थौं मंगलबाः नेप्से ४५.५९ अंकं घटे जुगु दु। थौं हाकन बजाः २०२०.२३ बिन्दुइ वया रोके जुगु दु।

म्हिगः न सोमबाः न बजाः दोहोरो अंकं घटे जुगु खः। थौं मंगलबाः २३४ कम्पनीया जक २८ हजार ९५९ गु कारोबारपाखे ३८ लाख ८७ हजार ७४८ कित्ता सेयर किनबेच जुगु खः।

मंगलबाः कारोबार रकम धासा १ अर्ब ३१ करोड २८ लाख ६ हजार ५६३ रुपैयाँ बराबर जुगु खः। मंगलबाः उपकार लघुवित्त वित्तीय संस्थाया भाः धासा सकारात्मक सर्किट लगे जुगु खः। १० प्रतिशतं थहावना २१२६ रुपैयाँ थ्यःगु खः।

बलेफी हाइड्रोपावरया भाः ९.९८ प्रतिशतं थहावना २०३.९० रुपैयाँ थ्यःगु खः। अथेहे माउण्टेन इनर्जी ३.८२ प्रतिशतं घटे जुगु खःसा हिमालयन बैंकया भाः नेगेटिभ सर्किट लेवलं घटे जुगु खः।

९.९७ प्रतिशतं घटे जुगु थुगु कम्पनीया भाः ३२३.१० रुपैयाँय् क्वहावःगु खः। एनआइसी एसिया बैंक दकलय् अप्पो कारोबार जुगु खः।

नेपाली कांग्रेसया नेता रामचन्द्र पौडेलया म्ह्याय् संज्ञा पोखरेल प्यंगु तल्लां कुतु वया तसकं घाःपाः जुगु दु।

पोखरेल येँया बनस्थलीइ प्यंगु तल्लां कुतु वया सोमबाः सुथय् गम्भीर घाःपाः जुगु खः।

स्थानीय जनप्रतिनिधिनाप येँ जुगु सहमति कथं फोहोर वान्छ्वयेत बन्चरेडाँडापाखे वंगु सवारी साधन रोके यायेवं प्रहरी परिचालन याउगु खः।

म्हिगः सोमबाः बहनि फोहोर वांन्छ्वयेगु सहमति जुगु खः। प्रहरीं बल प्रयोग यासे लँ चायेकूगु खः। सरकार व फोहोर वांन्छवयेगु थासया प्रतिनिधिपि सहमति माने याये मखु धासे अन स्थानीयपिन्स बन्चरेडाँडाय् फोहोर वान्छ्वयेगु रोके याउगु खः।

शहरी विकास मन्त्रालय, येँ महानगरपालिका, नुवाकोटया ककनी गाउँपालिका व धादिङयो धुनिबेसी नगरपालिकाका प्रतिनिधिपि दथुइ मंगलबाः येँया फोहोर बिसर्जन यायेगु सहमति जुगु खः। वंगु १४ जेठनिसे फोहोर वांन्छ्वये फुगु मदुनि।

शहरी विकास मन्त्रालयया कुतलय् च्वंगु बैठकय् सहमति जुगु कथं शहरी विकास मन्त्रालयया आयोजना निर्देशक रवीन्द्र बोहरा, येँ महागरपालिकाया प्रमुख प्रशासकीय अधिकृत लोकनाथ पौड्याल, धुनिबेसी नगरपालिकाया प्रमुख प्रशासकीय अधिकृत हरिदत्त कँडेल व ककनी गाउँपालिकाया प्रमुख प्रशासकीय अधिकृत गीता कुमारी शर्मापिन्स ल्हाचिं तःगु खः।

अथेहे शहरी विकास मन्त्री रामकुमारी झाँक्री, येँ महानगरया मेयर बालेन्द्र साह, उपमेयर सुनिता डंगोल, शहरी विकास मन्त्रालयया सचिव रमेश प्रसाद सिंह, धुनिबेसी नगरपालिकाया मेयर बालकृष्ण आचार्य, यल महानगरपालिकाया उपमेयर मञ्जली शाक्य, ककनी गाउँपालिकाया अध्यक्ष सुमन तामाङ, उपाध्यक्ष मिठुमाया तामाङ, येँया प्रहरी बरिष्ठ उपरीक्षक सुदिप गिरी, ककनी गाउँपालिका वडा नं. ३ या अध्यक्ष घननाथ बजगाईंया रोहबरय् सहमति पत्रय् ल्हाचिं तःगु खः।

बैतडीइ केन्द्रबिन्दु जुया भुखाय् ब्बःगु दु।

थौं मंगलबाः न्हिनय् १२ बजे जुया ४९ मिनेटय् बैतडीया दोगडाकेदार गाउँपालिकाया देउलेक केन्द्रबिन्दु जुया ४ म्याग्नेच्युटया भुखाय् ब्बःगु धका भूकम्प मापन केन्द्र सुर्खेतं धाउगु दु।

बैतडी नाप बझाङ, दार्चुला व भारतया पिथौरागडय् तक भुखाय् ब्बःगु महसुस जुुगु खः। भुखाचं गुलि क्षति जुगु विवरण धाःसा वउगु मदुनि।

लोकतान्त्रिक समाजवादी पार्टी (लोसपा) न प्रधानमन्त्री शेरबहादुर देउवायात ११ बुँदे ज्ञापन पत्र लःल्हाउगु दु।

प्रधानमन्त्री देउवायात थौं सुथय् बालुवाटार निवासय् नापलाना लोसपा अध्यक्ष महन्थ ठाकुरं उगु ज्ञापन पत्र लःल्हाउगु खः।

नागरिकता विहीनपिनिगु समस्या समाधान यायेत, महँगी नियन्त्रण, किसानपिन्त सहजरुपं मले व्यवस्था, टिकापुर घटनाया दोषी द्धपः फयाच्वम्ह रेशम चौधरीयात मधेस आन्दोलनया झ्वलय् ज्वःगु नाप मेपि नेता–कार्यकर्तापिन्त रिहाइ यायेगु लगायतया माग तया प्रधानमन्त्रीयात ज्ञापनपत्र लःल्हाउगु खः।