राष्ट्रपति विद्यादेवी भण्डारीयात कोरोना संक्रमण पुष्टि जूगु दु।

म्हिगः आइतबाः राष्ट्रिय जनस्वास्थ्य प्रयोगशालापाखे राष्ट्रपति भण्डारीयात कोरोना संक्रमण पुष्टि जूगु रिपोर्ट वःगु धका स्रोतं धाःगु दु।

चिकित्सकपिनिगु कथं वयकःया आः स्वास्थ्यय् छु भचा सुधार वःगु दु।

राष्ट्रपति भण्डारी म्ह मफया वंगु २२ असोजय् त्रिवि शिक्षण अस्पतालय् भर्ना जूयादीगु खः।

आगामी मंसिर ४ गते हुने प्रतिनिधि सभा तथा प्रदेश सभा सदस्य निर्वाचन अन्तर्गत थौं आइतबाः मनोनयन दर्ता याःपि उम्मेदवारपिनिगु विरोधय् उजुरी बिइफइ धका निर्वाचन आयोगं धाःगु दु।

सू न उम्मेदवार कानुनी रुपं अयोग्य दू सा वयागु उम्मेदवारविरुद्ध उजुरी बिइगु लागि थौं सुथय् १० बजेनिसे न्हिनय् ३ बजेतकया ई बिःगु दु। अथेहे मनोनयपत्र व उजुरीउपर जाँचबुझ याना निर्णय यायेगु ई असोज २४ गते बहनि ३ बजेनिसे २५ गते बहनि ५ बजे तक तयातःगु दु धका आयोगया निर्वाचन कार्यतालिका उल्लेख दु।

उम्मेदवारपिनिगु नामावली प्रकाशन यायेत असोज २५ गते बहनि ५ बजेनिसे ७ बजेतक दु। आइतबाः मनोनयन दर्तायापि उम्मेदवारपिनिगु थःगु नां लितकायेत असोज २६ गते सुथय् १० निसे न्हिनय् १ बजे तक ई तयातःगु दु।

वया लिपा प्रतिनिधि सभा व प्रदेश सभा सदस्य निर्वाचनया प्रत्यक्षतर्फ प्रतिस्पर्धा याइपि उम्मेदवारपिनिगु लिपागु नामावली २६ प्रकाशन याइगु धका निर्वाचन आयोगं धाःगु दु।

वाङ्ममय शताब्दी पुरूष सत्यमोहन जोशीयात आइसियूलय् तःगु दु। झींन्ह्यन्हु न्ह्यः निसें यलया किष्ट अस्पतालय् वासः याकाच्वनादीगु खः।

आइतवाः अस्पतालया निर्देशक प्रा.डा. सुरज बज्राचार्य जारी याःगु विज्ञप्तिइ वयकःया स्वास्थ्यय् उल्लेखनीय प्रगति मजुगुलिं आइसियूय् तयेमाःगु धका धाःगु दु।

वयकःया समग्र स्वास्थ्यय् उल्लेखनीय प्रगति खनेमदु व युरिन इन्फेक्सन व छातीइ निमोनियाया कारण पमोनोलोजिष्ट व इन्टरनल मेडिसिन विभागया विभागीय प्रमुख प्रा.डा.मिलेशजंग सिजापतिया सल्लाह कथं सघन उपचार कक्षय् यके त्यनाःगु धका विज्ञप्तिइ न्ह्यथंनातःगु दु।

वाङ्ममय शताब्दीपुरूष जोशीयात असोज ७ गते किष्ट अस्पतालय् भर्ना याःगु खः।

वइगु मंसिर ४ गते जुइगु प्रतिनिधिसभा व प्रदेशसभा सदस्य निर्वाचनया लागि वर्तमान मन्त्रिपरिषदय् दुपि १६ म्ह मन्त्रीपि चुनावी मैदानय् कुहावःगु दु।

प्रधानमन्त्रीनाप कांग्रेसया न्ह्यम्ह, नेकपा माओवादी केन्द्रया प्यम्ह व नेकपा एकीकृत समाजवादीया स्वम्हयाना १४ म्ह मन्त्रीपि सत्ता गठबन्धनपाखे उम्मेदवारी बिःगु दु सा जनता समाजवादी पार्टीया निम्ह मन्त्रीपि विपक्षी गठबन्धनपाखे उम्मेदवार बिःगु दु। सत्ता गठबन्धनय् भागबण्डा मजुइवं जनता समाजवादी पार्टी न नेकपा एमालेनाप चुनावी तालमेल याःगु खः। च्याम्ह मन्त्रीपि धाःसा प्रत्यक्षय् उम्मेदवार बिउगु मदु। प्रधानमन्त्री नाप नेपाली कांग्रेसया सभापति शेरबहादुर देउवां डडेलधुराय् वारेसनामाय् छ्वया उम्मेदवारी दर्ता याःगु दु। देउवां थः जहान आरजु राणा देउवापाखे उम्मेदवारी दर्ता याःगु दु। ०४८ निसे निरन्तर चुनाव त्याना वयाच्वंगु खःब। वयकलं डडेलधुराय् न्ह्यक्वःगु पटक संघीय सांसदया लागि उम्मेदवारी बिःगु खः।

