येँ महानगरपालिकाया पुर्व मेयर बिद्यासुन्दर शाक्य न कोरना संक्रमित जुगु दु।

म्हिगः बहनिं म्ह स्याउगुलि थौ स्वास्थ्य परिक्षण यायेगु झ्वलय् कोरना संक्रमित पुष्टि जुगु खः।

थौं शाक्यं येँया क्षत्रपाटी निःशुल्क चिकित्सालय् वनाः थःगु स्वास्थ्य परिक्षण याउगुलि कोरोना पुष्टि जुगु धका लहनान्युजयात धयादीगु खः।

कोरोनाया स्वगू हे खोप कयादी धुकुम्ह पुर्व मेयर शाक्यया स्वास्थ्य सामान्य दु सा छेँ हे आइसोलेसनय् च्वना च्वगु दु।

शेयर बजाः थौं सामान्य घटे जुगु दु। शेयर बजाः परिसूचक नेप्से थौं मङ्गलवाः ३ दशमलव ८१ अङ्कं घटे जुया २ हजार १ सय ९३ दशमलव ४३ विन्दुइ कुहावंगु दु।

थौं बैंक, विकास बैंक, होटल,  बीमा, मेमेगु व लगानी समूहया शेयर घटे जुगु दु। व्यापार, जलविद्युत्, फाइनान्स, उत्पादन, लघुवित्त व म्युचल फन्ड समूहया शेयर धाःसा सामान्य थहावंगु दु। नेप्से नाप कारोबार रकम न घटे जुगु दु।

म्हिगः सोमवाः ४ अर्ब ६७ करोड रुपैयाँ शेयर कारोबार जुगुलि थौं २ सय १७ कम्पनीया ७८ लाख १३ हजार कित्ता शेयर ३ अर्ब २९ करोड ३२ लाख रुपैयाँ कारोबार जुगु खः।

दकलय् अप्पो शिवम् सिमेन्ट्सया २९ करोड ३२ लाख रुपैयाँया शेयर किनबेच जुगु खः। राष्ट्र उत्थान लघुवित्तया शेयर ४ प्रतिशत स्वया अप्पो घटे जुगु खः।

विन्ध्यवासिनी हाइड्रो, साम्लिङ पावर व हिमाल दोलखा जलविद्युत् कम्पनीया शेयर धाःसा १० प्रतिशतं थहावंगु दु।

लुम्बिनी विकास गुरुयोजना विपरीत रिसोर्टयात जग्गा बिइगु निर्णय खारेज याउगु दु।

संस्कृति, पर्यटन तथा नागरिक उड्डयनमन्त्री नाप लुम्बिनी विकास कोष परिषदया अध्यक्ष जीवनराम श्रेष्ठया अध्यक्षताय् थौं च्वंगु परिषदया बैठकं ‘क्याम्पेन ग्राउन्ड’ या जग्गा निजी कम्पनीयात बिइगु वैशाख १९ गतेया निर्णय खारेज यानाबिउगु दु।

गुरुयोजनाविपरीत संसारा वेलनेस नां या कम्पनीयात लुम्बिनी विकास कोष दुने रिसोर्ट सञ्चालन यायेत बिउगुे अनुमति खारेज याना बिउगु दु। बैठकं लुम्बिनीइ पर्यटक सुविधाया लागि विद्युतीय बस सञ्चालन यायेगु निर्णय याउगु दु।

लच्छिया दुने विद्युतीय बस सेवा सञ्चालन यायेगु निर्णय याउगु खः। लुम्बिनी वःनिपि पर्यटकपिन्त सुविधायुक्त व याउक अवलोकनया लागि विद्युतीय बस सञ्चालन यायेगु निर्णय याउगु दु। कोषया परिषद् बैठकं लुम्बिनी गुरुयोजनाया ज्या चालु आर्थिक दँ दुने सम्पन्न यायेगु निर्णय न याउगु दु।

