माओवादी अध्यक्ष प्रचण्ड स्वन्हुया लागि भारत भ्रमण नेकपा (माओवादी केन्द्र) या अध्यक्ष पुषपकमल दाहाल प्रचण्ड थौंनिसे न्वन्हुया निति भारत भ्रमण वनेत्यःगु दु।

भारतीय जनता पार्टी (भाजपा)या निमन्त्रणय् प्रचण्ड थौं न्हिनयु १ बजे भ्रमणया लागि नयाँ दिल्ली वनिइगु जुगु दु।

वंगु लत्या न्ह्यः नेपाःया लागि तत्कालीन भारतीय राजदूत विनय मोहन क्वात्रां भारत भ्रमणया निति ब्बःगु खः धका प्रचण्डया सचिवालयं धाउगु दु।

सचिवालयया कथं प्रचण्ड जुलाइया निगु वाः दुने भ्रमण सम्भव जुइ धका धासा भाजपाया अध्यक्ष जगतप्रकाश नड्डा न औपचारिकरुपं भ्रमणय् ब्वनेवं  वनेगु क्वःछिगु खः।

प्रचण्डया भारत भ्रमणबारे बिहीबाः च्वंगु माओवादीया स्थायी समिति बैठकय् न छलफल जुगु खः। प्रचण्ड साउन १ गते आइतबाः स्वदेश लिहावइ।

नेपाल सरकार शिक्षा विज्ञान तथा प्राविधिक मन्त्रालय पाठ्यक्रम विकास केन्द्रया महानिर्देशक अणप्रसाद न्यौपानेयात नापलाना गुगु व झिगू तगिमय् भाषानाप ऐच्छिक विषय कम्प्युटर, गणित चिइकेत माग याःगु दु।

उगु इलय् महानर्दिशक न्यौपानें थःगुपाखें अर्थात पाठ्यक्रम विकास केन्द्रपाखें भाषा जक दुथ्याका ब्यागलं कथंया पुचः दयेके फइमखु उकिया नितिं मन्त्रिपरिषद्ं हे निर्णय यायेमाः धकाः धयादीगु दु।

मंगलवाः नेवाः तय्गु राष्ट्रिय संगठन नेवाः देय् दबू व तामाङ तय्गु राष्ट्रिय संगवठन नेपाल तामाङ घेदुङया संयोजनय् महानिर्देशक न्यौपानेयात नापलागु खः। थ्व स्वया न्ह्यः शिक्षामन्त्री देवेन्द्र पौडेलयात न भाषाया विषयनाप ऐच्छिक विषय कम्प्युटर, गणित विषययात भाषानाप भाषा हे ऐच्छिक विषय तयेत ज्ञापनपौ लःल्हाःगु खः, महानिर्देशक नापलायेगु नितिं देय् दबू स्वनिगः विशेष प्रदेशया अध्यक्ष श्रीकृष्ण महर्जन, छ्याञ्जे हरिबहादुर श्रेष्ठ, ख्वप जिल्लाया अध्यक्ष नरेश नेवाः, छ्याञ्जे जीवनपति श्रेष्ठ, मध्यपुर थिमि नगर समितिया अध्यक्ष बाबुकाजि साछेँ श्रेष्ठ, नेवाः शिक्षा गुथिया कजि विष्णु चित्रकार, विद्या चित्रकार, नेवाः वस्ती नेवाः स्कूल अभियान अध्यक्ष दिपक तुलाधर, नेवाः जागरण मञ्चया नायः सुजीव बज्राचार्यलिसें नेपाल तामाङ घेदुङया उपमहासचिव जगत दोङ, छ्याञ्जे विना तामाङ नापं घेदुङया थीथी प्रतिनिधिपिं सहभागी जुयादीगु खः ।

संघीय संसद (प्रतिनिधि सभा) य् थौं उपसभामुख पदया लागि निर्वाचन जुइत्यंगु दु।

२०७६ साल माघ ६ गते तत्कालीन उपसभामुख शिवमाया तुम्बाहाम्फे न राजीनामा बिइगुलि खाली जुगु उगु पदया लागि थौं निर्वाचन जइत्यंगु खः।

