चीनया लागि  प्रस्तावित राजदूत विष्णुपुकार श्रेष्ठया नां संसदीय सुनुवाइ समितिं अनुमोदन याउगु दु।

थौं मंगलबाः सुनुवाइ समितिं श्रेष्ठ व दक्षिण अफ्रिकाया लागि प्रस्तावित राजदूत दानबहादुर तामाङया नां अनुमोदन याउगु खः।

निम्हेसिगु विरुद्ध समितिइ उजुरी वंगु मदु। ल्यदनिइगु प्रस्तावित १८ राजदूतपि विरुद्ध उजुरी दुगुलि व सुनुवाइ यायेत कन्ह्यः बुधबाः बैठक सःतूगु दु।

यल महानगरपालिकाय् आःतक १३ हजार ८१६ मतगणना क्वचाय् धुकुगु दु।

लिपागु मत कथं सत्ता गठबन्धनया नेपाली कांग्रेसया उम्मेदवार चिरिबाबु महर्जनं ७ हजार ७०२ मत कया न्ह्यने लानाच्वंगु दु सा वयकःया प्रतिस्पर्धी हरिकृष्ण व्यञ्जनकारं ३ हजार ३७४ मत काउगु दु।

अथेहे उपप्रमुखय् नेकपा (एमाले) या उम्मेदवार मञ्जली शाक्यं ३ हजार ९६५ मत काउगु दु सा गठबन्धनपाखे नेकपा (माओवादी केन्द्र) या उम्मेदवार बाबुराज बज्राचार्य न २ हजार ७१५ मत काउगु दु।

चितवनया भरतपुर महानगरपालिकाय् माओवादी केन्द्रया रेनु दाहालं एमालेया उम्मेदवार विजय सुवेदीयात कडा टक्कर बियाच्वंगु दु।

आःतक १८ हजार ४ सय ४७ मत ल्याखाये धुकुगुलि रेनु दाहालं ६ हजार १ सय ७० मत काउगु दु सा एमालेया विजय सुवेदी ६ हजार ८० मत काउगु दु।

अथेहे उम्मेदवार जगन्नाथ पौडेलं ३ हजार ६ मत हःगु दु। उपमेयरय् कांग्रेसया चित्रसेन अधिकारीं ७ हजार ५ सय २४ व राप्रपाया हिमला गुरुङं ४ हजार ९ सय ९२ मत काउगु दु।

येँ महानगरपालिकाया उपमेयरय् एमालेया सुनिता डंगोलं १० हजार ४ सय ७७ मत काये धुकुगु दु।

अथेहे एकीकृत समाजवादीया उम्मेदवार रामेश्वर श्रेष्ठं ३ हजार ४८ मत व राप्रपाया बिनिता मगैया न १७०९ काउगु दु।

येँ महानगरपालिकाय् स्वतन्त्र उम्मेदवार बालेन शाह न २६ हजार ६ सय ७८ मत ल्याखाय् धुकुगुलि १० हजार ७ सय ९७ मत काये धुकुगु दु।

अथेहे एमालेया मेयर उम्मेदवार केशव स्थापित ५ हजार ७ सय ८७ मत व नेपाली कांग्रेसया सिर्जना सिहं ५ हजार ७४ मत काउगु दु।