मधेशी एकता समाजं येँय् मधेशय् शिक्षा धइगु विषयस अन्तरक्रिया ज्याझ्वः याःगु खः।

ज्याझ्वलय् प्राध्यापक प्रमोद मिश्र, शिक्षाविद् विनय कुसियैत, अधिवक्ता मोहना अन्सारी, अनुसन्धानकर्ता डा. सोहन साह, अधिकारकर्मी रामसुफल सदाय, दलित अभियन्ता संजय पासी व च्वमि लेखिका रीता साहं न्ववानादीगु खः ।

वक्तातय्सं जनक, बुद्ध व गार्गीया भूमि धकाः म्हस्यूगु तराई मधेश शिक्षाय् ल्यूने लानावंगु चिन्ताया विषय जूगु बिचाः तयादिल। शिक्षाया अवस्था चिन्ताजनक जूगुलिइ राज्य व समाज निम्हं दोषी जूगु वय्कःपिनिगु धापू खः।

प्रोफेसर प्रमोद मिश्रं मधेशय् शिक्षाया अवस्था सहर स्वयां ग्रामीण भेगय् भयावह जूगु धयादिल। वय्कलं कथित क्वय्या जाति अर्थात् दलित समुदायया बसोवास दुगु थासय् शिक्षाया अवस्था झन हे खराब जूगु न्ह्यथनादिल।

मानन्धर ल्याय्म्ह पुचःया ‘रजत जयन्ती समारोह’ थिमिइ क्वचाःगु दु।

‘थःगु धर्म तजिलजियात न्ह्याबलें थकाय्’ धइगु मूल नारा बियाः स्थापना याःगु थिमि चोडे त्वाःया मानन्धर ल्याय्म्ह पुचलं ज्याझ्वलय् लोपोन्मुख नौ बाजाया ब्वज्या याःगु खः। पुचःया २५दँ पूवंगु लसताय् जूगु ज्याझ्वलय् मध्यपुर थिमि नगर प्रमुख सुरेन्द्र श्रेष्ठं लोप जुइत्यंगु मौलिक सम्पदा व तजिलजि ल्यंकेगु अभियानय् स्थानिय सरकारया ग्वहालि दयाच्वनीगु प्रतिबद्वता वय्कलं प्वंकादिल।

अथे हे, नगरपालिका उप प्रमुख विजयकृष्ण श्रेष्ठं छगू हे तालय् नौ बाजाया न्ह्यब्वया स्वयाः मन आनन्दित जूगु धयादिल। समारोहस मध्यपुर थिमि वडा नं ५ या वडाध्यक्ष बालकृष्ण श्रेष्ठ, भक्तपुर उद्योग वाणिय संघया नायः शिव प्रसाद मानन्धर, भक्तपुर इलेक्ट्रोनिक्स व्यवसायी संघया नायः गंगाराम मानन्धर, भक्तपुर चेम्बर अफ कमर्सया नायः न्हुच्छेरत्न मानन्धर, नेपाल ज्ञानमाला समिति, भक्तपुर क्षेत्रीय उपसमितिया कजि पुण्यरत्न शाक्यं भिंतुना ब्युसें थःथःगु खँ तयादीगु खः।

पुचःया छ्यान्जे पूर्णकुमार मानन्धरं लसकुस यानादीगु ज्याझ्वः रत्नप्रसाद मानन्धरया सभापतित्वय् क्वचाःगु खः। औपचारिक ज्याझ्वः धुंकाः सांस्कृतिक ज्याझ्वलय् विवेक मानन्धर नेतृत्वया झीगु नेवाः पुचःया सांगीतिक न्ह्यब्वया, किशोरीतय् हुलाप्याखं व म्ये नं न्ह्यब्वःगु खः। सांगितिक ज्याझ्वलय् चण्डिका घजु, रञ्जना सितिखु, बाबुकाजी मानन्धर, चनेलाल मानन्धरलिसें नं म्ये हालादीगु खः।