निर्वाचनया लागि बिहीबाः हे उम्मेदवारी दर्ता याना अन्तिम नामावली तक प्रकाशित याये धुकुगु दु। उपसभामुखया लागि नेपाली कांग्रेसया पुष्पा भुसाल व नेकपा एमालेया विद्या भट्टराई उम्मेदवार जुगु दु।

भुसाल न्यागु दलीय सत्ता गठबन्धनया पाखे उपसभामुखय् मंकाः उम्मेदवार खःसा भट्टराई प्रमुख विपक्षी नेकपा एमालेया उम्मेदवार खः।

प्रतिनिधि सभाय् एमालेया ९८, कांग्रेस ६३, माओवादी केन्द्रया ४९, एकीकृत समाजवादी २३, जनता समाजवादी २१, लोसपा १३ व मेपि प्यम्ह सांसदपि दु। संसद सचिवालयया कथं मतदान थौं न्हिनय् तीन बजे याइगु जुगु दु।

नेवाः देय् दबू स्वनिगः विशेष प्रदेशया आह्वानय् स्वनिगःया थीथी लागाय् भाषा आयोगया सिफारिस कथं नेपालभाषा व तामाङ भाषायात सरकारी कामकाजि भाषाया रुपय् वागमती प्रदेशय् लागू यायेगु सवालय् थीथी लागाय् सहलह मुँज्या जुयाच्वंगु दु।

वंगु असार १८ गते नेवाः देय् दबू ख्वप जिल्ला समितिया ग्वसालय् थिमिइ तःजिक सहलह मुँज्या जूगु खः। उगु सहलह मुँज्याय् भाषा आयोगया सचिब जयराम अधिकारी, मूपाहां वागमती प्रदेशया सांसद प्रतिमा श्रेष्ठ, नेवाः देय् दबूया केन्द्रीय न्वकू उमेश स्थापित, नेवाः देय् दबूया स्वनिगः विशेष प्रदेशया नायो श्रीकृष्ण महर्जन, स्वनिगः विशेष प्रदेया न्वकू सुमन श्रेष्ठ, नेपाल तामाङ घेदुङया छ्याञ्जे चन्द्रलाला लामा लगायतपिन्सं न्वंवानादीगु खः।

उगु ज्याझ्वलय् आःया अवस्थाय् दबाव मुलक ज्याझ्वः यायेगु खँय् बः बियादीगु खः। देय् दबू ख्वप जिल्लाया नायो नरेश नेवाःया नायोसुइ जूगु उगु ज्याझ्वलय् ख्वप जिल्लाया बरिष्ठ न्वकू योगी स्यस्यः नं लसकुस न्वचू बियादीगु खः। अथे हे वागमती प्रदेशय् नेपालभाषा व तामाङ भाषायात सरकारी कामाजी भाषाया रुपय् मान्यता बिइगु सवालय् आः ल्ह्वनेगु पलाःया बारे नेवाः देय् दबू किपू नगर समितिं वंगु असार १७ गते शुक्रवाः सहलह मुँजया यात ।

नेवाः देय् दबू स्वनिगः विशेष प्रदेशया नायो श्रीकृष्ण महर्जन मूपाहां जुयादीगु उगु ज्याझ्वलय् आः नेवाःत व तामाङत जाना आन्दोलन यायेगु बाहेक लिकल्प मदु धकाः सहलह जूगु खः। अथे हे साउन महिनाया न्हापांगु वालय् हे किपुलिइ उगु मुद्दायात कया प्रदर्शन यायेगु धकाः तकं खँ जूगु खः। थ्व हे दुथुइ भाषा आयोगया सिफारिस कथं भाषायात मान्यता बिइकेत एमालेपाखें संकल्प प्रस्ताव तयेगु जुइ धकाः धाःगु दु।

नेपाःया संविधान कथं गठन याःगु भाषा आयोगं वागमती प्रदेशय् नेपालभाषा व तामाङ भाषायात सरकारी कामाजि भाषाया रुपमा मान्यता बिइत कानुन दयेका लागू यायेगु खँय् वागमती प्रदेशया सरकारं बेवास्तायात धाःसा प्रमुख प्रतिपक्षं संकल्प प्रस्ताव तइगु जूगु दु। देय् दबू येँ जिल्ला समितिया ग्वसालय् शनिवाः येँय् भाषा आयोगया सिफारिसया सवालय् जूगु सहलह मुँज्याय् एमालेया वागमती प्रदेशया सांसद राजेश शाक्यं अथे धयादीगु खः।

