येँ महानगरपालिकाय् थौं बहनि ६ः३० बजे तक ९ हजार १ सय ४८ मतगणना याये धुकुगु दु मेयरय् स्वतन्त्र उम्मेदवार बालेन साह न ३ हजार ५ सय २३ मत हये धुकुगु दु।

अथेहे नेकपा एमालेया उम्मेदवार केशव स्थापितं १८ सय ४६ मत व गठबन्धनपाखे कांग्रेसया सिर्जना सिंह न १६ सय ३८ मत हःगु दु।

राप्रपाया मदनदास श्रेष्ठं ३ सय ४७ व स्वतन्त्र उम्मेदवार सुमन सायमी न ३ सय ३५ मत हःगु दु।

येँ महानगरपालिकाया उपमेयरय् नेकपा एमालेया उम्मेदवार सुनिता डंगोलं आःतक मेपि स्वया २४०० मतं न्ह्यने दु।

आइतबाः तक मुख्य निर्वाचन अधिकृतया कार्यालयं बिउगु जानकारी कथं डंगोलं आःतक ३३८४ मत काये धुकुगु दु सा नेकपा एकीकृत समाजवादीया रामेश्वर श्रेष्ठं ९९२ मत हःगु दु।

अथेहे राप्रपाया विनिता मगैया न ७६०, स्वतन्त्र उम्मेदवार बिद्या श्रेष्ठं ३६१, विवेकशील साझा पार्टीया कीर्ति तुलाधरं १५७ मत हःगु दु।

हेटौँडा उपमहानगरपालिकाय् प्यंगु वडाय् मतगणना जुयाच्वंगुलि राप्रपाया दीपकबहादुर सिंह न्हापागु थासय् लाउगु दु।

आःतक ९ हजार २९ मतगणना जुगलि राप्रपाया सिंहं २ हजार ७ सय १० मत हःगु दु सा गठबन्धपाखे एकीकृत समाजवादीया मीनाकुमारी लामां २ हजार ६ सय ६९ मत व नेकपा एमालेया अनन्त पौडेलं २ हजार ४ सय ३४ मत हःगु दु।

अथेहे उपमेयरय् गठबन्धनया राजेश बानियाँ न ३ हजार ९ सय ८२ मत हःगु दु सा एमालेया सुमित्रा काफ्ले न ३ हजार १६ व राप्रपाया इन्दिरा न्यौपाने न ८ सय ३ मत हःगु दु।

भरतपुर महानगरपालिकाया मेयरया मत गणना जुयाच्वंगुलि नेकपा माओवादी केन्द्रया उम्मेदवार रेनु दाहाल निगु मत जक न्ह्यने जुगु दु।

लिपागु मत परिणाम कथं दाहालं २ हजार ४२५ मत हःगु दु सा नेकपा एमालेया उम्मेदवार विजय सुवेदीं २ हजार ४२३ मत हःगु दु। दाहाल गठबन्धनया पाखे उम्मेदवार जुगु खःसा एमाले व राप्रपा अन तालमेल याउगु खः।

मधेस प्रदेशया छगु जब महानगरपालिका पर्साया वीरगञ्ज महानगरपालिया मेयरय् गठबन्धनपाखे जसपाया उम्मेदवार राजेशमान सिंहं २ हजार २ सय ८२ मत हया न्ह्यने लागु दु।

अथेहे नेकपा एमालेया उम्मेदवार विजयकुमार सरावगीं ९ सय १६ मत हउगु दु। अन आःतक वडा नम्बर १, २, ३१ व ३२ या मतगणना जुयाच्वंगु दु।

गठबन्धनय् नेपाली कांग्रेस, नेकपा (माओवादी केन्द्र), नेकपा (एकीकृत समाजवादी) व जसपा दथुइ तालमेल याना सिंहयात उम्मेदवार दयकूगु खः।

एमाले व लोसपा दथुइ तालमेल याना वीरगञ्जया निवर्तमान मेयर सरावगीयात उम्मेदवार दयकूगु खः।