नेपालय् नं थौंनिसें कोरोना खोपया बुस्टर डोज बिइगु जूगु दु ।

कोरोना खोपया निगुलिं डोज काःगु ३ला पूवंपिन्त  प्राथमिकताया लिधंसाय् ३गूगु डोज खोप बिइगु न्ह्याकेत्यंगु खः । राष्ट्रिय खोप सल्लाहकार समितिं क्वजिउगु सिफारिसय् लाःगु पुचःया न्हापांगु चरणय् बुस्टर डोज बिइत्यंगु दु ।

मध्यम व गम्भीर रूपय् ल्वयेय् प्रतिरोध क्षमता म्हो जूपिं , क्यान्सर पीडित, अङ्ग प्रत्यारोपण याःपिं , एचआइभी पीडित लिसेंयापिन्त बुस्टर खोप बिइत्यंगु दु  ।

अथेहे चिनियाँ खोप भेरोसेल वा सिनोफार्म खोप काःपिं ६०दँ वैंश वा उगु सिवें च्वयेय् वैंश पुचःया मनूतयेत नं बुस्टर खोप बिइत्यंगु दु । लक्षित मनूतयेसं न्हापांगु खोप काःगुृ कार्डलिसे लिक्कसंया स्वास्थ्य संस्थाय् वना बुस्टर डोज कायेफइगु नं मन्त्रालयं न्ह्यथंगु दु  ।

येँय् धाःसा त्रिवि शिक्षण अस्पताल, सिभिल अस्पताल व सरुवा रोग केन्द्र टेकुइ बुस्टर डोज बिइत्यंगु दु । मेथासय् नं खोप केन्द्र क्वजिइगु तयारी जुयाच्वंगु नं स्वास्थ्य मन्त्रालयया अधिकारीतयेसं धाःगु दु  ।

गुणस्तरहीन रासायनिक सा आयातय् १ अर्बया भ्रष्टाचार खनेदुगु दु । अख्तियार दुरूपयोग अनुसन्धान आयोगं कृषि सामाग्री कम्पनीया प्रबन्ध सञ्चालक नेत्रबहादुर भण्डारीलिसें  १२म्हेसित १ अर्बया मुद्दा तःगु खः ।

कृषि तथा पशुपंछी विकास मन्त्रालय अन्तर्गतया कृषि सामाग्री कम्पनीं न्याःगु डीएपी सा नेपाल सरकारं क्वःछिनातःगु गुणस्तरय् मदुगु, म्ह्वः गुणस्तरया मल न्यानाः आर्थिक अनियमितता याःगु धइगु उजुरी लायेधुंकाः अख्तियारं याःगु अनुसन्धानय् नेपाल सरकारयात १ अर्ब नोक्सानी याःगु दावीलिसें अख्तियारं विशेष अदालतय् भ्रष्टाचार मुद्दा दायर याःगु विशेष अदालतया प्रवक्ता दिपेन्द्रनाथ योगीं जानकारी बियादिल ।

सा खरिद प्रकरणय् १ अर्ब ५३ लख ज्वलिंज्वःया विगोलिसें भ्रष्टाचार ऐन २०५९ या उपदफा १७ कथं सजायया माग याःगु वय्कलं धयादिल । १ अर्ब स्वयां अप्वःया भ्रष्टाचार जूगु व सरकारी सेवाय् ज्या यानाच्वंपिं कर्मचारी जूगुलिं ऐनया दफा २४ कथं ३दँ सजाय तनाः ८दँनिसें १३दँ कैद जुइफुगु खनेदु ।

गुणस्तर तथा नापतौल विभागं ब्यूगु परीक्षण प्रतिवेदनय् आयातित सा क्वःछिनातःगु स्पेसिफिकेशन स्वयां म्ह्वः गुणस्तरया खनेदुगुलिइ कृषि सामाग्री कम्पनीं स्पेशिफिकेशन कथं हे गुणस्तर दुगु धकाः गलत परीक्षण प्रतिवेदन तकं दयेकूगु अख्तियारया ठहर दु ।

अख्तियारय् २०७८ जेठ १८ गते उजुरी लाःगु खः । व हे कथं अख्तियारं अनुसन्धान याःबलय् कम्पनीं आपूर्तिकर्तायात मुक्कं धेबाया ९० प्रतिशतं जूवइगु रकम १ अर्ब ५३ लख तका भुक्तानी नं ब्यूगु खनेदुगु धाःगु दु ।

नेकपा माओवादी केन्द्रया च्याक्वःगु महाधिवेशनया बन्द सत्रय् अध्यक्ष पुष्पकमल दाहाल प्रचण्डं पार्टीया केन्द्रीय समिति सदस्यपिनिगु नां प्रस्ताव याउगु दु।

प्रज्ञा भवनय् न्ह्यानाच्वंगु बन्द सत्रय् थौं आइतवाः सम्बोधन यासे अध्यक्ष प्रचण्डं केन्द्रीय सदस्यपिनिगु प्रस्तावित नां न्ह्यब्वइ धका माओवादी केन्द्रं धाउगु दु।

उगु नामय् सहमति मजूसा चुनावी प्रक्रियाय् वनेगु धका माओवादी केन्द्रं धाउगु दु। बन्द सत्रय् सम्बोधन यासे अध्यक्ष प्रचण्डं पार्टीयात समानुपातिक, समावेशी दयकेगु चुनौती दु धका धाउगु दु।

थौं शेयर बजाःया परिसूचक नेप्से ६० अङ्क स्वया अप्वो थहावंगु दु। नेप्से थौं आइतवाः ६० दशमलव ४१ अङ्क थहावना २ हजार ५ सय ८४ विन्दुइ थ्यःगु दु।

थौं कारोबार जूगु समूहमध्ये छगु समूहया जक शेयर घटे जुगु दु। म्युचल फन्डया शेयर शून्य दशमलव शून्य ६ अङ्कं घटे जुगु दु सा निर्जीवन बीमा समूहया शेयर दकलय् अप्वो ४ सय ११ अङ्कं थहावंगु दु।

अथेहे उत्पादन समूहया शेयर ३ सय ४८ अङ्क, जीवन बीमा समूहया शेयर ३ सय ४४, विकास बैंक समूहया शेयर १ सय ४४ अङ्क व माइक्रोफाइनान्स समूहया शेयर १ सय ४० अङ्कं थहावंगु दु।

२४० कम्पनीया ७१ लाख ६० हजार कित्ता शेयर ४ अर्ब १२ करोड रुपैयाँ न कारोबार जूगु दु। दकलय् अप्वो हिमालयन डिस्टिलरीया ४४ करोड रुपैयाँ बराबरया शेयर कारोबार जुगु दु।

वंगु २४ घण्टाया दुने देयन्यक थप २१६ म्हेसित कोरोना संक्रमण पुष्टि जूगु दु।

५ हजार ९६२ म्हेसिगु पीसीआर परीक्षण याउगुलि २१३ म्ह व १ हजार ६६९ म्हेसिगु एन्टीजेन परीक्षण याउगुलि स्वम्ह याना २१६ म्हेसित कोरोना संक्रमण पुष्टि जूगु दु धका स्वास्थ्य तथा जनसंख्या मन्त्रालयं धाउगु दु।

अथेहे २४ घण्टाय् निम्ह सीउगु दु सा २०९ म्ह संक्रमणमुक्त जूगु दु।