नेपाली कांग्रेसं स्थानीय तहया चुनावय् तालमेलया लागि मापदण्ड दयकेगु तयारी याउगु दु।

शुक्रवाःनिसे सुरु जुगु केन्द्रीय समिति बैठकं यक्को नेतापिन्स तालमेल याये माःगु सुझाव बिउगु दु उकिया लागि मापदण्ड दयकेगु तयारी याउगु दु।

न्हापा त्याउगु थासय् सुरक्षित यासे मेमे थाय् माओवादी केन्द्र, एकीकृत समाजवादी, जसपा व राष्ट्रिय जनमोर्चा नाप चुनावी तालमेल यायेगु कांग्रेसं तयारी याउगु दु। ०७४ सालया स्थानीय तह चुनावय् ७५३ स्थानीय तहमध्ये कांग्रेसं २ सय ५३ तहय् त्याकूगु दु ।

महानगरपालिका व उपमहानगरपालिकाय् केन्द्रपाखे व नगरपालिका नाप गाउँपालिकाय् स्थानीय राजनीतिक नेतृत्वनाप  सहमतिया आधारय् तालमेल यायेगु कांग्रेसया तयारी दु। सभापति देउवानाप नेता रामचन्द्र पौडेल, प्रकाशमान सिंह, डा. शशाङ्क कोइराला, कृष्णप्रसाद सिटौला लगायतया नेतापि चुनावी तालमेलया पक्षय् दु।

शेखर कोइराला पक्षया नेतापि सू नाप तालमेल मयासे याकचा हे चुनावय् वनेगु पक्षय् दु।

नेपाली कांग्रेस केन्द्रीय सदस्यपि निर्वाचनया चुनावी गठबन्धनया पक्षय् दु।

केन्द्रीय कार्यसमितिया बैठकं नेतापिन्स माःगु कथं गठबन्धन याना वनेमाः धका धाउगु दु।

पार्टी कार्यालय सानेपाय् थौं आइतबाः च्वंगु बैठकय् नेतापिन्स माःगु कथं चुनावी गठबन्धन याना न्ह्यायेमाः धका धाउगु दु।

गठबन्धनय् वनेगु मवनेगु धइगु रणनीतिक विषय खः। गुुकथं पार्टीयात फाइदा जुइ व बाहेक मेगु मापदण्ड जुइ फइमखु,’ प्रवक्ता डा. प्रकाशशरण महतं धाउगु, ‘कन्ह्य सकसिया न्ववासिधय धुका जक गुकथं वनेगु धका निर्णय केन्द्रीय समितिं याइ।

किपुलीइ जुयाच्वंगु प्यक्वःगु नेपालभाषा साहित्य नखः म्हिगः शनिवाः क्वचाःगु दु।

शनिवाः जूगु उगु ज्याझ्वलय् ‘किपूया सांस्कृतिक सम्पदा व पर्यटकीय सम्भावना’ विषयस अन्तक्र्रिया ज्याझ्वः जूगु खः। पत्रकार कल्पना महर्जन सहजकर्ता जुयादीगु खःसा वरिष्ठ संस्कृतिविद् प्रयागमान प्रधान, किपू नगरपालिका २ वडाया वडाध्यक्ष  नाप नगरपालिकाया सम्पदा पर्यटन संस्कृति विभाग नायः रमेशमान डंगोल व नेवाः लहना विश्व सरसफाई अभियानया अभियन्ता राजमान मानव वक्ता कथं उपस्थित जुयादीगु खः।

अथेहे ‘नेपालभाषा पठनपाठनपाखें साहित्ययात तिबः’ विषयस जूगु अन्तक्र्रिया ज्याझ्वलय् यल महानगरपालिका स्थानीय पाठ्यक्रम विकास समिति सहसंयोजक तुलसीलाल सिं, येँ महानगरपालिका शहरी योजना आयोग दुजः गुजेश्वरी श्रेष्ठ व किपू नगरपालिका शिक्षा समिति दुजः डा. बज्रमुनि बज्राचार्य वक्ता कथं उपस्थित जुयादीगु खःसा नेपालभाषा टाइम्स न्हिपौया सम्पादक सुरेशकिरण मानन्धर सहजकर्ता जुयादीगु खः।

