भ्रमणया सिलसिलाय् भारतय् दुम्ह चिनियाँ विदेशमन्त्री वाङ येँ थ्यंगु दु।

सोमबाः पाकिस्तान थ्यम्ह वाङ अफगानिस्तान, भारत जुुया थौं शुक्रबाः न्हिनय् येँ थ्यकूगु खः।

२५ म्ह सदस्यीय भ्रमण टोली नाप येँ थ्यका वाङ विमानस्थलपाखे द्वारिका होटेल च्वंगु दु। वाङं औपचारिक भेटघाट धासा कन्ह्यः शनिबाः सुथय् निसे याइगु जुगु दु। शनिबाः सुथय् नेपालया समकक्षी डा.नारायण खड्कानाप न्हापां वयकलं भेटघाट याइगु जुगु दु।

व स्वया न्ह्यः वयकलं सुथय शिवपुरीमा हाइकिङ वनिइगु जुगु दु। शनिबाः न्हिनय् प्रधानमन्त्री शेरबहादुर देउवा व आइतबाः सुथय् राष्ट्रपति विद्यादेवी भण्डारीनाप छलफल याइगु जुगु दु। वाङं आइतबाः हे एमाले अध्यक्ष केपी शर्मा ओली व माओवादी केन्द्रया अध्यक्ष पुष्पकमल दाहाल प्रचण्डयात नापलाना बहनि चीन लिहावनिइगु ज्याझ्वः जुगु दु।

नेपालस्थित चिनियाँ दूतावास स्रोतया कथं विदेशमन्त्री वाङं थौं बहनि दूतावासया अधिकारीपि नाप नेपाःया लिपागु परिस्थितिबारे जानकारी कायेत्यःगु खः।

लुँया भाः थौं न थहावंगु दु। म्हिगः तोलां ११ सय वंगु खःसा थौं ६ सय रुपैयाँ थहावंगु खः।

थौं तोलां खुसः १ लाख ९ सय रुपैयाँ थ्यंगु दु धका नेपाल सुनचाँदी व्यवसायी महासङ्घं धाउगु दु। अथेहे, थौं वहः न थहावंगु दु।

वहः तोलां २५ रुपैयाँ थहावना १ हजार ४ सय रुपैयाँ थःगु दु धका महासङ्घ धाउगु दु।

येँ महानगरपालिका वडा १५ स्वयम्भू भुइख्यलय् धर्मचक्र पार्क व पुलेस्वाँ पूखु उलेज्या जुगु दु।

थौं छगु ज्याझ्वः दथुइ येँ महानगरया मेयर विद्यासुन्दर शाक्य न उलेज्या यानादीगु खः। करिब १ करोड ३६ रुपैयाँ केन्द्रीय बजेट व वडाया पूर्वाधार विकास कार्यक्रम अन्तर्गत २० लाख रुपैयाँ लागतय् पार्क व पूखु निर्माण जुगु खः।

थुकिया सौन्दर्य व हरियाली प्रवर्धन यायेत महानगरं थप १ करोड रुपैयाँ विनियोजन याउगु खः। उगु पार्कय् ३५ फिट च्वये लठाय् राष्ट्रिय ध्वाँय् तःगु खः। उगु पार्क उलेज्या लिपा न्ववानादीसे मेयर शाक्यं, येँ च्वनेत्यः योग्य सांस्कृतिक सहर दयकेगु नीति व ज्याझ्वः क्वचाना वंगु दु। ‘जिमिसं दयकगु दक्को नीति व कार्यक्रम दु, उकिया प्रमुख, उपप्रमुख, वडाध्यक्ष, कार्यपालिका सदस्य व वडा सदस्यपिनिगु सकसिगु हे सहभागिता दु।

उगु नीति व कार्यक्रमया कार्यान्वयन विभाग व वडापाखे जुयाच्वंगु दु।’ प्रमुख शाक्यं धयादीगु दु, ‘म्हगस मंकाः कथं खनागु खः। उगु पूरा यायेत सामुहिक प्रयत्न यानागगु खः।

विकासया उपलब्धी वयेगु सुरु जुगु दु। थुकिया जिपि सफल जुगु दु।’ उगु ज्याझ्वलय् संघीय संसद सदस्य जीवनराम श्रेष्ठ, उपप्रमुख हरिप्रभा खड्गी श्रेष्ठ, वडाध्यक्ष नाप महानगरया प्रवक्ता ईश्वरमान डंगोल वडा सदस्य आनन्द गौत्तमपिन्स थःथःगु बिचाः तयादीगु खः।

नेपाली कांग्रेस केन्द्रीय समितिया बैठक सुरु जुगु दु।

वइगु स्थानीय तहया निर्वाचन तयारीया विषय निर्णय कायेत बैठक च्वनेत्यःगु खः। उम्मेदवारयात टिकट वितरण यायेत संसदीय समिति गठन, निर्वाचन प्रचार प्रसारया समीक्षा, चुनावी तालमेललगायतया बैठकय छलफल यायेत्यःगु खः। उम्मेदवारया मनोनयन जुइत्यःगु लच्छि न्ह्यः हे उम्मेदवार ल्ययेगु विधानय् व्यवस्था दु।

प्यंगु तहया संसदीय समिति गठन यायेमाःगु विधानय् व्यवस्था दु। केन्द्रीय, प्रदेश, जिल्ला व प्रतिनिधि सभा क्षेत्रीय संसदीय समिति गठन यायेगु व्यवस्था दु। केन्द्रीय संसदीय समितिइ सभापति, महामन्त्री स्वतः सदस्य जुइसा पदाधिकारीपि पदेन सदस्य जुइ। सभापतिं समावेशिताया आधारय् केन्द्रीय सदस्यपाखे ११ म्ह संसदीय समितिइ मनोनीत याइगु व्यवस्था दु। महानगर प्रमुख व उपप्रमुखया उम्मेदवार याइगु अधिकार केन्द्रीय संसदीय समितियात दु।

उपमहानगरपालिका व नगरपालिकाया प्रमुख व उपप्रमुखया उम्मेदवार ल्ययेगु अधिकार प्रदेश संसदीय समितियात दु। गाउँपालिका अध्यक्ष व उपाध्यक्षया उम्मेदवार ल्ययेगु अधिकार जिल्ला संसदीय समितियात दु। प्रतिनिधि सभा क्षेत्र संसदीय समितिं देयन्यक ६ हजार ७४३ वडाया अध्यक्ष व सदस्यया उम्मेवारया निर्णय यायेगु अधिकार विधानं अधिकार बिउगु दु।चिल्लागा अष्टमी ११४२, ११ शुक्रवाः

वंगु २४ घण्टाया दुने थप ३५ म्हेसित कोरोना भाइरस संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं ३ हजार ८८१ म्हेसिगु पीसीआर परीक्षणय् ३२ म्ह व १ हजार ३८७ म्हेसित एन्टीजेन परीक्षणय् स्वम्ह याना ३५ म्हेसित संक्रमण पुष्टि जुगु दु। वंगु २४ घण्टाय् कोरोनां २६६ म्ह कोरोनामुक्त जुगु दु।