मन्दाकिनी हाइड्रोपावर लिमिटेडया आईपीओ थौं (साउन १७ गते) बाँडफाँड जुत्यःगु दु।

बिक्री प्रबन्धक बीओके क्यापिटल मार्केट लिमिटेडया कार्यालय येँया नारायणचौरय् न्हिनसिया ४ बजे आईपीओ बाँडफाँड जुइ धका धाउगु दु।

कम्पनीं थ्व वःगु साउन ९ गतेनिसे सर्वसाधारणया लागि १०० रुपैयाँया दरं ११ करोड ७६ लाख ७ हजार ३०० रुपैयाँ बराबरया ११ लाख ७६ हजार ७३ कित्ता आईपीओ निष्कासन याउगु खः।

सीडीएस एन्ड क्लियरिङया कथं उगु आईपीआय् १६.५३ गुणा स्वया अप्पो आवेदन वःगु धका धाउगु खः।

लुँ तोलां थौं निसः थहावंगु दु।

थौं लुँ तोलां निसः थहावना ९५ हजार ६ सय रुपैयाँ न कारोबार जुगु दु धका नेपाल सुनचाँदी व्यवसायी महासङ्घं धाउगु दु।

अथेहे, वहःया भाः धाःसा स्थिर जुया तोलाया १ हजार २ सय २० रुपैयाँ न हे कारोबार जुगु दु धका महासङ्घं धाउगु दु।

प्रदेश १ या मुख्यमन्त्री राजेन्द्रकुमार राईयात कोरोना संक्रमण जुगु दु।

सोमबाः पीसीआर जाँच याउगुलि वयकःयात कोरोना संक्रमण खनेदुगु खः। मुख्यमन्त्री नाप वयकःया परिवारया सदस्यपि, सचिवालय, निवासया सुरक्षाकःमि व कर्मचारी लगायत १६ म्हेसिगु म्हिगः सोमबाः पीसीआर परीक्षण याउगु खः।

पीसीआर परीक्षण याउगुलि मुख्यमन्त्री नाप वयकःया जहान शोभा पाठक व राजनीतिक सल्लाहकार जीवन राईयात न संक्रमण खनेदुगु धका मुख्यमन्त्रीया प्रेस सल्लाहकार बन्धु पोखरेलं धाउगु दु।

मुख्यमन्त्री नाप स्वम्हेसिगु न स्वास्थ्य अवस्था सामान्य दु धका धाउगु दु।

श्रावण शुक्ल पञ्चमीया दिं थौं नाग पञ्चमी कुन्हु नागयात पुजा यायेगु याइ।

थौं सुथय् म्वः ल्हुया  मत च्याका, कलश व गणेश पूजा याना गोबर, दुरु, सितू तया मूँ लुँखाय् नाग टासे याना पूजा यायेगु याइ।

अनन्त, बासुकी, पद्म, महापद्म, तक्षक, कुली, कर्कट, शङ्खनाग, शेषनागया फोतो लुँखाय् टिकेगु याइ।

थौं येँया नागपुखुलि व टौदह, ख्वपय् सिद्धपूखुलि विशेष पूजा जुइ।

नेवाः देय् दबू स्वनिगः विशेष प्रदेशया नेतृत्व संघीय सरकारया संस्कृति पर्यटन तथा नागरिक उड्डयन मन्त्रीनिसें भाषा आयोगय् तकं डेलिगेशन वंगु दु।

भाषा आयोगया सिफारिस कथं वाग्मती प्रदेशय् नेपालभाषा व तामाङ भाषायात सरकारी कामकाजि भाषा कथं लागू याकेगु नितिं आइतवाः संघीय सरकारया संस्कृति पर्यटन तथा नागरिक उड्डयन मन्त्री जीवनराम श्रेष्ठया ज्याकुथिइ हे वना भाषा आयोगया सिफासिर कथं ज्या न्ह्याके बिइगु व न्ह्याकेगु नितिं विशेष भूमिका म्हितेत इनाप यानादीगु खः।

मन्त्री श्रेष्ठं भाषा आयोगया सिफासिर कथं वाग्मती प्रदेशय् नेपालभाषा व तामाङ भाषायात कामकाजि भाषा कथं लागू याकेगु नितिं भूमिका म्हिगतेगु व वागमती प्रदेशय् न थःम्हं समन्वयकारी भूमिका म्हितेगु बचं बियादीगु खः। साउन १५ गतेया डेलिगनय् देय् दबू स्वनिगः विशेष प्रदेशया अध्यक्ष श्रीकृष्ण महर्जन, न्वकू प्रा.डा. अमिता प्रधान शाक्य, मू छ्याञ्जे गणेशमान श्रेष्ठ, छ्याञ्जे गंगादेवी महर्जन व तोखाया समाजसेवी अष्टनारायण डंगोलपिं उपस्थिति दुगु खः।

अथेहे, साउन १६ गते सोमवाः भाषा आयोगया ज्याकुथिइ वना भाषा आयोगया सदस्य भाषाविद् अमृत योञ्जनलिसे सहलह ब्याकूगु दु। उगु इलय् संघीय सरकारया संस्कृति पर्यटन तथा नागरिक उड्डयन मन्त्रालयपाखें वाग्मती प्रदेशय् छ्वःगु पौया नक्कल तकं लःल्हायेगु ज्या जूगु खः।

आयोगया सदस्य योञ्जनं नेवाः व तामाङ समुदायया मातृभाषा वाग्मती प्रदेशय् कामकाजि भाषा कथं कार्यान्वयन याकेगु नितिं थःम्ह माःगु कथंया भूमिका म्हितेगु जुइ धकाः बचं बियादीगु खः। ज्याझ्वलय् देय् दबू स्वनिगः विशेष प्रदेशया अध्यक्ष श्रीकृष्ण महर्जन, मू छ्याञ्जे गणेशनमान श्रेष्ठ, छ्याञ्जे गंगादेवी महर्जन, दुजः नरेश श्रेष्ठ, येँ जिल्ला अध्यक्ष धनबहादुर महर्जन तिमिला, यल जिल्ला अध्यक्ष हेराकाजि महर्जन लगायतपिनिगु सहभागी दुगु खः।