स्वास्थ्य तथा जनसंख्या मन्त्रालयया कथं थौं संक्रमित जूपि मध्ये ६ हजार ३४३ म्ह स्वनिगलय् जक जुगु दु।

थौं येँ जक ४ हजार ६६६ म्हेसित कोरोना सक्रमित पुष्टि जुगु दु। अथेहे यलय् १ हजार १९ म्ह व ख्वपय् ५७८ म्हेसित पुष्टि जुगु दु।

२४ घण्टाया दुने ६१३ म्ह कोरोना संक्रमणमुक्त जुगु दु सा प्यम्हेसिगु ज्यान वंगु दु।

वंगु २४ घण्टाया दुने देयन्यक थप ११ हजार ३५२ म्हेसित कोरोना भाइरस –कोभिड–१९) या संक्रमण पुष्टि जुगु दु।

थ्व छन्हु दुने पुष्टि जुगुलि आःतकया दकलय् अप्पो खः। स्वास्थ्य तथा जनसंख्या मन्त्रालयया कथं १८ हजार ७८ म्हेसिगु नमुना पीसीआर टेष्ट याउगुलि ९ हजार ५०२ म्ह व ५ हजार ३३१ म्हेसिगु नमुना एन्टीजेन टेष्ट याउगुलि १ हजार ८५० म्हेसित संक्रमण पुष्टि जुगु दु।

स्वनिगःलय् ‘स्मार्ट लकडाउन’ सम्बन्धी मेगु आदेश जारी जूगु दु ।

कोरोना संक्रमण अप्वयावनेधुंका स्वनिगःया ३गू हे जिल्ला प्रशासन ज्याकुथिं छगू हे कथंया आदेश जारी याःगु खः । म्हिगः बाचानिसें लागू जुइगु आदेशय् माघ मसान्त तक्क आमसभा, जुलुस, सभा, भेला लिसेंया ज्यापहः यायेगुलिइ रोक तःगु दु ।

अथेहे गोष्ठी, सेमिनार, समीक्षा, मुँज्या थेंज्यागु ज्यापहः सञ्चालन यायेबलय् भर्चुअल माध्यमं यायेत प्रशासनं धाःगु दु । भौतिक रुपय् उपस्थित जुया यायेमाःगु ज्याया नितिं २५म्ह तक्क जक दुथ्यायेत प्रशासनया सूचंनय् धयातःगु दु ।

सिनेमा हल, डान्सबार, दोहोरी, नाचघर, क्लब, हेल्थ क्लब, जिमखाना, स्विमिङ पुल लिसेंयात १५ गते तक्क बन्द यायेगु निर्णय नं प्रशासनं याःगु दु । धार्मिकस्थलमा जनस्वास्थ्यका मापदण्ड पालना याना माघ मसान्त तक्क नित्य पूजा, ध्यान व प्रार्थना जक यायेगु याकेगु नं प्रशासनया आदेशय् धयातःगु दु ।

सार्वजनिक थासय् माघ ७ निसें अनिवार्य खोप कार्ड क्यनेमाःगु सार्वजनिक यातायातय् सिट क्षमता सिवें अप्वः यात्रु तये मदइगु लिसेंया निर्णय नं प्रशासनं याःगु दु ।

नेवाः न्ह्यलुवा नाप भाषासेवी, उद्योगपति, समाजसेवी लिसें लक्ष्मीदास मानन्धर कोरोना संक्रमित जूगु दु।

समाजसेवी मानन्धरयात वंगु पुस २९ गते ज्वर व मुसु वयेवं पीसीआर परीक्षण याःगुलिं वय्कःयाके कोरोना पोजेटिभ क्यंगु खः।

समाजसेवी मानन्धरया छेँजःपिन्सं ब्यूगु जानकारी बिउगु कथं भच्चा ज्वर वःगु जूसां मुसु वयेगु धाःसा मदुगु धका धाउगु दु।

समाजसेवी मानन्धरं स्वास्थ्य सामान्य जूगु जानकारी नं छेँजःपिन्सं बिउगु दु।

श्रीघःबहाया नामं नांजागु श्रीशान्तिघट बज्रधातु चैत्य महाविहारय् च्वंगु हारती अजिमा द्यःया देगःया पुनर्निमाणया झ्वलय् जग स्वनेगुज्या जूगु दु।

येँ महानगरपालिका वडा नं २५ श्रीघःबहाया हारति अजिमा द्यःया देगःया येँ महानगरपालिकाया मेयर विद्यासुन्दर शाक्यं जग स्वनादीगु खः। देगः पुनर्निमाणया झ्वलय् जूगु सकतां पुजा विधिया ज्या गुरु यज्ञमानपति बज्राचार्यया नेतृत्वय् गुरुजु दिनेश बज्राचार्य लगायतं पुजा याना वया बिज्यागु खँ श्री शान्तिघट बज्रधातु चैत्य महाविहार संरक्षण समितिया नायः शुभकाजी शाक्यं जानकारी बियादिगु खः।

उगु जग स्वने ज्याय् श्रीशान्तिघट बज्रधातु चैत्य महाविहारया थायपा आजु सकारात्मक सोचया न्ह्यलुवा नांजाम्ह पर्यटन व्यवसायी कर्ण शाक्यया नं उपस्थिति दु उगु खः । देगः पुननिर्माणया निंतिं येँ महानगरपालिकापाखें आर्थिक खर्च याइगु खँ दुसाः थुके श्रीशान्तिघट बज्रधातु चैत्य महाविहार संरक्षण समितिया उपभोक्ताकापाखे ५ प्रतिशत दाँ खर्च भारया भाला क्वबिइगु खः।

जगस्वने ज्या यानादीम्ह मेयर शाक्यं इतिहासयात म्वाका तयेया निंतिं प्राचीन स्मारकया मर्मत, सम्भार, जीर्णोद्धार व पुननिर्माणया ज्या येँ महानगरपालिकाया नीतिगत प्रबन्ध, बजेट व कार्यक्रमपाखें जुयाच्वंगु खँ कनादिल । हारती अजिमाया देगः पुननिर्माणया खँय् मेयर शाक्यं थुगु देगःया सिं पुलाँ जुया दुनेदुनें ध्वगिना वये धुंकुगु व पःखाः नं छ्वासुयावःगुलिं परम्परागत निर्माण सामग्रीे छ्यला पूर्ववत स्वरुप व शैलीइ तयार जुइकथं उपभोक्ता समिती, गुठीयार व द्यःपाला शाक्यसंघलिसे सहलह याना पुननिर्माणया ज्याजूगु खँ कनादिगु खः।

उपभोक्ता समितीया पुरन शाक्यं श्रीघःया हारति अजिमाया देगः करीब स्वसःदँ पुलाँगु खःसा थ्व देगःया पुननिर्माण करीव १ सय ५६ दँ  न्ह्यः नं जुउगु खँ अभिलेखय् च्वयातःगु दु धका धयादीगु खः। वि सं १९९० सालया तःभूखाय्या धक्कां छुं मजुउगु देगः २०७२ बैशाख १२ या धक्कां धाःसा दुनेदुनें स्यनावना च्पंगु खँ नं पुरन शाक्यं कनादिगु खः।

जग स्वलने ज्याय् वडा २५ या अध्यक्ष नापं विपद व्यवस्थापन समितिया संयोजक नीलकाजी शाक्य, कार्यपालिका सदस्य रमिताकमल स्थापित नाप संरक्षण समितिया पदाधिकारीनिनिगु न सहभागी दूगु खः।