उगु साहित्य नखतय् थीथी साहित्यकारपिन्स थःथःगु रचना पाठ यानादीगु खः। उगु ज्याझ्वलय् स्कूलय् नेपालभाषा पठनपाठनया व्यवस्था यानाः नेपालभाषा विकासय् योगदान यानादीपिं येँ महानगरपालिकाया मेयर विद्यासुन्दर शाक्य, यल महानगरपालिकाया मेयर चिरिबाबु महर्जन, किपू नगरपालिकाया मेयर रमेश महर्जन व किपू नगरपालिकाया उपमेयर नापं प्रवक्ता सरस्वती रिजाल खड्कापिन्त विशेष हनेज्या याःगु खः।

साहित्य नखःया नायः रमेशकाजी स्थापितया सभापतित्वय् न्ह्याःगु उगु ज्याझ्वलय् मूपाहाँ कथं नेपालभाषा मंकाः खलःया नायः जनकवि दुर्गालाल श्रेष्ठ झायादीगु खःसा पाहाँ कथं नेपालभाषा एकेदमिया भाइस चान्सलर मल्ल के सुन्दर उपस्थित जुयादीगु खः।

वाःया न्हापागु दिं थौं सेयर कारोबार मापक नेप्से परिसूचक ४१ अंकं घटे जुगु दु।

नेप्से परिसूचक ४१ दशमलव ४३ अंकं घटे जुया २ हजार ५ सय ७२ दशमलव २३ अंकय् कुहावंगु दु। ‘क’ वर्गया कम्पनीपिनिगु कारोबार मापन याइगु सेन्सेटिभ इन्डेक्स न ९ दशमलव ५५ अंकं कुहावंगु दु।

कारोबार रकम धासा ५ अर्ब न्ह्यने थ्ंयगु दु। न्हिच्छियक ६२ हजार १६४ कारोबारपाखे ८९ लाख २३ हजार १४ कित्ता सेयर किनबेच जुगु दु। उकि मध्ये कारोबार रकम ४ अर्ब ९८ करोड ९५ लाख १४ हजार ४ सय १६ रुपैयाँ थ्यंगु दु।

समग्र बजाः घटे जुया बीमा कम्पनीया सेयर भाः धासा थहावंगु दु। बीमा समितिं बीमा कम्पनीपिनिगु पुँजी वृद्धि यायेगु निणर्य याउगु दु।

समितिया निणर्य कथं आःतक २ अर्ब रुपैयाँ चुक्ता पुँजी तोके याउगु जीवन बीमा कम्पनीपिनिगु ५ अर्ब व आः १ अर्ब रुपैयाँ जक चुक्ता पुँजी तोके याउगु  निर्जिवन बीमा कम्पनीपिनिगु २ अर्ब ५० करोड रुपैयाँ पुँजी थ्यकूगु दु।

नेवाः पत्रकार राष्ट्रिय दबूया केन्द्रिय दुज प्रजित शाक्य वंगु शनिबार सत्यतारा सिरपापाखेँ सम्मानित जुया दिगु दु।

केन्द्रिय मानन्धर संघका ख्वीगुक्वःगु पलिस्था दिं जुगुं साय्मि (स्वयम्भू) भ्वय् कुन्हु शाक्ययात हनेगु ज्याः जुगु खः।

एमए तंगिमय् नेपालभाषा विषयय् उत्कृष्ट ल्याः हयादिगुलिं शाक्ययात मानन्धर समाजं विशेष हनेज्याः यागु खः।

शाक्य छगु वाः न्ह्य नं पारामाउन्ट खेल पत्रकारिता पुरस्कार पाखेँ सम्मानित जुया दिगु खः।

पारामाउन्ट एकेडेमीं शाक्ययात नगद र ताम्रपत्र प्रदान याना शाक्ययात हंगु खः।

शाक्य गोरखापत्र दैनिकया खेल पत्रकार नं खः।