गृहमन्त्री बालकृष्ण खाँणं रुपन्देही–३ य् उम्मेदवारी बिःगु खः सरकारया प्रवक्ता व सञ्चार नाप सूचना प्रविधिमन्त्री ज्ञानेन्द्रबहादुर कार्की न सुनसरी–४ य् मनोनयन दर्ता याःगु खः। ऊर्जा, जलस्रोत नाप सिंचाईमन्त्री पम्फा भुसालं यल–३ य् उम्मेदवारी बिःगु दु। अर्थमन्त्री जनार्दन शर्मा न रुकुम पश्चिमपाखे उम्मेदवारी बिःगु दु।

खानेपानीमन्त्री उमाकान्त चौधरीं बारा–१, परराष्ट्रमन्त्री नारायण खड्कां उदयपुर–१, उद्योगमन्त्री दिलेन्द्रप्रसाद बडू न दार्चुला व शिक्षा विज्ञान नाप प्रविधिमन्त्री देवेन्द्र पौडेलं बाग्लुङ–२ य् उम्मेदवारी बिःगु दु। अथेहे, युवा नाप खेलकूदमन्त्री महेश्वरजंग गहतराजं बाँके–१, संस्कृति पर्यटन नाप नागरिक उड्डयनमन्त्री जीवनराम श्रेष्ठं येँं–८, सहरी विकासमन्त्री मेटमणि चौधरीं दाङ–१ व श्रम रोजगार नाप सामाजिक सुरक्षामन्त्री शेरबहादुर कुँवरं अछाम–१ पाखे उम्मेदवारी बिःगु दु सा अ

थेहे जसपापाखे मन्त्री जूम्ह संघीय मामिला नाप सामान्य प्रशासनमन्त्री राजेन्द्रप्रसाद श्रेष्ठ येँया ७ नम्वरपाखे उम्मेदवारी बिःगु दु।। प्रधानमन्त्री नाप मन्त्रिपरिषद् कार्यालयया राज्यमन्त्री उमेश श्रेष्ठं चितवन–२ पाखे प्रतिनिधिसभा सदस्यया लागि उम्मेदवारी बिःगु दु। जसपाया नेतापि भौतिक पूर्वाधार नाप यातायातमन्त्री मोहम्मद इश्तियाक राई न बाँके–२ व वन नाप वातावरणमन्त्री प्रदीप यादवं पर्सा १ य् विपक्षी गठबन्धनपाखे उम्मेदवारी बिःगु दु।

कांग्रेसपाखे महिला बालबालिकामन्त्री उमा रेग्मी उम्मेदवार जूगु मदु। माओवादी केन्द्रपाखे मन्त्री जूम्ह भूमि व्यवस्था, सहकारी नाप गरिबी निवारण मन्त्री शशी श्रेष्ठ व शिक्षा राज्यमन्त्री बोधमायाकुमारी यादव न उम्मेदवार जूगु मदु। नेकपा एकीकृत समाजवादीबाट स्वास्थ्य नाप जनसंख्यामन्त्री भवानीप्रसाद खापुङ व स्वास्थ्य राज्यमन्त्री हिराचन्द्र केसी न उम्मेदवारी बिःगु मदु । कृषि पशुपंक्षी विकासमन्त्री मृगेन्द्रकुमार सिंह यादव न उम्मेदवारी बिःगु मदुसा कानुन न्याय नाप संसदीय मामिलामन्त्री गोविन्दप्रसाद शर्मा (कोइराला) न उम्मेदवार जूगु मदु।

निर्वाचन आयोगया सूचना प्रणालीया आधारय् आःतक १ हजार ९३७ म्ह मिजं व १९१ म्ह मिसापिन्स उम्मेदवार जुइ कथं उम्मेदवारी दर्ता जूगु दु धका निर्वाचन आयोगं धाःगु दु।

आयोगया कथं प्रदेशसभाय् २ हजार ८४५ म्हेसिया उम्मेदवारी दर्ता याःगु दु। उकि मध्ये २ हजार ६०० म्ह मिजं, २४४ म्ह मिसा  व छम्ह अन्यपिन्स दर्ता याःगु दु धका निर्वाचन आयोगया प्रवक्ता नाप सहसचिव शालिग्राम शर्मां जानकारी बिःगु दु।

वयकःया कथं प्रदेशसभापाखे प्रदेश नं. १ य् ४४५ म्ह मिजं, ४९ म्ह मिसा याना ४९४, मधेश प्रदेशय् ७११ मिजं, ५५ म्ह मिसा व छम्ह अन्य याना ७६७, बागमती प्रदेशय् ५६१ मिजं, ७४ म्ह मिसा याना ६३५ म्हेसिया उम्मेदवारी दर्ता याःगु दु।

अथेहे गण्डकी प्रदेशय् १९९ मिजं, २९ म्ह मिसा याना २२८, लुम्बिनी प्रदेशइ ४१४ म्ह मिजं, २३ म्ह मिसा या ४३७, कर्णाली प्रदेशय् ७९ मिजं, निम्ह मिसा याना ८१ म्ह व सुदूरपश्चिम प्रदेशय् १९१ म्ह मिजं, १२ म्ह मिसा याना २०३ म्हेसिया उम्मेदवारपिन्स प्रदेशसभा सदस्यया लागि उम्मेदवारी दर्ता याःगु दु।