नेवाः न्ह्यलूवाः नाप साहित्यकार मल्ल के सुन्दरं च्वयादीगु “थायमदु त्वाः छपुलु“ सफू छगु ज्याझ्वः दथुइ पितब्वज्या जूगु दु। नायसुइ न्ह्याःगु खः।

येँ महानगरपालिकाया मेयर विद्यासुन्दर शाक्यं उगु “थायमदु त्वाः छपुलु“ सफूया पितब्वज्या यानादीगु खः।

मूपाहाँ शाक्यं सफूया बारे नुगःखँ तयेगु झ्वलय् थः छम्ह राजनीतिक कार्यकर्ताया रुपय् पलाः न्ह्याकागु धइगु मल्ल के सुन्दर, पद्मरत्न तुलाधर थेंज्यापिं पिनिगु पलाः ख्वाँय् लिनागु खः धका धयादिगु खः।

थायमदु त्वाःया ऐतिहासिक, साँस्कृतिक खँया नापनापं थायमदु त्वाःया थीथी व्यक्तित्वपिनि बारे च्वयातगु उगु सफूयात कया समालोचक प्राध्यापक नर्मदेश्वर प्रधान व साहित्यकार शरद कसाः नं समालोचनात्मक टिप्पणी न्ह्यब्वयादिगु खः।

ज्याझ्वः समितिया नायः प्रा डा रमेश श्रेष्ठया सभाध्यक्षताय् जुगु उगु ज्यााझ्वलय् रिजेन्द्र राजभण्डारीं लसकुस व न्वकु राजेश श्रेष्ठं सुभाय् देछानादीगु खःसा २५ वडाध्यक्ष नीलकाजी शाक्य विशेष पाहाँ कथं उपस्थित जुयादीगु खः ।

बालाजु ढुङ्गेधारा चुकय् नाप च्वंगु तरकारी बजारय् मिँ न्वंगु दु।

थौं चान्ह्यः १२ः१५ बजे अन मिँ च्याना ६० निसे ७० गु पसः नोक्सानी जुगु दु धका प्रहरीं धाउगु दु।

महानगरीय प्रहरी वृत्त बालाजुया कथं ६० निसे ७० गु स्टल दुगु छगु टहराय् मिँ च्याउगु खः। अन न्यागः दमकलया ग्वाहालिं चान्ह्य १ बजे मिँ स्यायेत ताःलाउगु खः।

मिँ च्याउगु कारण खुल्ले जुगु धासा मदुनि

येँ महानगर वडा नं. २० मरु वुद्ध भगवान चुकय् च्वंगु ताम्राकार आगँछेँ पुननिर्माण क्वचाउगु दु।

पुननिर्मित आगँछेँय् येँ महानगरया मेयर विद्यासुन्दर शाक्यं छगु ज्याझ्वः दथुइ उलेज्या यानादीगु खः। ७०५.४ बर्गफिट क्षेत्रफलय् निर्माण जुगु उगु आगँछेँ स्वंगु तल्लाया खः।

उलेज्या लिपा न्ववानादीसे मेयर शाक्यं धयादीगु दु, गुठीयारं जक धाने यानाच्वंगु परम्परायात सरकारपाखे ग्वाहालि याना वयाच्वनागु दु। ‘ई हिलावगु नाप बजाः भा थहावना पुस्ता पुस्तानिसे न्ह्यानाच्वंगु परम्परा न्ह्याकेत थाकुगु दु। थुगु इलय् जिमिसं राज्यंपाखे सहभागिता क्यनागु दु।

सम्पदा बचे यायेत जनस्तरपाखे वंगु माग ग्रहण यासे मर्मत, सम्भार व पुननिर्माणया लगानी याना वयाच्वनागु दु।’ वडा २० सम्पदा क्षेत्र दुगु थाय् खः। येँ म्हसिइकेगु काष्ठमण्डप न थ्व हे वडाय् खः। कार्यक्रमय् वडा २० या अध्यक्ष राजेन्द्र मानन्धरं धयादीगु दु,‘सेवा सुविधा वितरण व सम्पदा संरक्षण वडाय् प्राथमिक योजना दु।

आगँछेँ पुननिर्माणया लागि २०७७ फागुन ७ गते उपभोक्ता समितिनाप सम्झौता जुगु खः।

प्रेस चौतारी नेपाल लुम्बिनी प्रदेशया अध्यक्षय् शोभाखर पन्थी सर्वसहमत ल्यउगु दु।

लुम्बिनी प्रदेशया स्थायी राजधानी दाङया देउखुरीइ जुगु न्हापागु अधिवेशनं पन्थीया अध्यक्षताय् ४६ म्ह सदस्यीय कार्यसमिति ल्यउगु खः।

उकिइ उपाध्यक्षय् दशरथ घिमिरे, लक्ष्मी तिमिल्सेना, महासचिवय् निरा गौतम, सचिवय् वेनी माधव बस्याल, ओपेन्द्र बस्नेत व कोषाध्यक्षय् एलवी थापायात ल्यउगु खः।

राप्रपाया नेता गणेश शेरचन ७८ दँय् मन्त।

चिनी ल्वय् व जँलास्य समस्यां पीडित शेरचन आइतबाः सुथय् ग्राण्डी अस्पतालय् उपचारया झ्वलय् मदुगु धका राप्रपाया प्रवक्ता मोहन श्रेष्ठं जानकारी बिउगु दु।

शेरचन राप्रपाया संस्थापक नेता नाप तत्कालीन राप्रपा नेपालया महामन्त्री खः। शेरचनयात थौं हे पशुपति आर्यघाटय् अन्तिम संस्कार याइ धका पारिवारिक स्रोतं धाउगु दु।

शेरचनया जहान, स्वम्ह काय् व छम्ह म्ह्याय्दी।