वाङ्मय शताव्दीपुरुष संस्कृतिविद् डा. सत्यमोहन जोशी अस्पतालं डिस्र्चाज जुयादीगु दु।

शताव्दीपुरुष जोशीयात वंगु बैशाख १ गते छातीइ मछिनावःगुलिं यलय् किष्ट अस्पतालय् भर्ना जुयादीगु खः।

अस्पतालय् परीक्षण लिपा मूत्रत्र प्रणालीया संक्रमण व मुटुइ तकं गडबडी खनेदुगु खः।

शताव्दीपुरुष जोशी झिन्हुलिपा म्हिगः आइतवाः अस्पतालं डिस्चार्ज जुयादीगु खः ।

काभ्रेपलाञ्चोक नमोबुद्ध नगरपालिकाय् टिकट वितरण सम्बन्धी विवादय् नेपाली कांग्रेसपाखे मेयरया दाबेदार रोशन पाण्डे ल्हातःगु दु।

कांग्रेसया हे मेम्ह आकांक्षी कुन्साङ लामां वयात ल्हावाःगु खः। ल्हानया घाःपाः जुम्ह पाण्डे न शीर मेमोरियल अस्पताल, बनेपाय् उपचार जुयाच्वंगु खः।

पाण्डे कांग्रेस नेता गणेश लामा पक्षधर खःसा कुन्साङ लामा तीर्थ लामा पक्षयाम्ह खः।

हलिं नेवाः दबू नेपाः देय् मूकवःया न्हापांगु दँमुँज्या स्वयम्भु बैंक्वेटय् संघीय मामिला तथा स्थानीय प्रशासन मन्त्री राजेन्द्र प्रसाद श्रेष्ठया मूपाहाँसुइ क्वचागु दु।

नेपाः देसय् निःदँ स्वयां मल्याक न्ह्यःनिसें नेवाः सभ्यताया विकास जूगु खःसां नेवाःतय्त राज्यसत्तां याःगु दमनया हुनिं नेवाःत लिउने लाःगु बिचाः प्वंकादिल।

वय्कलं हलिमय् न्यनाच्वंपिं नेवाःतय्त संगठित याःगु हलिं नेवाः दबू थुज्वःगु संस्थां नेवाः जातिया एकताया लिसें थुकिया उत्थानया निंतिं पलाः न्ह्याकेमाःगु बिचाः प्वंकादिल।

उगु ज्याझ्वलय् नेवाः न्ह्यलुवा डा. महेशमान श्रेष्ठयात ‘हलिं नेवाः, नेपाः’ हना सिरपालं छाय्पिउगु खः । वय्कलं नेवाःतय्त संगठित यायेगु लिसें नेवाः जातिया उत्थानया निंतिं ज्वःमदुगु योगदान बियादीगुलिं वय्कःयात उगु हना लःल्हाःगु खः।

ज्याझ्वलय् नेवाः देय् दबूया निवर्तमान नायः नरेश ताम्राकार, हलिं नेवाः दबू नेपाल च्याप्टरया पुलांम्ह नायः नरेन्द्रभक्त हाडा, केन्द्रीय न्वकू रजनी प्रधान, केन्द्रीय मूछ्याञ्जे समन्त बज्राचार्यपिसं भिंतुना देछाःगु खः । नेपाः देय् मूकवःया अध्यक्ष शाक्य सुुरेनया सभाध्यक्षताय् जूगु ज्याझ्वलय् दुजः रमेशमान मुनिकारं सुभाय् देछाःगु खःसा ल्यूदांभरिं सुदयराज शिलाकारं ज्याझ्वः न्ह्याकूगु खः।

दँमुँज्यां सुरेन्द्रभक्त श्रेष्ठ अध्यक्षय् निर्विरोध निर्वाचित जुगु खः । अथेहे उपाध्यक्षय् रमेशमान मुनिकार, राधेश्याम त्वानाबासु व श्यामप्रसाद श्रेष्ठयात ल्यःगु खः । मूछ्याञ्जे सुदयराज शिलाकार, छ्याञ्जे कस्तुरी श्रेष्ठ, दांभरिं अञ्जना ताम्राकार, ल्यूदांभरिं मंगलरत्न ताम्राकार ल्यःगु खः।

दुजलय् शान्ति वैद्य, शोभा श्रेष्ठ, भागवत नरसिंह प्रधान, विकास महर्जन, खगेन्द्र प्रसाद जोशी, धर्मदेव महर्जन, पद्मलक्ष्मी ताम्रकार ल्यःगु खः। ज्यासना पुचः ल्यज्या न्ह्यः जूगु बन्द सत्रय् छ्याञ्जे रत्न काजी महर्जनं प्रगति प्रतिवेदन व दांभरिं सुरेन्द्रभक्त श्रेष्ठं आर्थिक प्रतिवेदन न्ह्यब्वःगु खःसा नायः शाक्य सुरेनं न्ह्यब्वःगु विधान संशोधन प्रस्ताव पारित याःगु खः।

येँ महानगरपालिकाया मेयरय् उम्मेदवारी बीगु निंतिं केशव स्थापितं बागमती प्रदेश सभाया दुजःपाखें राजीनामा बिउगु दु।

एमालें म्हिगः स्थापितयात येँ महानगरपालिकाया मेयरय् थनेगु क्वःछिउगु खः । स्थापितं थौं बागमती प्रदेश सभाया सभामुख सानु श्रेष्ठयात राजीनामा लःल्हागु खः।

स्थापितं येँ क्षेत्र नं. ६ (क) पाखें प्रदेश सभाय् विजय जुगु खः।

लुँ तोलां थौं प्यस कुहावंगु दु।

लुँ तोलां थौं प्यसः कुहावया १ लाख ५ सय रुपैयाँ थ्यःगु दु धका नेपाल सुनचाँदी व्यवसायी महासङ्घं धाउगु दु।

थौं वहः धासा स्थिर जुगु दु। म्हिगः हे थे वहः तोलां १ हजार ३ सय ६० रुपैयाँ न कारोबार जुगु दु।