स्थानीय जनप्रतिनिधिपिन्स वंइगु निर्वाचनय् उम्मेदवार जुइत पदपाखे राजीनामा बिइमाः धका धाउगु दु।

स्थानीय तहया निर्वाचन ३० वैशाख २०७९ य् तोके याउगु दु। तर हाल वहाल दुपि जनप्रतिनिधिपिन्स उम्मेदवारी मनोनयन दर्ता याये न्ह्यः हे बहाल दुपिन्स पदपाखे राजीनामा बिइमाःगु निर्वाचन आयोगं आचारसंहिता दयकूगु दु।

राजपत्रय् प्रकाशित निर्वाचन आचार संहितया दफा ३६ य् धाउगु दु, ‘छु न स्थानीय तह वा स्थानीय तहया स्वामित्व वा नियन्त्रणय् दुपि वा स्थानीय तहपाखे अनुदान कयातःगु संस्थाय् सुविधा वा पारिश्रमिक कयातःपि वहाल दुपि निर्वाचित वा मनोनित पदाधिकारीपिन्स स्थानीय तहया निर्वाचन उम्मेदवारपिन्स मनोनयन याये न्ह्यः हे वहाल दुपिन्स पदपाखे राजीनामा बिइमाः।’

वंगु २४ घण्टाया दुने देयन्यक थप २७ म्हेसित कोरोना संक्रमण पुष्टि जुगुु दु।

स्वास्थ्य तथा जनसंख्या मन्त्रालयया कथं देयन्यक १ हजार ६५४ पीसीआर परीक्षण २२ म्ह व ३ हजार ९३ एन्टिजेन परीक्षण याउगुलि न्याम्ह याना २७ म्ह संक्रमण पुष्टि जुगु दु।

थौं देयन्यक थप २२० म्ह सक्रमणमुक्त जुगु दु।

थौं लुँ तोलां न्यासः थहावंगु दु।

थौं लुँ तोला न्यासः थहावना ९९ हजार ८ सय रुपैयाँ थ्यंगु दु धका नेपाल सुनचाँदी व्यवसायी महासङ्घं धाउगु दु।

अथेहे वहः तोलां न २० रुपैयाँ थहावंगु दु। वहः तोलां नीतका थहावना थौं १३ सय ९० रुपैयाँ थ्यंगु दु धका महासङ्घं धाउगु दु।

नेवाः वाङमय ख्यलय् छगु प्राज्ञिक संस्थाया रुपय् निस्वनातःगु नेपालभाषा एकेडेमीया ज्यासना पुचःया न्हूधाः जुउगु दु।

चान्सलर चित्तरन्जन नेपाली म्हं मफुगु हुनिं वयकया अनुपस्थितिइ सदस्य सचिव मल्ल के सुन्दरया सभाध्यक्षताय् जुगु एकेडेमीया तःमुज्यां जुगु खः। न्हूम्ह चान्सलर कथं यज्ञरत्न धाख्वाःयात ल्यःगु खः।

सर्वसम्मत या आधारय् जुगु ल्यःज्याँ ल्यःपिं दुजःपिनिगु पदभार विभाजन मंगलबार च्वंगु न्हूगु ज्यासना पुचःया बैठकं भाइस चान्सलर मल्ल के सुन्दर, सदस्य सचिवय् डा पुष्पराज राजकर्णिकार, दाँभरीं वीरप्रसाद भन्सारी व दुजलय् प्रा प्रेमशान्ति तुलाधर, डा चन्द्रमान बज्राचार्य, त्रिरत्न शाक्य, शशीकला मानन्धर, विजयरत्न असंबरे, रजनीमिला महर्जन, राजित बहादुर श्रेष्ठ नापं ख्वपं महेन्द्र गोपाल कर्माचार्य, येँ पाखें निर्मल बज्राचार्य व यलपाखें अमरराज शर्मा, विद्या चित्रकारयात ल्यःगु दुसाः एकेडेमीया प्वंगु पार्षद पदय् नं न्हूपिं दुजः ल्ययेगु क्वछिउगु दु।

नेकपा एमाले नं ३० वैशाख जुइगु स्थानीय तह निर्वाचनया उम्मेदवार छनोटया जिम्मेवारी तोके याउगु दु।

म्हिगः अध्यक्ष केपी शर्मा ओलीया निवास बालकोटय् च्वंगु सचिवालय बैठकं वडानिसे महानगरपालिकाया मेयर जुइ पिनिगु उम्मेदवार छनोट यायेगु जिम्मेवारी पार्टीया थीथी थीथी तहयात तोके याउगु दु।

प्रचार विभागया प्रमुख पृथ्वी सुब्बा गुरुङया कथं वडाअध्यक्ष व वडासदस्यपिनिगु उम्मेदवार जिल्ला कमिटीयात जिम्मा बिउगु दु।

गाउँपालिकाया अध्यक्ष व उपाध्यक्ष व नगरपालिकाका मेयर व उपमेयरया उम्मेदवार जिल्ला कमिटीया सिफारिसय् प्रदेश कमिटीं निर्णय याइ धका उपमहासचिव गुरुङं धाउगु दु।

उम्मेदवार छनोटया मापदण्ड धासा केन्द्रीय कमिटीया ९ व १० चैतय् च्वनिइगु बैठकं क्वछिइगु वयकलं जानकारी बिउगु दु।