भरतपुर महानगरपालिकाय् आःतक ६१८७ मत ल्याखाय् धुकुगु दु।

वडा नम्बर १ य् क्वचाय् धुका आः वडा नम्बर २ या गणना जुयाच्वंगु दु।

आःतक लिच्व कथं गठबन्धनपाखे मेयर उम्मेदवार नेकपा माओवादी केन्द्रया रेणु दाहाल २३ मतं न्ह्यने हया २२१२ मत हःगु दु।

अथेहे एमालेया विजय सुवेदीं २१८९ मत हया स्वतन्त्र उम्मेदवार जगन्नाथ पौडेलं ७१८ मत हःगु दु।

चितवनय् ९८ वडामध्ये आःतक १३ गु वडाया मत परिणाम सार्वजनिक याये धुकुगु दु।

नेपाली कांग्रेस व नेकपा एमाले प्यंगु प्यंगु वडाध्यक्ष त्याके धुकुगु दु सा नेकपा माओवादी केन्द्रं स्वंगु व राप्रपां निगु वडाध्यक्ष त्याके धुकुगु दु। भरतपुर महानगरपालिका–१ य् कांग्रेसया केशव महर्जनं १ हजार ३९३ मत हया विजयी जुगु दु।

कालिका नगरपालिका–१० य् नरजंग प्रजा व वडा नम्बर १ य् सन्तवीर स्याङ्तान निर्वाचित जुगु दु। अथेहे खैरहनी नगरपालिका–१ या वडाध्यक्षय् कांग्रेसया नवराज भुसाल विजयी जुगु दु। एमाले आःतक प्यम्ह वडाध्यक्ष निर्वाचित जुगु दु।

इच्छाकामना गाउँपालिका–२ य् पञ्चबहादुर प्रजा, कालिका नगरपालिका–११ य् कृष्णबहादुर प्रजा, राप्ती नगरपालिका–६ य् जल्लु महतो थारु, राप्ती नगरपालिका–४ य् केदार आचार्य निर्वाचित जुगु दु।

माओवादी केन्द्रपाखे इच्छाकामना गाउँपालिका–१ य् सन्तबहादुर राना, माडी नगरपालिका–२ दण्डपाणि पौडेल, माडी नगरपालिका–९ य् घनश्याम दवाडी निर्वाचित जुगु दु। अथेहे राप्रपाया माडी नगरपालिका–१ य् अमित लामा व वडा नम्बर ८ या वडाध्यक्षय् वीरेन्द्र भण्डारी निर्वाचित जुगु दु।

ख्वप नगरपालिकां शनिबाः व आइतबाः निन्हु सार्वजनिक बिदा मबिइगु निर्णय लागू मयायेत निर्देशन बिउगु दु।

नगरपालिकां आइतबाः सूचं  जारी यासे मेगु सूचं मवतले आइतबाः विद्यालय बन्द मयायेत धाउगु दु।

‘सरकारं जेठ १ गतेनिसे लागू जुइगु कथं हप्ताय् निन्हु शनिबाः व आइतबाः बिदा बिइगु निर्णय याउगु दु सा ख्वप नगरपालिकां मेगु सूचं जारी मयातले साबिक बमोजिम हे विद्यालय सञ्चालन यायेत व याकेत इनाप याना,’ ख्वप नगरपालिकां छगु सूचं पिकया धाउगु दु।

येँ महानगरपालिकाया मेयर पदय् स्वतन्त्र उम्मेदवार बालेन साह न्ह्यने लानाच्वंगु दु।

थौं न्हिनय् तक निर्वाचन अधिकृतया कार्यालयं सार्जजनिक याउगु मत परिणाम कथं बालेनं २८२० मत हःगु दु।

अथेहे नेकपा एमालेया केशव स्थापितं १५०७ व नेपाली कांग्रेसया उम्मेदवार सिर्जना सिंह १४४९ मत हःगु दु।

म्हिगः शनिबाः निसे सुरु याउगु मत गणनाय् आःतक वडा नं १, २, ३, ४ व ३२ या मतगणना जुयाच्वंगु दु।

सरकारं थौंनिसे निन्हस बिदा याउगु दु। सरकारी स्वास्थ्य संस्थाय् हप्ताय् निन्हु शनिबाः व आइतबाः आकस्मिक बाहेक ओपीडी सेवा बन्द जुगु दु।

देयन्यक अप्पो थे अस्पताल व स्वास्थ्य संस्थां उगु कथं बिदा कार्यन्वयन याउगु दु। त्रिवि शिक्षण अस्पताल, कान्ति बाल अस्पताल, वीर अस्पताल, परोपकार प्रसूति तथा स्त्रीरोग अस्पताल, प्रदेश अस्पताल सुर्खेत, आयुर्वेद चिकित्सालय नरदेवी, पोखरा स्वास्थ्य विज्ञान प्रतिष्ठान व भरतपुर अस्पतालं थौं आईतवाः बिदा जूसा ओपीडी सेवा सञ्चालन याउगु दु।