निर्वाचन आयोगं निर्वाचनय् खटेजुपि कर्मचारीपिन्त छु न दल व उम्मेदवारपि नाप झुके मजुइत निर्देशन बिःगु दु। शनिबाः विशेष निर्देशन जारी यासे प्रमुख निर्वाचन आयुक्त दिनेश थपलियां धाःगु दु, ‘व्यक्तिगत, संस्थागत नाप पदीय रुपं स्वतन्त्र व निष्पक्ष जुया छु न राजनीतिक दल वा उम्मेदवारपि नाप झुके मजूसे मतदान व मतगणना सम्बन्धी कार्य सम्पादन याः।’

अथेहे थपलिया धाःगु दु, ‘निर्वाचनया कार्य सम्पादन यायेगु झ्वलय् प्रत्यक्ष व अप्रत्यक्ष रूपं प्रभाव, दबाब, भनसुन, धम्की, थेजाःगु वयेफु । तर छु न इनाप, पूर्वाग्रहपाखे प्रेरित व प्रभावित मजुसे निष्ठापूर्वक निर्वाचन सम्पन्न यायेत व याकेत प्रतिबद्ध जुया न्ह्यावनेमाः।’ राजनीतिक दल, उम्मेदवार व निर्वाचन प्रतिनिधि नाप मेमेपि मनूया स्वार्थ व प्रभावय् लाना छु ज्या मयायेगु नाप मतदान व मतगणना सम्बन्धी विवाद निरूपण यायेगु इलय् पक्षपिनिगु प्रभावपाखृ स्वतन्त्र जुया समाधान यायेत धयागु दु।

मतदान अधिकृत, मतगणना अधिकारी व कर्मचारीपिनिगु जिम्मेवारी काये दइगु गर्वया विषय जुगु उल्लेख यासे प्रमुख आयुक्त थपलियां जिम्मेवारी गरिमा व मर्यादायात कायम यासे मतदान व मतगणनाया ज्या मर्यादित व व्यवस्थित दयकेगु संकल्प यायेमाः धका धयागु दु।

निर्देशनय् नेपाःया संविधान, प्रचलित ऐन, कानून, आचारसंहिता, निर्वाचन सम्बन्धी निर्देशिका, कार्यविधि व निर्देशनया पूर्ण रूपं पालना यायेगु, मतपत्र, मतपेटिका व मेमेगु निर्वाचन सामग्रीया दुरूपयोग यायेके मबिइत धइगु दु। ‘सू ना न म्वाः मदुगु ज्या यायेत स्वल धाःसा कानुन कथं प्रतिकार यायेमाः अज्यागु ज्याया मतियार जुइ मजू’ निर्देशनय् उल्लेख याःगु दु।

नापं, आयोगं मतदान व मतगणना सम्बन्धी ज्या सम्पादनया झ्वलय् राजनीतिक दल, उम्मेदवार, कर्मचारी, अनुगमनकर्ता, पर्यवेक्षक, नागरिक समाज मिडियाकःमि मतदातालगायत सकसित आदरभाव व समान व्यवहार यायेत न धाःगु दु।

निर्वाचन आयोगं निम्ह बहालवाला मन्त्रीपिन्त जरिवाना याःगु दु।

सहरी विकासमन्त्री मेटमणि चौधरीयात २५ हजार व स्वास्थ्य नाप जनसंख्यामन्त्री भवानीप्रसाद खापुङयात ५ हजार रुपैयाँ जरिवाना यायेगु निर्णय जुगु दु धका आयोगया छम्ह अधिकारीं जानकारी बिःगु दु।

थ्व स्वया न्ह्यः, निर्वाचन आचारसंहिता उल्लंघनया विषय आयोगं उमित स्पष्टीकरण काःगु दु। अथेहे, आयोगं सहरी विकास मन्त्रालयं छु न्ह्यः जक स्वीकृत न्ह्यगू योजना बदर यायेत निर्देशन बिःगु दु।

शुक्रबाः सहरी विकास मन्त्रालयया सचिवयात पौं च्वया आयोगं उगु निर्णय बदर यायेत निर्देशन बिःगु खः। मन्त्रालयं थ्व हे मंसिर १ गते सचिवस्तरीय निर्णय न थी थी न्ह्यगु योजना स्वीकृत याःगु आयोगयात जानकारी बिःगु दु।

प्रेस काउन्सिल नेपालं सञ्चार माध्यमया नां दुरुपयोगयाना राजनीतिक दल व उम्मेदवारया बारेय् सामाजिक सञ्जालय् अफवाहपूर्ण, दुष्प्रचार याःगु धाःसे आपत्ति क्यःगु दु।

