बुंगद्यःया रथ थौं जावलाख्यलय् सालिइगु जुगु दु। लगंख्यःया थतित्वालं रथ सालाः जावलाख्यलय् यंकेत्यंगु दु।

रथ साला यकां शनिबाः भोटोजात्रा याइगु जुगु दु। म्हिगः सनिलय् रथया च्वकां नैक्यालं लुयाः जा ब्हगु खः।

ज्योतिषपिन्स थौं द्यः सालेगु दिं कथं साइत पिकाःगु खः।

सर्वोच्चं २०५६ साल जेठ १८ गते येँ महानगरपालिका, धनुषा जिविस व राजविराज नगरपालिकाय् स्थानीय भाय् छ्यःगु विरोधय् तःगु मुद्दाया अन्तिम फैसला यासें स्थानीय भाय् छ्यले मदइगु आदेश जारी याःगु खः।

उगु दियात लुमकूसे नेवाःतय्सं हाकूगु न्हि कथं कयाच्वंगु दु। मां भासं ब्वनेगु सकस्यां अधिकार धइगु सः थ्वयेकाः आन्दोलित जुयाच्वंगु इलय् नीनिदँ न्ह्यः थौंया दिं सर्वोच्च अदालतं स्थानीय निकायलय् स्थानीय भासं ज्याखँ याये दइ मखु धकाः फैसला याउगु खः।

थौंया दिं हाकुगु दिंया कथं हनावयाच्वंगु खः।

येँ महानगरपालिकाया उपमेयर सुनिता डंगोलं हिंसा, अन्यायय् जूपि व पीडित मिसापिनिगु संरक्षण, माःगु कानुनी ग्वहालि व सहजीकरण नाप आत्मरक्षाया तालिम लगायतया व्यवस्थापनया लागि महानगरपालिकां दक्को वडाय् वुमन सेल ‘मिसा सेल’ गठन यायेगु प्रक्रिया न्ह्याकेगु निर्णयय् ल्हाःचिं तःगु दु।

पदभार ग्रहण यायेवं चुनावी प्रतिवद्धता दुगु उगु निर्णय याना ल्हाचिं तःगु खः।दक्को वडाय् गठन याना मिसा सेलं न्यायिक समितिनाप समन्वय याना अन्याय जूपिन्त व पीडित मिसापिन्त माःगु ज्या याइ। न्यायिक समितिया प्रमुख न उपमेयर डंगोल हे खः।\

वयकःया चुनावी प्रतिबद्धतापत्रय् २२ नम्बर बुँदाय् महिला सेल गठन यायेगु उल्लेख दु।

येँ महानगरपालिकाया नवनिर्वाचित मेयर बालेन्द्र साह व उपमेयर सुनिता डंगोलं नेपालभासं शपथ ग्रहण याःगु दु।

मधेसी मूलया साह येँ महानगरपालिकाया मेयर पदय् स्वतन्त्रं उम्मेदवार जुयाः त्यायेधुंकाः सामाजिक सञ्जालय् नेपालभासं नं सपथ कायेमाःगु माग जुया वयाच्वंगु खः।

मेयर साहं प्रमुख निर्वाचन अधिकृत पाखें सपथ कायेधुंकाः उपमेयर डंगोल लिसें येँ महानगरपालिकाया ३२ गुलिं वडाया वडाध्यक्षपिंत सपथ ग्रहण याकूगु खः।

सपथ ग्रहण यायेधुंकाः मेयर साह व उपमेयर डंगोल येँ महानगरपालिकाया ज्याकुथिइ वनाः पदभार ग्रहण याःगु खः।

पदभार ग्रहण लिपा पत्रकारत लिसे खँ ल्हासें साहं येँ महानगरया फोहर व्यवस्थापन मजुइकं थःम्हं मेगु ज्यायात प्राथमिकता मबीगु खँ धाःगु खः। 

नेवाः पत्रकार राष्ट्रिय दबू येँ जिल्लाया ग्वसालय् १५ न्हुया आधारभूत पत्रकारिता क्षमता अभिवृद्धि तालिम न्ह्याःगु दु ।

