नेकपा एकीकृत समाजवादीया अध्यक्ष माधवकुमार नेपालं मन्त्री हेरफेर जुइगु नियमित प्रक्रिया खः धका धाउगु दु।

समाजवादीं थ्व स्वयापि दक्को मन्त्रीपिन्त लितः सःता न्हुपिनिगु नां सिफारिस याउगु दु।

न्हुपि मन्त्रीपि जीवनराम श्रेष्ठ संस्कृति, पर्यटन तथा नागरिक उड्डयन, मेटमणि चौधरी शहरी विकास, भवानी खापुङ स्वास्थ्य तथा जनसंख्या, शेरबहादुर कुँवर श्रम, रोजगार तथा सामाजिक सुरक्षा मन्त्रीया लागि नां सिफारिस याउगु दु।

अथेहे हीरा केसी स्वास्थ्य तथा जनसंख्या राज्यमन्त्रीइ सिफारिस याउगु दु।

लुँया भाः तोलां थौं खुसः कुहावंगु दु।

थौं लुँ तोलाया ९७ हजार ९ सय रुपैयाँ कायम जुगु दु धका नेपाल सुनचाँदी व्यवसायी महासङ्घं धाउगु दु।

अथेहे वहः तोला न झीन्यातका कुहावंगु दु। वहः तोला झीन्यातका कुहावया १ हजार २ सय ७५ रुपैयाँ न कारोबार जुगु दु धका महासङ्घं धाउगु दु।

थौ सिथि नखः नेवाःतयसं तुं, ल्ह्वं हिति लिसें लःया स्रोत सफा यायेगु दिं कथा काइ। सिथि नखः कुन्हि माय्, मू, कःसूया वः, चतांमरि लिसें थीथी नसाज्वलं तयाः पूजा यायेगु याइ। 

त्रिमूर्ति निकेतनया नीछक्वःगु स्थापना दिवसया लसताय् थीथी सिरपा व न्याम्ह पत्रकार नाप ख्वीम्हेसित सत्यमोहन जोशी शताब्दि पदक लःल्हागु दु ।

थुगु पदकं  पत्रकारपि मीना बज्राचार्य, नृपेन्द्रलाल श्रेष्ठ, सुरेन्द्रभक्त श्रेष्ठ, सुनिल महर्जन व विराजकाजी राजोपाध्यायोपिन्त मूपाहाँ महासमालोचक प्रा.डा.वासुदेव त्रिपाठीजुं पदक लःल्हानादीगु खः। त्रिमुर्ति निकेतन परिसरय् संस्थाया अध्यक्ष ईन्दिरा प्रसाईया सभाध्यक्षताय् जुगु खः।

अथेहे छन्दकाव्यया प्रचार प्रसार अभियानय् समेत विशिष्ट योगदान बियादीम्ह गोविन्दराज विनोदीयात ‘लेखनाथ पौड्याल पुरस्कार’, नेपाली नाट्यकलाया श्रीवृद्धिया ज्याय् योगदानया निंतिं मिथिला शर्मायात ‘बालकृष्ण सम पुरस्कार’, काव्यसाधनाय् निरन्तर समर्पित जुया नेपाली कविताया संवर्द्धनय् विशिष्ट योगदान यानादीम्ह शैलेन्द्र साकार ‘देवकोटा काव्य पुरस्कार’ नाप ताम्रपत्र व म्हतिं छगू लखं नगद सिरपाः लःल्हागु खःसा त्रिमूर्ति निकेतनया दुजःपिन्त जक बिइगु नीन्याद्वः राशिया ‘भद्र घले पदक’  तारानाथ दाहाल व प्रा.डा.उषा ठाकुरयात बिउगु खः।