ज्याझ्वलय् एमालेया मेम्ह सांसद नारायण सिलवालं वागमती प्रदेशय् कामकाजि भाषा कथं भाषा आयोगया सिफारिसय् दुथ्याःगु नेपालभाषा व तामाङ भाययात मान्यता बिइगु सवालय् एमाले दुने सहलह जुयाच्वंगु दु धकाः धयादिल ।ज्याझ्वलय् वागमती प्रदेशय् नेपाली कांग्रेसका सांसदपिं नरोत्तम बैद्य व भिमसेन खत्रीं भाषा आयोगया सिफारिस कथं नेपालभाषा व तामाङ भाषायात कानुनी मान्यता बिइकेगु नितिं थःपिन्सं माःगु कथंया भूमिका म्हितेगु जुइ धकाः बचं बियादिल।

नेवाः देय् दबू येँ जिल्ला समितिया नायो धनबहादुर महर्जन तिमिलाया नायोसुइ जूगु उगु ज्याझ्वलय् नेवाः देय् दबू स्वनिगः विशेष प्रदेशया नायो श्रीकृष्ण महर्जनं भाषा आयोगं सिफारिस याःगुनिसें आः तक जुइ धुंकूगु प्रक्रिया नापं आः यायेमाःगु खँ विषयवस्तु सहलहया नितिं न्ह्यब्वयादीगु खः । वय्कलं आःया अवस्थाय् सांसदतयसं संसदय् अले समुदायपाखें सतकय् दबावमुलक ज्याझ्वः यायेगु बाहेकाया विकल्प मदु धकाः धयादिल । ज्याझ्वलय् मूपाहां नेवाः देय् दबूका केन्द्रीय नायो पवित्र बज्राचार्यं आःया अवस्थाय् वागमती प्रदेशय् नेपालभाषा व तामाङ भाषायात कामकाजि भाषा कथं लागू याकेगु नितिं वागमती प्रदेशया सांसदतलिसे सहलह ब्याका वयकःपिन्सं बिउगु सुझाव कथं हे पलाः ल्ह्वना वनेगु जुइ धकाः धयादिल। थुगु कथंया अभियान आः स्वनिग्ः न्यंकं न्ह्याकेगु जुइ धकाः नेवाः देय् दबू स्वनिगः विशेष प्रदेशया नायो श्रीकृष्ण महर्जनं जानकारी बियादीगु दु।

नेवाः जागरण मञ्चया ग्वसालय् संस्कृति पर्यटन तथा नागरिक उड्डयन मन्त्री जीवनराम श्रेष्ठ मन्त्री पदय् नियुक्त जुयादीगुलिं भिन्तुना देछायेगु ज्याझ्वः जुगु दु।

उगु ज्याझ्वलय् जनकवि दुर्गालाल श्रेष्ठं, नेवाः न्ह्यलुवाः मल्ल के. सुन्दर, पूर्व राज्यमन्त्री तीर्थराम डंगोलपिन्स न खादा न्ययेका भितुना देछानादीगु खः।

मन्त्री श्रेष्ठं थम्हेसिया संस्कृति सम्पदाया नितिं ज्या यायेगु इलय् नेवाः न्ह्यलुवापिं लिसें सहलह याना न्ह्या वनेगु धका धयादीगु खः।

जागरण मंञ्चया अध्यक्ष सुजिब बज्राचार्यया सभाध्यक्षताय् जुगु उगु ज्याझ्वलय् सम्पदा संस्कृति नेवाः सरोकार व संस्कृति पर्यटन तथा नागरिक उड्डयन मन्त्रालय पाखें यायेमाःगु ज्यायात कया मन्त्री श्रेष्ठयात ज्ञापन पौ लःल्हानादीगु खः।

मंञ्चं मूछ्याञ्जे बिजयकृष्ण श्रेष्ठ लसकुस यानादिगु उगु ज्याझ्वः मंञ्चया न्वकू अमृत ताम्रकार न्ह्याकादिगु खः।