स्वास्थ्य तथा जनसंख्या मन्त्रालयं अग्रपंक्तिइ ज्या याइपिं व  ६०दँ च्वयेय् वैंशयापिं ज्येष्ठ नागरिकयात कोभिड १९ विरुद्धया  ३गूगु डोज खोप माघया न्हापांगु वालंनिसें बिइत्यंगु दु ।

मन्त्रालयया कथं माघया न्हापांगु वालंनिसें अग्रपंक्तीइ ज्या याइपिं  चिकित्सक, स्वास्थ्यकर्मी, सुरक्षाकर्मी व माघया निगूगु वालंनिसें ल्वयेय् प्रतिरोधात्मक क्षमता म्हो दूपिं व ६० दँ च्वयेय्या सकसित थप छगू डोज खोप बिइत्यंगु दु ।

कोभिड–१९ खोप सल्लाहकार समितिया सिफारिसय् मन्त्रालयं थप छगू मात्रा खोप बिइत्यंगु खः । थ्वयान्ह्यः गम्भीर प्रकृतिया ल्वयेय् दूपिं बिरामी व रोग प्रतिरोधात्मक क्षमता म्हो दूपिन्त जक अतिरिक्त मात्रा खोप छन्हू बिइगुलिइ छन्हू लिपा लिछ्यागु खः ।

१२ दँ निसें १७ दँ वैंश पुचःलय् खोप बिइगु अभियान धाःसा अझं न्ह्याये फूगु मदुनि ।

सत्ता गठबन्धनया नेतापिन्त कोरोना भाइरस संक्रमण पुष्टि जुइवं सञ्चार तथा सूचना प्रविधिमन्त्री ज्ञानेन्द्रबहादुर कार्की आइसोलेसनय् च्वंगु दु।

शनिबाः जक नेकपा (माओवादी केन्द्र)या अध्यक्ष पुष्पकमल दाहाल प्रचण्ड व नेता नारायणकाजी श्रेष्ठयात न कोरोना संक्रमण पुष्टि जुइ धुकुगु दु।

सरकारया प्रवक्ता तक जुयादीम्ह मन्त्री कार्की सत्तारुढ दलया शीर्ष नेतापि बैठकय् सहभागी जुया वयाच्वंगु खः। मन्त्री कार्की न शनिबाःनिसे हे भेटघाट बन्द याउगु दु।

आइतबाः कोरोना परीक्षण याइ धका मन्त्री कार्कीया सचिवालयं धाउगु दु।

नेपाल आयल निगमं कार्यकारी निर्देशक पदया लागि विज्ञापन खुल्ला याउगु दु।

कार्यकारी निर्देशक छनोट व सिफारिस समितिं थौं छगु सार्वजनिक सूचं जारीयासे इच्छुक व्यक्तिपिन्स २१ दिं दुने दरखास्त बिइत आह्वान याउगु दु।

२०७५ साल पुसय् नेपाल आयल निगमया कार्यकारी निर्देशक नियुक्त जूम्ह सुरेन्द्र पौडेल स्वदँया दुने सेवा अवधि पूरा याना लिहावने त्यंगुलि पद खाली जूगु खः। न्हापागु पटक खुला प्रतिस्पर्धापाखे निगमया कार्यकारी निर्देशक जूम्ह पौडेल पुस २२ गते निगमनिसे बिदा जुगु खः।

निगमया कार्यकारी निर्देशक जुइत निगमया कार्यप्रकृतिनाप सम्बन्धित विषय वा प्रशासन, व्यवस्थापन, अर्थशास्त्र, इन्जिनियरिङ वा कानुन विषय म्हति न स्नातकोत्तर तह उत्तीर्ण जूम्ह व व्यवस्थापकीय जिम्मेवारीइ पदय् म्हति न न्यादँया अनुभव दयेमाःगु योग्यता तोके यानातःगु दु।

उम्मेदवारं शैक्षिक योग्यता, अनुभव, नेपाली नागरिकताया प्रतिलिपी, बायोडाटा, पासपोर्ट साइजया निपाः फोटो व न्याद्धः शब्द बढे मयासे व्यवसायिक कार्ययोजना पेश गयायेमाः।

प्रधानमन्त्री शेरबहादुर देउवा ’आइसोलेसन’य् च्वंगु दु । देउवां कन्ह्य पीसीआर परीक्षण याइगु जुगु दु।

वंगु बिहीबाः व शुक्रवाः प्रधानमन्त्रीया सरकारी निवास बालुवाटारय् सत्तारूढ गठबन्धनय् आबद्ध दलया नेतापि दुथ्याउगु उच्चस्तरीय राजनीतिक संयन्त्रया बैठक च्वंगु खः।

उगु बैठकय् सहभागी जूपि नेतापिके कोरोना संक्रमित जुगुलि प्रधानमन्त्री देउवा आइसोलेसनय् च्वंगु दु धका वयकःया स्वकीय सचिव भानु देउवां जानकारी बिउगु दु।

देउवा सरकारी निवासय् हे एकान्तवास च्वंगु दु। कन्ह्यः पीसीआर परीक्षण याइगु व धुका थप निर्णय याइ धका भानु देउवां धाउगु दु।

सर्वदलीय बैठकय् सहभागी नेकपा (माओवादी केन्द्र)या अध्यक्ष पुष्पकमल दाहाल ’प्रचण्ड’ संक्रमण जुया एकान्तवास च्वंगु दु।

स्वास्थ्य तथा जनसङ्ख्या मन्त्रालयं अग्रपङ्क्तिइ च्वना ज्यायाइपि (फ्रन्टलाइनर) व ६० दँ स्वया अप्पोपि ज्येष्ठ नागरिकपिन्त कोभिड–१९ विरुद्धया थप छगु अतिरिक्त (तेस्रो) मात्रा खोप बिइगु जुगु दु।

मन्त्रालयया सचिव डा. रोशन पोखरेलं माघया न्हापागु वाःनिसे अग्रपङ्क्तिइ च्वना ज्यायाइपि चिकित्सक, स्वास्थ्यकःमि, सुरक्षाकःमिपिन्त माघया निगुगु वाःनिसे रोग प्रतिरोधात्मक क्षमताया कम जूपिन्त व ६० दँ दुपि सकसित अतिरिक्त थप छगु मात्राया खोप बिइ धका जानकारी बिउगु दु।

अथेहे, मन्त्रालयं कोभिड–१९ विरुद्धया पूर्ण खोप काःपि स्वला थ्यपि चिकित्सक, स्वास्थ्यकःमि, सुरक्षाकःमि, स्वास्थ्य संस्था ज्या याइपि कर्मचारी, सरकारी निकाय ज्यायाइपि कर्मचारीपिन्त खोपया अतिरिक्त छगु मात्रा बिइगु जुगु दु।

कोभिड–१९ विरुद्धया पूर्ण मात्रा खोप काःपि स्वला थ्यपि ६० दँ दुपि ज्येष्ठ नागरिकपि नाप मध्यम व गम्भीर रुपं रोग प्रतिरोधात्मक क्षमता कम जूपि मनू सक्रिय क्यान्सरया रोगी, अङ्ग प्रत्यारोपण यानातःपि बिरामी, एचआईभी जुपि बिरामी, उपचारया झ्वलय् रोग प्रतिरोधात्मक क्षमता कम जुया वासः नयाच्वपि बिरामीपिन्त अतिरिक्त मात्रा खोप बिइगु धका धाउगु दु।

आः सरकारनाप छगु करोड निगु लाख मात्रा खोप दु धका धाउगु दु।