कन्ह्यः आइतबाः जुइगु प्रतिनिधिसभा व प्रदेशसभा निर्वाचनय् मौन अवधिइ थीथी सञ्चार माध्यमं मास्टहेड छ्यला थीथी दल व उम्मेदवारया बुखँ शनिबाः सामाजिक सञ्जालपाखे सम्प्रेषण जुगु खः। अथेहे समाचार सामग्रीया सम्बन्धय् सम्बन्धित मिडियानाप जानकारी माग यासे उगु शीर्षकय् समाचार सम्प्रेषण मयागु व मखुगु समाचार जुगु जानकारी वयेवं काउन्सिलया सहप्रवक्ता नाप उपप्रशासकीय अधिकृत रामशरण बोहरां धाःगु दु।

काउन्सिलं निर्वाचनय् प्रभाव यायेगु कथं अफवाहपूर्ण, दुष्प्रचारयुक्त, फेक न्युजपाखे सजग जुइत इनाप याःगु दु । निर्वाचनया संवेदनशील इलय् प्रभाव यायेगु उद्देश्यं छु न माध्यमपाखे दुष्प्रचारयुक्त, मखुगु सूचं, भ्रामक टिकाटिप्पणी मयायेत व सामाजिक सञ्जालपाखे तक पोष्ट, सेयर, कमेन्ट मयायेत काउन्सिलं इनाप याःगु दु।

राष्ट्रपति विद्यादेवी भण्डारीं निर्वाचनय् उत्साहपूर्वक ब्बति कायेत इनाप यानादीगु दु। थौं शनिबाः छगु सन्देश जारी यानादीसे राष्ट्रपति भण्डारीं मतदान नागरिक अधिकारया उच्चतम अभ्यास जुगुलि सकसितं उत्साहपूर्वक सहभागिता जुइत इनाप यानादीगु खः।

वयकलं निर्वाचनयात स्वतन्त्र, निष्पक्ष व भयरहित वातावरण कायम याना ताःलाकेत निर्वाचन आयोग‚ सुरक्षा निकाय‚ राष्ट्रसेवक नाप सम्बन्धित सकसित इनाप याःगु दु। ‘निष्पक्ष‚ भयरहित व स्वतन्त्र वातावरणय् नागरिकपिनिगु मताधिकार छ्यला सम्पन्न जुइगु आमनिर्वाचनपाखे लोकतान्त्रिक प्रणाली व संस्था जनउत्तरदायी जुयावनी’ धका सन्देशय् राष्ट्रपति भण्डारीं धयादीगु दु, ‘थुगु शासन प्रणालीइ जनतापिन्स माःगु सुशासन व पारदर्शिता स्थापित यायेत ग्वाहालि जुइ।’

आवधिक निर्वाचनं जनताय् निहित सार्वभौमसत्तायात औपचारिक रूपं अभिव्यक्त यासे राज्यशक्तिया वास्तविक स्रोत जनताय् दुगु प्रमाणित याइ धका वयकलं धयादीगु खः। 

निर्वाचन आयोगं निर्वाचनया तयारी दक्को पूरा जुइ धुकुगु धका धाःगु दु। कन्ह्यः आइतबाः जुइगु प्रतिनिधिसभा व प्रदेशसभा सदस्य निर्वाचनया लागि माःगु दक्को तयारी पूरा जुइ धुकुगु दु धका धाःगु दु।

थौं शनिबाः आयोगय् जुगु पत्रकार सम्मेलनय् प्रमुख निर्वाचन आयुक्त दिनेशकुमार थपलियां स्वच्छ, स्वतन्त्र, निष्पक्ष व भयरहित वातावरणय् निर्वाचन सम्पन्न यायेत माःगु दक्को तयारी पूरा जुइ धुकुगु दु धका धाःगु दु।

वयकलं स्थिर इलय् आचारसंहिताय् प्रभावकारी कार्यान्वयनया लागि निर्वाचन अनुगमन टोली व मतदान ज्याय् खटेजूपि कर्मचारी नाप सुरक्षाकःमिपाखे तक सूक्ष्म अनुगमनया ज्या जुयाच्वंगु जानकारी बिःगु दु। मतदानया दिं माःगु सेवाया लागि सञ्चालन जुइगु व सञ्चारकःमि, पर्यवेक्षक, अनुगमनकर्तालगायत सवारीसाधनयात न्यनेम्वाःगु व्यवस्था जुगु दु धका वयकलं धयादस्गु दु।

प्रमुख निर्वाचन आयुक्त थपलियां सवारी आवागमनया उपयुक्त प्रबन्ध मिले यायेत सम्बन्धित प्रमुख जिल्ला अधिकारीपिन्त व तोके यानातःपि अधिकारीपिन्त इनाप याये धुकःगु जानकारी बिःगु दु।