बेलायतया लागि नेपाली राजदूत ज्ञानचन्द्र आचार्य न पद व गोपनीयताया शपथ काउगु दु।

बुधबाः राष्ट्रपति भवन शीतल निवासय् छगु समारोहय् आचार्ययात राष्ट्रपति विद्यादेवी भण्डारीं पद व गोपनीयताया शपथ बिउगु खः।

उगु समारोहय् परराष्ट्रमन्त्री डा.नारायण खड्का लगायत सरकारया उच्च पदाधिकारीपिनिगु उपस्थिति दुगु खः थ्व स्वया न्ह्यः मन्त्रिपरिषदया सिफारिसय् राष्ट्रपति भण्डारीं वंगु माघ १४ गते आचार्ययात बेलायतया राजदूतय् नियुक्त याउगु खः।

नेकपा माओवादी केन्द्रया नेता नारायणकाजी श्रेष्ठ न एमसीसीविरुद्ध प्रदर्शनय् सहभागी जुगु दु।

न्हुगु बानेश्वरय् भेला जुया प्रदर्शन यायेगु झ्वलय् पार्टी कार्यकर्तापि दथुइ श्रेष्ठ थ्यःगु खः। माओवादी केन्द्रया संसदीय दलया बैठकं एमसीसीया विपक्षय् निर्णय यायेवं श्रेष्ठ न प्रदर्शनय् सहभागी जुगु खः।

माओवादी केन्द्रया वाईसीएल, अखिल क्रान्तिकारी लगायतया भ्रातृ संस्थां थौं सुथनिसे न्हुगुबानेश्वरय् भेला जुया प्रदर्शन यानाच्वंगु खः।

उगु थासय् नेकपा एकीकृत समाजवादी, राप्रपा, विप्लव नेतृत्वया नेकपा, मोहन वैद्य नेतृत्वया नेकपा क्रान्तिकारी माओवादी लगायत न प्रदर्शन याउगु खः।

प्रहरी व प्रदर्शनकारीपि दथुइ झडप जुया  न्हुगु बानेश्वरय् तनावग्रस्त जुगु खः।

प्रतिनिधिसभाया बैठक ५ मिनेतय् क्वचाःगु दु।

थौं बुधबाः नेकपा एमाले नाराबाजीया दथुइ सभामुख अग्निप्रसाद सापकोटां संसद बैठक न्ह्यने यकूगु खः।

प्रधानमन्त्री शेरबहादुर देउवाया पाखे कानुन, न्याय तथा संसदीय मामिलामन्त्री दिलेन्द्रप्रसाद बडुं थारु आयोगं प्रतिवेदन संसद बैठकय् पेश याउगु खः।

अथेहे स्वम्ह पूर्वसांसदपि मदुगु बिचाः हायेकूसे शोक प्रस्ताव न पारित याउगु खः। बुधबाःया बैठकय् अमेरिकी सहयोग परियोजना एमसीसी टेबुल यायेगु तयारी जूसा लिपागु इलय् दल दथुइ सहमति मजुइवं टेबुल यायेमफुगु खः।

प्रतिनिधिसभाया मेगु बैठक फागुन ६ गते च्वनिइगु जुगु दु

थौं न्हुगु बानेश्वरय् एमसीसीया विरोधय् प्रदर्शन जुगुलि प्रहरीपि नाप झडप जुगु दु। बानेश्वरय् तनावया स्थिति वंगु खः।

झडपय् वाईसीएल संयोजक सुमन देवकोटा घाःपा जुगु दु। प्रहरीं प्रदर्शनकारीपिन्त नियन्त्रणय् कया भ्यानय् तःगु खः। प्रदर्शनकारीपिन्त पनेगु झ्वलय् प्रहरीं लःया फोहोरातक प्रयोग याउगु खः।

प्रदर्शनकारी संसद भवनया १ नम्बर गेट (सिभिल अस्पतालपाखेया गेट) तक थ्यंगु खः। ती प्रदर्शनकारीपिन्त प्रहरीं हटे याउगु खः।

माओवादी केन्द्र, नेकपा एकीकृत समाजवादी, नेत्रविक्रम चन्द (विप्लव) नेतृत्वया नेकपा, मोहन वैद्य नेतृत्वया नेकपा क्रान्तिकारी माओवादी लगायत दलया कार्यकर्तापि सुथनिसे बानेश्वरय् भेला जुया एमसीसीया विरोधय् प्रदर्शन याउगु खः।

राष्ट्रिय प्रजातन्त्र पार्टी (राप्रपा) या समूह न एमसीसीया विरोधय् कुहावंगु खः। विरोध प्रदर्शनया कारण माइतीघर–तीनकुने सतकय् यातायात सेवा प्रभावित जुगु खः।

नेकपा एमालेया नेता भीम रावलं अमेरिकी सहयोग परियोजना एमसीसीबारे प्रतिनिधिसभाय् छलफल यायेमाः धका धाउगु दु।

थौं बुधबाः प्रतिनिधिसभाया बैठकलिपा पत्रकारपि नाप खँ ल्ह्यायेगु झ्वलय् रावलं एमसीसी नेपालया सार्वभौमसत्ता व स्वाधीनतानाप स्वागू महत्वूपूर्ण विषय जुगुलि संसदय् छलफल यायेमाः धका धाउगु दु।

नेता रावलं गनं संसद अवरोध दथुइ एमसीसी पारित यायेगु षड्यन्त्र जक मखुला धका थःम्हेसिया न्हापा हे न्ह्यसः तयाउगु खः।

वयकलं संसद अवरोध दथुइ हे सरकारं हःगु गुलिं प्रस्ताव यायेगु व महत्वपूर्ण विषय छलफल मयासे पारित यायेगु षड्यन्त्र जुगु दु धका धयादीगु दु।