कोरोना भाइरसया स्वगुगु लहरया कारण माघया न्हापागु वाःनिसे बन्द जुयाच्वंगु पशुपति द्यःया थाय् माघ २८ गते (शुक्रबाः) निसे खुल्ला याइगु जुगु दु।

विश्वस्वास्थ्य संगठन व नेपाल सरकारं जारी याउगु स्वास्थ्य मापदण्ड पालना यासे कन्ह्य शुक्रबाः निसे द्यःया खुल्ला यायेगु पशुपति क्षेत्र विकास कोषया सदस्य सचिव डा. कर थापां जानकारी बिउगु दु।

कोरोना संक्रमण अप्पोया वंगुलि वंगु माघ ५ गतेनिसे पशुपतिनाथ मन्दिर भक्तजनया लागि बन्द याउगु खः। द्यःया थाय् बन्द जूसा नित्य पूजा धासा जुयाच्वंगु खः।

राष्ट्रपति विद्यादेवी भण्डारी शताब्दी वाङ्यमय पुरुष सत्यमोहन जोशीया भिं उसाँय् या कामना यानादिगु दु।

राष्ट्रपति भण्डारीयापाखें संस्कृति मामिलासम्बन्धी सल्लाहकार माधव शर्मा नाप सचिवालयया दुजःपिं संस्कृतिविद् जोशी वासः यानाच्वंगु यलया ग्वार्कोय् किष्ट अस्पतालय् वया भिंउसाँयया कामना यानादीगु खः।

अथेहे स्वास्थ्य तथा जनसङ्ख्यामन्त्री विरोध खतिवडा नं अस्पताल वनाः जोशीया स्वास्थ्यस्थिति बारे जानकारी कयादिगु खः।

सरकारं नेपाल प्रहरीइ स्वम्ह एआईजी थपे यायेगु निर्णय याउगु दु।

मन्त्रिपरिषदं वंगु सोमबाःया बैठकं नेपाल प्रहरीइ स्वम्ह एआईजी थपेयाना च्याम्ह थ्यकेगु निर्णय याउगु दु।

आः प्रहरीइ न्याम्ह एआईजीया ब्यवस्था दुगु खः। मन्त्रिपरिषदया निर्णय गोप्य तयातःगु खःसा आः निर्णय कार्यान्वयनया झ्वलय् विवादित जुगु दु।

सेयर कारोबार मापक नेप्से परिसूचक दोहोरो अंकं घटे जुगु दु।

स्थानीय तहया निर्वाचन घोषणा जुया बजार थहावनिइगु अपेक्षा यासा मंगलबाःनिसे घटे जुगु दु। बुधबाः नेप्से परिसूचक जक मखु कारोबार रकम तक न म्हो जुगु दु।

मंगलबाः ५ अर्ब स्वया अप्पोगु सेयर कारोबार रकम बुधबाः साढे ३ अर्ब न मथ्यंगु दु। सेयर कारोबार मापक नेप्से परिसूचक २२ दशमलव ११ अंकं घटे जुया २ हजार ८ सय १३ दशमलव ४७ अंकय् कुहावंगु दु।

उखे ‘क’ वर्गया कम्पनीपिनिगु कारोबार मापन याइगु सेन्सेटिभ इन्डेक्स न ३.५१ अंकं घटे जुगु दु। न्हिच्छि यकं ४५ हजार ११२ कारोबारपाखे २२३ कम्पनीया ६५ लाख २० हजार ६२८ कित्ता सेयर किनबेच जुगु खः।

करोबार रकम ३ अर्ब ४७ करोड ११ लाख ९ हजार १८२ रुपैयाँय् रोके जुगु दु।

वंगु २४ घण्टाय् दुने स्वनिगलय् १०१७ म्हेसित कोरोना संक्रमण पुष्टि जुगु दु।

उकि मध्ये येँ ८९० म्ह कोरोना सक्रमण जुगु दु।

अथेहे, यलय् १०२ म्ह व ख्वपय् २५ म्हेसित संक्रमित जुगु दु।