शताब्दी पुरुष सत्यमोहन जोशीया स्वास्थ्य अवस्था गम्भीर जूयावंगु दु।

यलया इमाडोलय् किस्ट मेडिकल कलेज नाप शिक्षण अस्पतालय् उपचार याना वयाच्वम्ह जोशीया स्वास्थ्य अवस्था झन् कमजोर जूयावना च्वंगु दु धका अस्पताल स्रोतं जानकारी बिःगु दु।

जोशीया छातीइ निमोनिया संक्रमण खनेदुगु दु। उपचारय् संलग्न छम्ह चिकित्सकया कथं ‘ब्लड प्रेसर छक्वलं च्वय् क्वय् जूयाच्वंगु दु।

ब्लडप्रेसर घटे जूगु धइगु बालागु अवस्था मखु। वासलं बालाक्क ज्या यानाच्वंगु मदु’, उम्ह चिकित्सकया कथं, ‘स्वास्थ्यय् उल्लेखनीय सुधार मजुगुलि अवस्था चिन्ताजनक हे दु।’

डेंगू संक्रमणं आःतक ४७ म्ह सी धुकुगु दु। इपिडिमियोलोजी नाप रोग नियन्त्रण महाशाखाया तथ्यांक कथं असोज २७ गते तक संक्रमित जूपिनिगु ल्याः ३८ हजार ९१८ व सीपि ४७ म्ह थ्यःगु दु।

आःतकया तथ्यांक कथं दकलय् अप्पो येँ १२ हजार १०२ म्हेसित संक्रमित जुइ धुकुगु पुष्टि जुगु दु। अथेहे यलय् ८ हजार ५५४ व ख्वपय् २ हजार ४७५ म्ह याना स्वनिगः दुने डेंगू संक्रमित जूपि २३ हजार १३१ म्ह थ्यने धुकुगु दु।

अथेहे, मकवानपुरय् ३ हजार ९३३, दाङय् २ हजार ५, चितवनय् १ हजार ३८९ व रुपन्देहीइ १ हजार १७५ म्हेसित संक्रमण जुइ धुकुगु दु 

राष्ट्रिय समाचार समिति (रासस) या २२ म्ह पत्रकारपिन्त हटे यायेगु धाःसे नेपाल पत्रकार महासंघ व पेशागत पत्रकार संगठनपिन्स विरोध याःगु दु।

ताः ईनिसे करारय् ज्या यानाच्वपि व ज्यालादारीइ कार्यरत पत्रकारपिन्त थ्व हे वइगु कात्तिक १ गतेनिसे हटे यायेत्यःगु धासे नेपाल पत्रकार महासंघया केन्द्रीय कार्यालयय् पत्रकारया नेतापि मंकाः कथं बैठक च्वंगु खः। बैठकं पत्रकारपिन्त हटे यायेत्यःगु विरोधय् असोज २८ गते १ बजे महासंघं रासस केन्द्रीय कार्यालयय् प्रदर्शन यायेगु निर्णय याःगु दु।

महासंघया केन्द्रीय सदस्य रामकृष्ण शर्मा न श्रमजिवी पत्रकारपिन्त हटे यायेत्यःगु विरोधय् चरणबद्ध आन्दोलन यायेगु धका धाःगु दु।

समाजवादी प्रेस संगठनया कार्यवाहक अध्यक्ष विश्वमणि सुवेदी, नेपाल प्रेस युनियनया उपाध्यक्ष जीवन भण्डारी, प्रेस चौतारी नेपालया महासचिव हिरामान लामा, प्रेस सेन्टरया महासचिव सन्तोष पौडेल, प्रेस चौतारीया प्रदेश प्रतिष्ठान इन्चार्ज मोहन बास्तोला लगायतपिन्स श्रमजीवी पत्रकारपिन्त गु न हालतय् लिकाये दइ मखु धका धाःगु दु।

येँ महानगरपालिकां थापाथली क्षेत्रया अनधिकृत संरचना हटे यायेगु सुरु याःगु दु।

महानगरं अधिकार सम्पन्न बागमती सभ्यता एकीकृत विकास समितिनाप समन्वय याना थापाथलीनिसे यूएन पार्कया ताँ तक (सुकुम्बासी बस्ती नापं) निर्माण जूगु अनधिकृत संरचना हटे यानागु दु धका महानगर प्रहरी उपरीक्षक दिनेश अर्यालं जानकारी बिःगु दु।

अर्यालया कथं उगु थासय् च्वंगु निर्माण जुयाच्वंगु क्रियापुत्री भवन, ओम शान्तिया भवन, रुद्रेश्वर मन्दिरया पुजारी भवन लगायतया संरचना अनधिकृत जुगुलि हटे यानागु धका धागु दु।

नेपाःया लागि नवनियुक्त अमेरिकी राजदूत डिन थम्पसन नेपाः थ्यकं वःगु दु। राजदूत ¥याण्डी बेरी थःगु प्यदँया कार्यकाल पूरा याना स्वदेश लिहावनेवं नवनियुक्त राजदूत थम्पसन नेपाः थ्यकं वःगु खः।

येँया अमेरिकी राजदूतावासया कथं बिहीबाः नेपाः थ्यकं वम्ह राजदूत थम्पसन छु दिं आराम लिपा नेपाः सरकारसमक्ष थःगु ओहोदाया प्रमाणपत्र पेश याइगु जुगु दु।

राजदूत बेरी नामिबियाया लागि अमेरिकी राजदूत नियुक्त जुगु थःगु प्यदँया कार्यकाल क्वचायका वंगु आइतबाः स्वदेश लिहावःगु खः। वयकः लिहावःगु निन्हु लिपा शुक्रबाः जक थम्पसनं नेपाःया लागि नवनियुक्त अमेरिकी राजदूतया शपथ ग्रहण याःगु खः।

थम्पसन थ्व स्वया न्ह्यः अमेरिकाया लागि दक्षिण नाप मध्य एसियाली मामिला व्युरोया उपसहायक सचिवया जिम्मेवारी कयातःगु खः।