १४७५८ मतं विजयी जुगु खः। वयकःया निकटतम प्रतिस्पर्धी नेपाली कांग्रेसया निशान ढुङ्गेलं १३२३२ मत काउगु खः।

अथेहे उपमेयरय् एमालेया सरिता भट्टराई (तिमिल्सिना) न १४४९० मत हया विजयी जुगु खःसा नेपाल कम्युनिष्ट पार्टी (एकिकृत समाजवादी) या श्याम सुन्दर बस्नेतं ६ हजार ६ सय ६१ मत हःगु खः।

यल महानगरपालिका वडा नम्बर १० य् झीकःतक वडा अध्यक्ष त्याःम्ह नरसिंह व्यञ्जनकार थुगु पटक पराजित जुगु दु।

२०७९ या स्थानीय तह निर्वाचनय् झीछकःगु पटक वडा अध्यक्ष पदय् स्वतन्त्र रुपं प्रतिस्पर्धाय् याउगु खः।

तर थुगु पटक थः हे काय्चा रविनमान व्यञ्जनकार नाप २८२ मतं पराजित जुगु दु।

८१ दँ दुम्ह नरसिंहं ५४३ मत काउगु खःसा नेपाली कांग्रेसया रविनमानं ८२५ मत कया वडाध्यक्षय् निर्वाचित जुगु खः।

गोदावरी नगरपालिकाया प्रमुखय् नेपाली कांग्रेसया उम्मेदवार गजेन्द्र महर्जन १ हजार ६० मतं नेकपा एमालेया उम्मेदवार स्वया न्ह्यने लानच्वंगु दु।

नगरपालिका निर्वाचन अधिकृतया कार्यालयं कथं महर्जनं १४ हजार २१८ मत काउगु दु सा एमालेया गम्भीर रानां १३ हजार १५८ मत काउगु दु।

अथेहे उपप्रमुखय् कांग्रेसया मुना अधिकारीं १४ हजार २०७ मत काउगु दु सा एमालेया रमी प्रधानांगं ११ हजार ८९७ मत हःगु दु।

१४ वडा दुगु गोदावरी नगरपालिकाय् आः वडा नम्बर १२ य् मतगणना जुयाच्वंगु दु।

यल महानगरपालिकाया प्रमुखय् कांग्रेसया चिरिबाबु महर्जन न्ह्यने हे लानाच्वंगु दु।

महानगरया २९ मध्ये न्ह्यगू वडाय् २१ हजार ४२७ मतगणना ल्याखाये धुकुलि ११ हजार ९२० मत हये धुकुगु दु।

अथेहे एमालेया उम्मेदवार हरिकृष्ण व्यञ्जनकारं ५ हजार ५७० मत हःगु दु। उपप्रमुखय् एमालेया मञ्जली शाक्यं ५ हजार ९८३ मत काउगु दु सा गठबन्धनया बाबुराज बज्राचार्य न ४ हजार ५६६ मत काउगु दु।

येँ महानगरपालिकाया उपमेयर उम्मेदवार सुनीता डङ्गोलं आः न न्ह्यने हे लानाच्वंगु दु।

नेकपा एमालेया डङ्गोलं ४२ हजार ९४९ मत ल्याखागुलि १६ हजार ९२ मत काये धुकुगु दु।

गठबन्धनया उपमेयरया उम्मेदवार रामेश्वर श्रेष्ठं ५ हजार १६७ मत काउगु दु सा राष्ट्रिय प्रजातन्त्र पार्टीया बिनिता मगैया न ३ हजार ५४८ मत काउगु दु।