जनार्दन शर्मायात अर्थमन्त्री नियुक्ति याउगु विरोधय् नयाँ बानेश्वरय् जुगु प्रदर्शनय् प्रहरीं हस्तक्षेप याउगु दु।

युथ कंग्रेस नेपालया आह्वानय् जुगु प्रदर्शनय् प्रहरीं लाठी चार्ज यायेवं प्रदर्शनकारीपि तितरबितर याउगु खः। व हे झ्वलय् प्रहरीं स्वम्ह मिसा नाप २५ म्हेसित ज्वःगु दु धका युथ कंग्रेस नेपालं धाउगु दु।

बजेट निर्माणया झ्वलय् अनधिकृत मनूपाखे करया भाः हिइगु धका द्धपः बिउसे संसदीय छानबिन समितिं बालाक्क छानबिन हे मयासे निर्दोष ठहर यना शर्मायात हाकन अर्थमन्त्री दयकूगुलि उमिसं प्रदर्शन याउगु खः।

म्हिगः साढे ५४ अङ्कं थहावंगु शेयर बजाः थौं न सामान्य थहावंगु दु।

शेयर बजाः परिसूचक नेप्से थौं १ दशमलव १५ अङ्कं थहावना २ हजार १ सय ९६ दशमलव २५ विन्दुइ थ्यःगु दु। थौं बैंकिङ, व्यापार, जलविद्युत्, उत्पादन व लगानी समूहया शेयर थहावंगु दु।

२१७ कम्पनीइ १ करोड ५ लाख १८ हजार कित्ता शेयर ४ अर्ब ६७ करोड रुपैयाँ कारोबार जुगु खः। दकलय् अप्पो शिवम् सिमेन्ट्सय् ३८ करोड ३१ लाख रुपैयाँया शेयर किनबेच जुगु खः।

थौं बुटवल पावर कम्पनी, गुडविल फाइनान्स व सिटिजन म्युचल फन्डया शेयर ६ प्रतिशत स्वया अप्पो थहावंगु दु। स्वाभिमान लघुवित्तया शेयर धासा ५ प्रतिशत स्वया अप्पो घटे जुगु दु।

लुँया भाः तोलां थौं प्यसः घटे जुगु दु।

थौं लुँ तोलां प्यसः घटे जुया ९५ हजार ४ सय रुपैयाँ न कारोबार जुगु दु धका नेपाल सुनचाँदी व्यवसायी महासङ्घं धाउगु दु।

अथेहे, थौं वहः न तोलां झीतक घटे जुया १ हजार २ सय २० रुपैयाँ न कारोबार जुगु दु धका महासङ्घं धाउगु दु।

प्रमुख प्रतिपक्ष दल नेकपा एमाले न बजाः भाः थिके याउगु व भ्रष्टाचारविरुद्ध विरोध प्रदर्शन थौं याउगु दु।

गठबन्धन सरकार गठन जुगु दच्छिया दुने बजाः भाः तसकं थकाउगु नाप हरेक क्षेत्रय् भाः थकया नागरिक पिनिगुे जीवन कष्टकर जुयावना च्वंगु विषय कया थौं सोमवाः एमाले न विरोध प्रदर्शन याउगु दु।

एमाले न जनप्रदर्शन वसन्तपुरय् मुना असं, भोटाहिटी, प्याफः, न्यक, थाय्मदु, जुया शान्तिबाटिकाय् वना समापन याउगु खः।

जनप्रदर्शनय् पार्टीया स्वनिगःया उपत्यका विशेष प्रदेश, सम्पर्क कमिटी, जनवर्गीय सङ्गठन, सांसद, पार्टीया केन्द्रीय विभागपिनिगु सहभागिता दुगु खः। प्रदर्शनय् ब्बतिइ कायेत थीथी ब्यानर, ग्यास सिलिन्डर ज्वना विरोध याउगु खः।