पोखरा महानगरपालिकाया मेयर धनराज आचार्य याउगु सम्पत्ति विवरण सार्वजनिक याउगु दु।

आचार्यं थःगु व जहानया नामय् दुगु सम्पत्ति विवरण पोखरा महानगरपालिकाया वेबसाइटपाखे सार्वजनिक याउगु खः। मेयर आचार्यं ४३ करोड ६१ लाख ४५ हजार ६ सय १६ रूपैयाँ बराबरया सम्पत्ति दुगु धका धाउगु दु। बैंक, वित्तीय कोष, नातेदार व पासापिके याना २ करोड ८५ लाख रुपैयाँ ऋण दुगु धका धाउगु दु।

ऋण घटे यासं खुद सम्पत्ति ४० करोड ७६ लाख ४५ हजार ६ सय १६ रूपैयाँ दु। मेयर आचार्यया यक्को रकम शेयरय् दु। थीथी कम्पनीया शेयर व लगानी याना २५ करोड ९९ लाख ४५ हजार ६ सय १६ रूपैयाँ दु धका धाउगु दु।

आचार्य याके २ करोड बराबरया प्यगः गाडी व स्वगः स्कुटर दु धका धाउगु दु।

पोखरा–९ नयाँ बजारय् जहान पुष्पकुमारी पौडेलया नामय् ९ करोड २५ लाख बराबरया निखा छेँ, येँ सीतापाइलाय् १ करोड ८५ लाख बराबरया छखा छेँ न दु।

अथेहे ५४ तोला लुँ, ३८ तोला वहः व ५ तोला हिरा दु धका सम्पत्ति विवरण सार्वजनिक याउगु दु।

स्वनिगलय् थप स्वम्हेसित हैजा पुष्टि जुगु दु।

थ्व नाप आः हैजा पुष्टि जूपि ३४ म्ह थ्यःगु दु धका स्वास्थ्य तथा जनसङ्ख्या मन्त्रालयं धाउगु दु।

हैजा सङ्क्रमण जूपिमध्ये २० म्ह मिजं व १४ म्ह मिसापि खः।

प्रमुख प्रतिपक्षी नेकपा एमाले न सरकारविरुद्ध प्रदर्शन याइगु जुगु दु।

महंगी, भ्रष्टाचार लगायतया मुद्दा ल्ह्वना वइगु १६ साउननिसे प्रदर्शन यायेगु धका एमाले स्थायी कमिटी सदस्य कृष्णगोपाल श्रेष्ठं जानकारी बिउगु दु।

वयकःया कथं बसन्तपुरनिसे सुरु जुइगु ¥याली शहरया थीथी थासय् चाःहिलिइगु जुगु दु। जनप्रदर्शनया लागि श्रेष्ठया हे संयोजकत्वय् तयारी समिति दयकूगु दु।

स्वनिगःया फोहर व्यवस्थापनया ज्या थौंनिसे रोके जुगु दु। थ्व स्वया न्ह्यः फोहर व्यवस्थापन याना वयाच्वंगु नुवाकोटया सिसडोलय् दीर्घकालीन फोहर व्यवस्थापन जुइगु थाय् बञ्चरेडाँडा वनिइगु २ किलोमिटर लँ मर्मत यायेगु ज्या जुयाच्वंगुलि छवाः तक फोहोर ढुवानीया ज्या बन्द याउगु खः।

सहरी विकास मन्त्रालयं फोहरया गाडी वयेगु वनेगु लँ मर्मतया ज्या जुयाच्वंगु धासे येँ महानगरपालिकायात छु दिं फोहोर ढुवानीया गाडी चले मयायेत इनाप याउगु दु।अथे इनाप याउगु कथं येँ महानगरं थौंनिसे फोहोर व्यवस्थापन ज्या रोके याउगु खः।

न्हि न्हि स्वनिगलय् १ हजार २०० मेट्रिकटन फोहोर सिसडोलय् व्यवस्थापन याना वयाच्वंगु खः। उकिमध्ये येँ  महानगरपाखे ५०० मेट्रिकटन फोहर फिहावइ। निजी व येँ महानगरं न्हि २०० गः गाडी फोहर वनाच्वंगु खःसा आः मुस्किलं ५० गः गाडी जक सिसडोल वनाच्वंगु दु।

भाषा आयोगया सिफारिसय् वागमती प्रदेशय् सरकारी कामकाजी भाषा कथं नेपालभाषा व तामाङ भाषायात लागू यायेमाःगु माग याना नेवाः देय् दबू किपू नगर समितिं साउन ४ गते किपुलिइ प्रदर्शन याःगु दु।

किपूया लोकतान्त्रिक चोकय् मुना प्रदर्शन शुरु याःगु खः। उगु प्रदर्शनय् देय् दबू किपू नगर समितिया अध्यक्ष बुद्धिलाल ज्यापु, किपू नगर समितिया सल्लाहकार उज्जल महर्जन, येँ जिल्ला समितिया न्वकू रामभोला महर्जन, दबू स्वनिगः विशेष प्रदेशया दुजः अधिवक्ता नरेश श्रेष्ठपिन्सं भाषा आयोगया सिफारिस कथं नेवाः भाय् व तमाङ भाय्यात वागमती प्रदेशय् सरकारी कामकाजि भाषाया रुपय् कार्यान्वयन यायेमाः धकाः माग यानादिल।

अनं लिपा प्लेकार्ड सहित जुलुस पिकया किपूया न्हूबजाः लागााय् चाःहिउगु खः। सभाय् मूवक्ता कथं देय् दबू स्वनिगः विशेष प्रदेशया अध्यक्ष श्रीकृष्ण महर्जनं साउन ५ गतेनिसें वागमती प्रदेशया संसदया अधिवेशन जूगुलिं संसदया दबाव बिइगु नितिं जूगु प्रदर्शन तकं पायछि इलय् पायछि ज्या जुल धकाः धयादिल।

वयकलं यदि वागमती प्रदेशं भाषा आयोगया सिफारिस कथं नेपालभाषा व तामाङ भाषायात सरकारी कामकाजिया भाषाया रुपय् लागू मयात धाःसा तःधंगु आन्दोलन यायेत बाध्य जुइ धकाः ख्याच्वः बियादीगु खः।