वंगु २४ घण्टाया दुने देयन्यक थप ९४४ म्हेसित कोरोना भाइरस संक्रमण पुष्टि जूगु दु।

स्वास्थ्य तथा जनसंख्या मन्त्रालयया कथं ९७६२ पीसीअर परीक्षणय् ६९६ म्ह व ३५०२ एन्टिजेन परीक्षणय् २४८ म्ह याना ९४४ म्हेसित संक्रमण पुष्टि जूगु दु। थ्व नाप आःतक नेपालय् कोरोना भाइरसया सक्रिय संक्रमितपि ६,१४० म्ह थ्यंगु दु। अथेहे २९७ म्ह संक्रमणमुक्त जुगु दु।

लिपागु २४ घण्टाय् दकलय् अप्वो येँ ३६२ म्हेसित कोरोना भाइरस संक्रमण पुष्टि जूगु दु।

अथेहे मन्त्रालयया कथं यलय् ९४म्ह, ख्वपय् २५म्ह, कञ्चजनपुरय् ५१म्ह, कास्कीइ २०म्ह, मकवानपुरय् १३म्ह, कैलाली व पर्सामा १०÷१० म्ह, दाङय् गुम्ह, बाँकेय् च्याम्ह, रुपन्देही, चितवन व सुनसरीइ न्ह्यम्ह, न्ह्यम्हेसित संक्रमण पुष्टि जूगु दु।

नेकपा (माओवादी केन्द्र)या अध्यक्ष पुष्पकमल दाहाल प्रचण्डयात न कोरोना सङ्क्रमण जूगु दु।

प्रचण्डया निजी सचिवालयया कथं म्हिगः बहनि पीसीआर परीक्षणय् सङ्क्रमण पुष्टि जूगु दु। प्रचण्ड थःगु हे निवासय् आराम यानाच्वंगु दु ।

वयकःया स्वास्थ्य अवस्था सामान्य दु धका स्वकीय सचिव गङ्गा दाहालं जानकारी बिउगु दु। नाप प्रचण्डया सचिवालयं प्रचण्डया सम्पर्कय् दुपि सकसित सतर्कता अपने यायेत इनाप याउगु दु।

अथेहे माओवादी केन्द्रया नेता नारायणकाजी श्रेष्ठयात न कोरोना सङ्क्रमण जूगु दु। माओवादी केन्द्रं पूर्वनिर्धारित दक्को ज्याझ्वः स्थगित याउगु दु।

प्रधानमन्त्री शेरबहादुर देउवा एमाले अध्यक्ष केपी शर्मा ओलीयात नाप लायेगु निति बालकोट वंगु दु।

एमालें प्रतिनिधि सभा बैठकय् निरन्तर अवरोध याना वयाच्वंगु विषय सर्वदलीय बैठकय् तक ब्बति मकाउगुलि प्रधानमन्त्री देउवा छलफलया लागि ओली निवास बालकोट वंगु धका स्रोतं धाउगु दु।

थ्व स्वया न्ह्य सरकार सञ्चालनय् सहयोग यायेत गठन याउगु उच्चस्तरीय संयन्त्रया संयोजक रामचन्द्र पौडेल बालकोट वना एमाले अध्यक्ष ओलीनाप छलफल याउगु खः।

एमालें माधव नेपाल नेतृत्वया (एकीकृत समाजवादी) पार्टीया सांसद उपस्थित जुगु संसद व बैठकय् उपस्थित मजुइगु अडान कयावया च्वंगु खः। अध्यक्ष ओलीं एकीकृत समाजवादी पार्टी अवैध जुगु दाबी यानाच्वंगु खः।

वंगु २४ घण्टाय् वीरगञ्जय् ७ कोरोना संक्रमण पुष्टि जूगु दु।

२४ गु स्वाब नमुना परीक्षण याउगुलि ७ गु पोजेटिभ खनेदुगु दु धका प्रयोगशाला प्रमुख शुक्ष्म जीव विज्ञ प्रभाकर पाण्डे  न जानकारी बिउगु दु।

संक्रमित शून्य अवस्थाय् खने दये धुकुगु दु वीरगञ्जय् आः संक्रमितपि अप्पो खनेदया वंगु दु। पुस १६ गते २२ गु स्वाब नमुना परीक्षण याउगुलि स्वम्ह, १९ गते २४ गु याउगुलि स्वम्ह व २१ गते ३३ गु परिक्षणय् प्यम्हेसित पोजेटिभ खनेदुगु खः।

वीरगञ्ज इनर्वास्थित हेल्थ डेस्कय् छन्हु हे झीम्हेसित कोरोना संक्रमण पुष्टि जूगु दु।

प्रधानमन्त्री शेरबहादुर देउवां कोरोना संक्रमण अप्पोया वंगुलि तधःगु सतर्कता अपने यायेगु निति सम्बन्धित निकायपिन्त निर्देशन बिउगु दु

थौं शुक्रबाः कोभिड–१९ संकट व्यवस्थापन केन्द्र (सीसीएमसी) निर्देशक समितिया बैठकय् प्रधानमन्त्री देउवां ओमिक्रोन भेरियन्टया संक्रमणपिन्त परीक्षण व उपचारय् विशेष ध्यान बिइत निर्देशन बिउगु दु।

सीमा नाकाय् सतर्कता अपने यायेगु व कोभिड–१९ विरुद्ध खोप बिइगु ज्या न्ह्याकेत प्रधानमन्त्रीं निर्देशन बिउगु दु। बैठकय् ओमिक्रोन भेरियन्टया संक्रमणदर अप्पोया वनकि स्मार्ट लकडाउन यायेगु विषय न छलफल जूगु दु।

सीसीएमसी बैठकं स्वगूगु चरणया बुस्टर डोज खोप बिइगु ज्या न्ह्याकेत न अनुमति बिउगु दु।