तालिम वंगु आइतवाः येँमपा १५ वडाया नवनिर्वाचित वडाध्यक्ष ईश्वरमान डंगोलं उलेज्या यानादीगु खः। उलेज्या ज्याझ्वलय् न्ववासें डंगोलं पत्रकारिता समाजया न्हाय्कं जूगुलिं सत्यतथ्य पित हयेत पत्रकारतय्सं ध्यान बीमाः धयादिल।

तःतःधंगु पूर्वाधार, तबालागु सतक जक दयां समाजया विकास जुइमखु, समाजया विकासया निंतिं वृत्तिविकासया नं उलि हे आवश्यकता दुगु खँ डंगोलं धयादिल। समाजय् जनचेतना बीगु थीथी वृत्तिविकासया तालिम मध्ये अझ पत्रकार तालिमपाखें प्राप्त जूगु ज्ञानं खःगु सुचं खःगु इलय् व खःगु थासय् तक थ्यंकेत तःधंगु ग्वाहालि दइगु नं वय्कलं धयादिल।

येँ महानगरपालिका सामाजिक विभागया प्रमुख दीपक अधिकारीं जनस्तरलिसे सामाजिक कार्यय् ज्याय् याये खंगुलिं जिमित तसकं खुसि लगे जूगु दु धासें वंगु दँय् बजेटपाखें क्वचायेमाःगु थुगु तालिम कोभिडया हुनिं थुगु दँय् जूवनाच्वंगु खँ धयादिल।

पत्रकार दबूया केन्द्रीय नायः सुरजवीर वज्राचार्यं येँ महानगरपालिकानापया सहकार्यं दबूपाखें आपालं समाजिक ज्या याये खंगुलिं महानगरपालिकाया निवर्तमान मेयर विद्यासुन्दर शाक्य, उपमेयर हरिप्रभा खड्गी  श्रेष्ठ नापं सकल महानगर परिवारयात सुभाय् बियादिल । कोभिडया हे झ्वलय् महानगरपाखें उपलब्ध जूगु ग्वाहालिया कारणं यक्व हे पत्रकार सहकर्मिपिंत तःधंगु ग्वाहालि जूवंगु खँ वज्राचार्यं न्ह्यथनादिल। नापं नेवाः पत्रकार कल्याणकारी कोषया निंतिं महानगरं बिया वयाच्वंगु ग्वाहालि निरन्तरता जुइमा धकाः नं वय्कलं बः बियादिल।

ज्याझ्वलय् मुख्य प्रशिक्षक नेपालभाषा टाइम्स न्हिपौया सम्पादक सुरेशकिरण मानन्धरं सूचना तथा सञ्चारया महत्वया बारे जानकारी बियादिल। वय्कलं थौंया युगय् सूचना तथा सञ्चारया गुलितक महत्व दु धकाः वंगु वैशाख ३० गते जूगु चुनावपाखें सकसितं जानकारी दये धुंकल जुइ । छुं नं कथंया राजनीतिक पार्टीया उम्मेदवारया पम्प्लेट, पर्चा, पोस्टर विना छुं नं पार्टीपाखें छु पदय् सु उम्मेदवार चुनावी मैदानय् दु धयागु आम जनतायात थ्व हे सूचना तथा सञ्चारया माध्यमपाखें जानकारी दुगु प्रमुख प्रशिक्षक सुरेश किरणं धयादिल।

ज्याझ्वःया सभापति पत्रकार दबू येँं जिल्लाया नायः अर्विन्द्रमान सिंहं भाषा, कला, साहित्य, संस्कृतिया उत्थान धइगु हे समग्र जातीया उत्थान खः, व जातीया उत्थान धइगु हे देश विकासया लँपु जूगु धयादिल । वहे मान्यता कथं नेवाः पत्रकार राष्ट्रिय दबू, येँ जिल्लां समग्र नेवाःलगायत आम नेपालीतय्त सचेतनाया विकास यायेगु उद्देश्यसहित थीथी ज्याझ्वःया ग्वसाः ग्वया वयाच्वनागु धयादिल।