ज्यान्सेन (जे एण्ड जे) खोप कापिन्स न बुस्टर डोज कायेफइ धका स्वास्थ्य तथा जनसंख्या मन्त्रालयं धाउगु दु।

जिल्ला–जिल्लापाखे न्हापागु मात्रा कापिन्सं न जे एण्ड जे खोप काये ज्यू कि मज्यु धइगु न्ह्यसः वःगुलि मन्त्रालयं छगु सूचं जारी यासे बुस्टर डोज कायेज्यू धका धाउगु खः।

मन्त्रालयया कथं मेमेथु खोप कायेधुकपि थे १८ दँ दये धुकुपिन्स जे एण्ड जे खोप काउगु खुला दयेधुका बुस्टर डोज कायेज्यू धका धाउगु दु। जे एण्ड जे न्हापा कापिन्सं आः न वहे बुस्टर डोज कायेत मन्त्रालयं सुझाव बिउगु दु।

यदि उगु खोप जे एण्ड जे कायेधुकूपिन्स बुस्टर मात्राया रुपय् कोभिशिल्ड, अस्ट्राजेनिका, मोडर्ना वा फाइजर खोप कायेज्यू धका मन्त्रालयं धाउगु दु।

अमेरिकी सहयोग परियोजना एमसीसीया विषय छलफल यायेत सत्ता गठबन्धनया बैठक थौं च्वनिइगु जुगु दु।

थौं न्हिनसिया ३ बजे च्वनेत्यंगु दु। शुक्रबाः प्रतिनिधि सभाय् एमसीसी पेश यायेगु तयारी जुगु मंकाः धारणा दयकेगु कुतः यायेत गठबन्धनया बैठक च्वनेत्यंगु खः।

बुधबाः संसद बैठकय् एमसीसी पेश यायेगु सरकारया तयारी दु। तर दलपि दथुइ सहमति कायम मजुलि म्हिगः स्थगित याउगु खः। प्रधानमन्त्री शेरबहादुर देउवा व माओवादी केन्द्रया अध्यक्ष प्रचण्ड दथुइ जुगु उगु भेटवार्ताय् एमसीसी संसदय् पेश याये न्ह्यः गठबन्धनया बैठक सत्येगु सहमति जुगु खः।

उकिया लागि थौं गठबन्धनया बैठक एमसीसीया सम्बन्धय् निर्णायक जुइगु अनुमान याउगु दु।

स्थानीय तहया जनप्रतिनिधिपिन्स पदय् बहाल जुगु अवस्थाय् उम्मेदवार बिइ मदइगु जुगु दु।

पदपाखे राजीनामा बिया जक उम्मेदवार जुइ दइगु जुगु दु। स्थानीय तह निर्वाचन ऐनय् दुगु व्यवस्थाय् आयोगं निर्वाचन आचार संहिताय् न समावेश याउगु दु।

आचारसंहिताया मस्यौदाय् बहालवाला जनप्रतिनिधिपिन्स स्थानीय तहया निर्वाचनय् उम्मेदवार जुइ मदइगु व्यवस्था दु। स्थानीय तह निर्वाचन ऐन, २०७३ या दफा १३ या स्वगु तहमध्ये छु न स्वामित्व, नियन्त्रण वा अनुदान काये दइगु कथं पदय् बहाल दुम्ह वा संस्थापाखे पारिश्रमिक काइम्ह मनूखं उम्मेदवार जुइ मदुइगु व्यवस्था दु।

उगु व्यवस्था कथं आचारसंहिताय् राजीनामाया व्यवस्था याउगु दु। 

वंगु २४ घण्टाया दुने देयन्यक थप ६३९ म्हेसित कोरोना संक्रमण पुष्टि जुगु दु।

अथेहे कोरोना सक्रमणं स्वम्हेसिगु ज्यान वंगु दु। स्वास्थ्य तथा जनसंख्या मन्त्रालयया कथं देयन्यक ९ हजार ७५६ म्हेसिगु नमुना परीक्षण याउगु खः।

६ हजार ७८२ म्हेसिगु पीसीआर परीक्षण यासे ५४८ म्ह व २ हजार ९७४ म्हेसिगु एन्टीजेन परीक्षण याउगुलि १८५म्ह याना ६३९ म्हेसित कोरोना संक्रमण पुष्टि जुगु दु।

अथेहे वंगु २४ घण्टाय् १ हजार ६०० म्ह संक्रमणमुक्त जुगु दु। स्वनिगलय् थप २२६ म्ह कोरोना संक्रमितपि थपे जुगु दु। उकि मध्ये येँ १६२ म्ह, यलय् २५ म्ह व ख्वपय् १२ म्ह संक्रमित जुगु दु धका मन्त्रालयं धाउगु दु।

ईमर्जिङ नेपाल लिमिटेडया साधारण सेयर (आईपीओ) ५१ हजार ६७० म्हेसित १० कित्ताया दरं लाउगु दु।

आवेदकपि मध्ये बुधबाः याउगु गोला प्रथां ५१ हजार ६७० म्हेसित १० कित्ताया दरं व थुकि मध्ये च्याम्हेसित ११ कित्ताया दरं आईपीओ ल्हातय् लाउगु खः।

कम्पनीया आईपीओय् २३ लाख ३१ हजार २५८ म्हेसिगु आवेदकपाखे २ अर्ब ६४ करोड ३० लाख ३३ हजार रुपैयाँ बराबरया २ करोड ६४ लाख ३० हजार ३३० कित्ता सेयरया लागि आवेदन लाउगु खः।

कुल आवेदक मध्ये २ हजार ५५२ म्हेसिगु आवेदन रद्द जुगु बिक्री प्रबन्धक एनआईसी एशिया क्यापिटलं जानकारी बिउगु खः। क्यापिटलया कथं २३ लाख २८ हजार २०६ म्ह योग्य आवेदकपाखे २ करोड ६४ लाख १ हजार ९७० कित्ता आईपीओ माग जुगु खः।

५१ हजार ६७० म्हेसिया १० कित्ताया दरं ५ लाख १६ हजार ७०० कित्ता सेयर लाउगु खःसा बाँकी दुगु ८ कित्ता थुपि मध्ये च्याम्हेसिया थप १÷१ कित्ताया दरं सेयर ल्हातय् लाउगु खः।