नेकपा (एमाले) या उपाध्यक्ष अष्टलक्ष्मी शाक्यं मिसापिन्स ३३ प्रतिशत जक मखु ५० प्रतिशत अधिकार काये दयेमाः धका धाउगु दु।

थौं मङ्गलवाः १ सय १२ क्वःगु अन्तर्राष्ट्रिय महिला दिवसया लसताय् एमाले नाप च्वंगु अखिल नेपाल महिला सङ्घं येँ जुगु छगु ज्याझ्वलय् न्ववानादीसे शाक्यं आः मिसापिन्स ३३ प्रतिशत जक मखु मिजंपिन्स थे ५० प्रतिशत अधिकार काये दयेमाः धका धयादीगु दु।

वयकलं नेपाःया कुल जनसङ्ख्याया बच्छि मिसापि दुगुलि मिजंपिन्स थे ५० प्रतिशत समान अधिकारया अवधारणा दयकेमाः धका धयादीगु खः।

अथेहे नेकपा एमालेया स्थायी कमिटी सदस्य नाप पूर्वमन्त्री थममाया थापां संविधानय् यानातःगु किटानी व्यवस्था कथं समाजवादया आधार तयार यायेत मिसापिन्त न निर्णायक थासय् थ्यकेमाः धका धयादीगु खः।

वंगु २४ घण्टाया दुने देयन्यक थप १९४ म्ह कोरोना भाइरस संक्रमण पुष्टि जुगु दु।

अथेहे छम्हेसिगु ज्यान वंगु दु। स्वास्थ्य तथा जनसंख्या मन्त्रालयया कथं ३ हजार ६३८ म्हेसिगु पीसीआर परीक्षण यागुलि ७४ म्हजन व २ हजार ७५६ म्हेसित एन्टीजेन परीक्षण याउगुलि १२० म्ह याना १९४ म्हेसित संक्रमण पुष्टि जुगु दु।

वंगु २४ घण्टाया दुने देयन्यक ३४८ म्ह कोरोना संक्रमणमुक्त जुगु दु। अथेहे देयन्यक ५ हजार ८७५ म्ह संक्रिय संक्रमितपि दु।

उकि मध्ये ५ हजार ७५४ म्ह होम आइसोलेसनय् व १३० म्ह संस्थागत आइसोलेसनय् दु।

येँ महानगरया सम्पदा तथा पर्यटन विभागं सञ्चालन याउगु ४५ दिं  काष्ठकला तालिम क्वचाःगु दु।

विभागं नेपाल हस्तकला महासंघ कला तथा शिल्प परिषद् नाप  सहकार्य याना रोजगारमुलक आधारभूत तालिम पुस ८ गतेनिसे राष्ट्रिय सभा गृहय् आयोजना याउगु खः।

समापन ज्याझ्वलय् प्रशिक्षार्थीपिन्स तयार याउगु काष्ठकला प्रदर्शन याउगुलि मेयर विद्यासुन्दर शाक्य, उपमेयर हरिप्रभा खड्गी श्रेष्ठपिन्स अवलोकन याउगु खः।

महानगरया मेयर शाक्यं, तालिम काःपि प्रशिक्षार्थीपिन्स समापन जुइ न्ह्यः ह सिँया वर्कसप चायकूगु खँ न्यना थः तसकं लय्तागु दु धका धयादीगु खः। ‘जिमिसं यक्को तालिम बिया तर तालिम कया प्रमाण पत्र कायेधुका यक्कोसिया ज्या मया।

मेयर शाक्यं धयादीगु दु, ‘२०७२ सालया भुखाचं सम्पदा क्षेत्रय् यक्को क्षति जुगु काष्ठकला ज्याय् कलाकारपि यक्को मागु दु तर उगु इलय कलाकारपि माले थाकू। जिमिसं मेगु न विशेषज्ञ तालिम माःसा उपलब्ध याये।’ उगु ज्याभ्वलय उपमेयर हरिप्रभा खड्गी श्रेष्ठं, काष्ठकला थे धातु, प्रस्तर लगायत मेमेगु विधाय् न तालिम याये। थज्यागु तालिमय् मिसापि न सहभागी जुगु उत्साहित खः धका धयादीगु खः।

सम्पदा विभागया प्रमुख अर्चना शाक्य, उपनिर्देशक श्रृजु प्रधान, तालिमया संयोजक प्रदिप शाक्य, हस्तकला महासंघ कला तथा शिल्पी परिषदया अध्यक्ष राजमान बज्राचार्यपिन्स न थःथःगु खँ तयादीगु खः।

नेवाः पत्रकार राष्ट्रिय दबू मिसा विभागया ग्वसालय् ११२ क्वगु अन्तर्राष्ट्रिय नारी दिवसया लसताय् तःजिक हःगु दु।

“सन्चार जगतय् मिस्त“ विषय छगु अन्तरक्रियायासे स्वम्ह पत्रकारपिन्त सम्मान याउगु खः। येँ महानपालिकाया मेयर बिद्यासुन्दर शाक्य व उपमेयर हरिप्रभा खड्गी श्रेष्ठं छगु ज्याझ्वः दथुइ पत्रकारपि मन्जु बज्राचार्य, पुर्णिमा शाक्य व अनिता गुरुङपिन्त सम्मान यानादीगु खः।

सन्चार जगतय् उगु ज्याझ्वलय् येँ महानगरया मेयर शाक्यं आः याउगु ब्यवस्थां मिसापिन्त आरक्षणबिया पालिका स्तय् यक्को मिसापि उप्र प्रमुख व दुजःपि थ्यःगु दु। लिपा देय्या प्रमुख पदय् न याउक थ्यनिइगु भलसा कयादीगु खः।

अथेहे उप मेयर खड्गी श्रेष्ठं देशय् राजनैतिक ह्यूपाः हयेगु निति तक मिसापिनिगु भुमिका यक्को दु धयादिसे वयकलं वहे कारणं थौं मिसापि देय् या थीथी पदय् प्रमुख पदय् मिसापि थ्यंगु दु धका धयादीगु खः।

“सन्चार जगतय् मिस्त“ बिषय वरिष्ठ पत्रकार सुभेच्छा बिन्दुं न्ववानादीगु खः। ज्याझ्वःया कजि रचना श्रेष्ठया सभाध्यक्षताय् जुगु उगु ज्याझ्वलय नेपाल पत्रकार महासंघया न्वकु बाला अधिकारी, मधेशी पत्रकार समाजया नायः मोहन सिंह व दबूया केन्द्रिय अध्यक्ष सुरजबीर बज्राचार्यपिन्स पत्रकार ख्यलय् मिसा पत्रकारपिनिगु भुमिका बिषय न्ववानादीगु खः।

दबूया सहसचिव प्रेरणा शाक्यं लसकुस यानादीगु उगु ज्याझ्वलय् सल्लाहकारपिं रमेश काजी स्थापित, विजयरत्न असंबरे व किरण शाक्यपिनिगु न उपस्थिति दुगु खः।

लुँ तोला १ लाख स्वया अप्पो थ्यंगु दु। थौं तोलां २ हजार रुपैयाँ थहावंग दु।

थौं निद्धः थहावना १ लाख १ हजार ९ सय रुपैयाँ थ्यंगु दु धका नेपाल सुनचाँदी व्यवसायी महासङ्घं धाउगु दु।

अथेह वहः तोला न ३५ रुपैयाँ थहावंगु दु। वहः तोला ३५ रुपैयाँ थहावंना १४ सय १५ रुपैयाँ थ्यंगु दु धका महासङ्घं धाउगु दु।